—Ij Kōm̧m̧ane—Menmenbwij An Baam̧le
Jino kōm̧m̧ane emaron̄ pidodo im kaitoktok limo. Jodikdik ro peļaakin laļ in rej kōm̧m̧an menmenbwij an baam̧le im kōm̧m̧an juon oktak.
Ijjino ia? Bōlen kwoj ļōmņak bwe ededeļo̧k an ro nukum̧ kōm̧m̧ane aolep jerbal ko ewōr n̄an kōm̧m̧ani. Ak bōlen kwoj kāāltok n̄an menmenbwij an baam̧le im āinwōt n̄e ekamōkmōk. Komaron̄ jino kake juon am make jōōnōļ, kōpooji āt ko n̄an tampeļ, ak ekkatak jān ro nukum̧ rej mour wōt, kwe komaron̄ bōk koņaam̧ ilo menmenbwij an baam̧le ilo wāween ko rekam̧ōņōņō im ewōr tokjāer.
Kōjparoke juon Am̧ Make Jōōnōļ: Kakeememej Kōjeram̧m̧an ko Ad
Kōjparok juon jōōnōļ ejjab pidodo. Ekkā ad ba n̄an kōj make bwe jeboub ak m̧ōk ak mour ko ad rej jab itok limo n̄an je kaki. Iaar kile jet iiō ko rem̧ootļo̧k bwe kōjparok jōōnōļ ej jab juon men epen im bwe imaron̄ eddōkļo̧k im m̧ōņōņō kake.
Iaar jino je men ko rewaļo̧k ilo juon raan. Ejjab lukkuun aorōk eļan̄n̄e elukkuun aetok ak em̧m̧an; iaar je jabdewōt ta eo ilo kōļmenļo̧kjeņ eo aō ak ta eo ewaļo̧k ilo raan eo. Emōj an kar kōjeram̧m̧an mour eo aō.
Juon raan juon ilo baam̧le eo aō eaar en̄taan im iaar jab jeļā ta eo in ba n̄an kōrā eo, bōtaab iaar kile bwe ij aikuj riit n̄an e juon iaan jōōnōļ ko aō iaar jei. Iaar maron̄ kwaļo̧k jidik kake eō make āinwōt aō kar je n̄a ilo bok kilmej eo aō, im iaar lo wāween an kar jipan̄ kōmeramļo̧k buruwōn kōrā eo.
Ij kalim̧m̧ur bwe eļan̄n̄e kwonaaj jino je juon men ilo juon raan, enaaj kōjeram̧m̧an mour eo am̧. Jekdo̧o̧n ewi jon̄an an dik ak ļap, je kōjeram̧m̧an ko ilo mour eo am̧ enaaj jipan̄ eok keememeji.
Gentry W., Utah, USA
Lo Lan̄lōn̄ in Menmenbwij an Baam̧le: Kapukōt Rūtto ro Nukid Remej
Ke iaar peptaij, iaar ron̄ eļap kōn menmenbwij an baam̧le, ak iaar jab jeļā kilen kōm̧m̧ane ak eļan̄n̄e imaron̄ in. Iaar ļōmņak bwe in jar kake, im iaar en̄jake bwe ij aikuj jino jerbale ilo iien eo emōkaj tata. Iaar en̄jake bwe rūtto ro jibū im jim̧aaō raar kijoroor bwe in jino im bwe ren maron̄ jipan̄ eō lo meļeļe eo eaorōk n̄an kōm̧m̧ane kain̄i ko.
Iaar jino bōk juon kūlaaj in menmenbwij an baam̧le, im ilo juon iien ekadu tokālik iaar kūr n̄an erom juon family history consultant. Iaar ikūm̧kūm̧ kōnke ijjab lukkuun jeļā kake, ak iaar bōk kūr eo.
Juon raan iaar loļo̧k sister eo an jibū, eo epād peba ko kōn ro jibū. Kōrā eo eaar jab kōņaan kwaļo̧k elōn̄ meļeļe kōnke ewōr juon aer m̧anit n̄an kōnono kōn ro nukier remej. Eaar ba raan eo tok juon enaaj iien kakeememej raan in mej eo an jibū, im ej ilen tile peba ko. Iaar kajjitōk eļan̄n̄e imaron̄ lale m̧okta meļeļe ko, innām eaar litoki. Iaar jeļā bwe Jemedwōj Ilan̄ enaaj kar jipan̄ eō kappok meļeļe.
Ke iaar jerbal ilo family center eo epaake tampeļ eo, iaar etal wōt im le elōn̄ ļo̧k meļeļe kōn baam̧le eo aō. Iaar lo bwe ruo iaan ro jibūn ro jibū im jim̧aaō raar itok jān Italy ro ekar wōr aer juon jikin kallib epaake Sāo Paulo, Brazil. Baam̧le eo aō raar jab maron̄ tōpar ro nukier rej jokwe ilo jikin kallib eo, bōtaab iaar lo juon rilikū eo eaar je bok in menmenbwij in baam̧le eo am̧. Eaar letok n̄an eō bok eo, eo eaar bōk ralitōk iiō in an je. Eaar ba ejaje etke ej aikuj kar je ak eaar en̄jake ke enaaj jipan̄ juon armej juon iien ilo tōre ko tokālik. Ijeļā bwe eaar jetōb in Elijah eaar im̧we e.
Imminene in aō eaar katakin e bwe jej kōm̧m̧ane juon jerbal ekwojarjar. Rūtto ro ad rej kōttar ad jipan̄ im rej pād ilo tūrājet eo juon n̄an jipan̄ kōj.
Gabriel D., Brazil
Kōm̧mane Jerbal in Tampeļ Kain̄i ko Rekwojarjar
Ij juon rioktak im make wōt membōr ilo Kabun̄ in ilo baam̧le eo aō. Iaar jeļā bwe juon iaan kain̄i ko rekwojarjar ej peptaij kōn ro remej. Iaar etal n̄an tampeļ ilo juon iien kalojooj, im ke ij ron̄jake an rikōnono eo kōnono kōn kain̄i ko, iaar en̄jake aenōm̧m̧an, juon ainikien edik ej jiron̄ eō bwe in etal n̄an family history center eo n̄an leļo̧k juon kain̄i n̄an jinō, eo emej. Iaar lukkuun m̧ōņōņō ke FamilySearch account eo aō eaar kapen bwe jerbal in tampeļ an eaar dedeļo̧k. Eaar kōkajoorļo̧k naan in kam̧ool eo aō, im ijeļā bwe juon iaan un ko bwe jān pād ijin ioon laļ in ej n̄an jipan̄ rūtto ro ad bōk gospel eo em̧ool an Jisōs Kraist.
Marvin S., Philippines
Ļo̧o̧r Im̧we eo: Ekkatak jān ro Nukid Remour
Ālkin aō kadiwōjļo̧k jān high school, iaar en̄jake im̧we n̄an loļo̧k emān iaan rūtto ro jibū im jim̧aaō. Eaar wōt jet aō iien, im iaar kile bwe imaron̄ kar jab bar wōr aō iien em̧m̧an, kōn menin iaar joļo̧k juon wiik ippān kajjojo iaar ro jibū im jim̧aaō.
Iaar joļo̧k aō iien n̄an lali bo̧o̧k ko remo̧r, riiti leta ko remo̧r, im aloji pija ko remo̧r. Iaar je bwebwenato in mour ko an ro jibū im jim̧aaō, etetal iturin uleej ko, im loļo̧k ijo ro jibū im jim̧aaō im ro nukuier raar jokwe im jerbal ie. Ekar kalimomo! Eaar ļap aō katak kōn rūtto ro jibū im jim̧aaō, ro jibū im jim̧aaō, ro jinō im jema, im n̄a make. Iaar kile bwe iban tōpar mour e aō eļan̄n̄e en kar jab rūtto ro aō.
Ālkin tūreep eo aō, iaar ro̧o̧ltok kōn enan̄in 1,000 etan rūtto ro nuku im iaar maron̄ in kōm̧m̧ane jerbal in tampeļ eo n̄an elōn̄ iaer. Ļo̧o̧r im̧we ko an Jetōb Kwojarjar eo im loļo̧k ro jibū im jim̧aaō eaar juon iaan jokālet ko rem̧m̧an tata iaar maron̄ kōm̧m̧ane.
Shenley P., California, USA
En̄jake Kapijuknen: Bōk et ko n̄an Tampeļ eo
Ke iaar kajjitōk ippān jema kōn ļōmņak ko kōn menmenbwij an baam̧le n̄an aō maron̄ kadedeļo̧k Personal Progress eo aō, eaar kōmeļeļeik bwe jet iiō rem̧ootļo̧k ekar lo etan baam̧le ko ak ekar jab maron̄ pojak āt ko n̄an būki ļo̧k n̄an tampeļ eo kōn e make kōnke eaar jab pojak tōre eo. Jipan̄ eo aō emaron̄ kōm̧m̧an bwe membōr rein an baam̧le eo aō ren bōk kōjeram̧m̧an ko an tampeļ.
Ium̧win jejjo allōn̄ ko tokālik, iaar joļo̧k aolepān Jabōt eo n̄an ātti āt ko ilo kamputōr eo im kar ron̄jake bwebwenato ko an baam̧le eo jān jema. Kōm̧ ar wiaktok microfiche eo n̄an kappok eļapļo̧k meļeļe. Jet iien n̄e ej pen tok n̄an riiti pija eo emo̧r, ij jar ilo būruwō innām būki peba ko jān pija ko. Jen lukkuun ejjeļo̧k meļeļe, āt ko raar waļo̧ktok.
Iaar aini elōn̄ etan baam̧le eo, im jodikdik ro ilo ward eo n̄an jipan̄ kadedeļo̧k peptaij ko. Ro jinō im jema im membōr ro jet ilo ward eo raar bōk kaat ko im kadedeļo̧k kain̄i ko jet an tampeļ eo.
Eaar āinwōt n̄e juon iien ekadu m̧okta ke iaar make kōppopo in etal n̄an tampeļ n̄an aō bōk menin letok kwojarjar eo an tampeļ. Iaar lukkuun m̧ōņōņō ak barāinwōt ikūm̧kūm̧.
Ke kōm̧ij etal n̄an tampeļ eo, jema eaar ba bwe eaar lo jet kaat etan baam̧le ko ke ij kōppopo kōn Persoanl Progress būrojāāk eo aō. Jet raar jako, kōn menin eaar bōktok kaat in āt ko n̄an jinō, lio jera, im e n̄an kadedeļo̧k. Eaar kōnono ippān kōn etāer, im iaar keememej er jān būrojāāk eo aō.
Ke iaar kōm̧m̧ane bujen ko rekwojarjar ilo tampeļ eo, iaar en̄jake iakwe eo jān ro rejitōn bōro jim̧or ilo tūrājet eo juon ilo rōn̄ōļ nuknuk eo. Iaar en̄jake aenōm̧m̧an eļap ilo aō jeļā ke imaron̄ bar pād ippān baam̧le eo aō indeeo.
Holly P., Idaho, USA