Ej Iakwe Eok

Alice Victoria Weston-Sherwood, Arkansas, USA

Iaar jijet ilo dam̧ eo ilo ruum̧ in celestial turin okwōn eo tōre in aje eo an Memphis Tennessee Temple. Būreejtōn James E. Faust (1920–2007), juon membōr in Būreejtōnji eo Kein Kajuon jān 1995 to 2007, eaar itok n̄an aje tampeļ eo. E im jet bar ritōl raar jijet iturin maaik eo. Juon ritōl kuwaer an Kabun̄ in ijo eaar pād im jijet iturier.

Juon jiron̄ iaar loļo̧k eaar juon membōr in kuwaer eo. Jān aolep kweilo̧k eo, iaar jar bwe liin enaaj bōk ta eo eaar itok n̄an e. Liin eaar jiron̄ ilo n̄a bwe eaar itok n̄an aje eo an tampeļ eo raan eo n̄an pukōt an Irooj ļōmņak kake eddōkļo̧k eo an. Eaar kōm̧mane jerawiwi ko reļļap m̧okta, im eaar ukweļo̧k, ej en̄taan wōt n̄an en̄jake aenōm̧m̧an kōn e make im barāinwōt en̄jake em̧m̧an kōn an al ilo kuwaer eo.

Iaar kalimjōk Būreejtōn Faust, en̄jake bwe e, āinwōt juon ribōk jikin Irooj ilo Būreejtōnji eo Kein Kajuon, naaj maron̄ in kōm̧m̧an jabdewōt. Ak ewi wāween imaron̄ kar jiron̄ļo̧k e, im ewi wāween emaron̄ kōm̧m̧an jabdewōt? Ālkin kweilo̧k eo, e enaaj diwōjļo̧k jān ruum̧ eo eaar deļo̧n̄ tok ie, im ijo enaaj ejjeļo̧k kwaļo̧k kadkad ko, ejjeļo̧k idik pā ko, im ejjeļo̧k naan ko lito litak. Iaar meļeļe bwe eaar boub im ewōr karōk in ito itak ko an, ak iaar jar wōt.

Būreejtōn Faust, m̧wilaļ in ļōmņak, kalimjek n̄an ium̧win jidik iien—majōļ ko ilo ātin raar koba ippān doon. Ke kweilo̧k eo eaar jem̧ļo̧k, juon im̧we in m̧ōņōņō eaar waļo̧k ilo paotokin kōn meram.

Eaar kalimjek n̄a bar juon alen innām mōkaj in jutak, oktak, im erļo̧k pein jon̄an wōt an maron̄. Jitōn̄ļo̧k eo m̧ōtta. Innām eaar kapen ke ej ba eļļaaj, “Irooj ej iakwe eok!”

Kōkkaļļe in m̧akūtkūt eo an Būreejtōn Faust eaar dik im ļam̧waan bōtaab kajoor bwe emaron̄ wōt kar itok wōt jān im̧we eo an Jetōb Kwojarjar n̄an e ta eo iaar jab maron̄e. Jejjo naan ko raar kōjeram̧m̧an eo m̧ōtta im wōnm̧aanļo̧k wōt im rie tōmak eo aō bwe Irooj ej ļōmņak kōn meļeļe ko an mour ko ad im “bwe jān men ko redik im relam waan men ko reļļap rej kūrm̧ool” (Alma 37:6).