Jum̧ae ņae Mijen eo Aō
Rijeje eo ej jokwe ilo Manaus, Brazil.
Ālkin intōrpiu eō n̄an jerbale juon mijen, stake būreejtōn eo aō eaar ba, “men ko rekabwilōn̄lōn̄ renaaj waļo̧k ilo mour eo am̧ n̄an kajjieon̄ in ukōt ļōmņak eo am̧.”
Kōmeļeļe jān Greg Newbold
Iaar kobatok ilo Kabun̄ in ke ij 15 aō iiō, im emān iiō tokālik iaar jilkinļo̧k peba in mijenede eo aō. Ilo intōrpiu eo ippān stake būreejtōn eo, eaar nōbar eō kōn kālet eo n̄an jerbal n̄an Irooj āinwōt juon mijenede ej jerbal aolep raan. Innām ritōl in eim̧we eaar ba men eo me eaar kam̧weir eō: “Būratōr, jān kiiō m̧aanļo̧k, elōn̄ men ko rekabwilōn̄lōn̄ renaaj waļo̧k ilo mour eo am̧ n̄an kajjieon̄ ukōt ļōmņak eo am̧ kōn am̧ kālet n̄an jerbal n̄an Irooj.
Ke ij kōttar wōt kūr eo aō n̄an mijen, iaar jerbal āinwōt juon rikkatak ilo Xerox. Jerbal in eaar kōm̧m̧an bwe in būki aikuj dikdik ko me iakuji n̄an mijen im n̄an jipan̄ jinō kōn m̧ūr ko ilo m̧weo. Ekar em̧m̧an wōt aolep men.
Ejerata, “jet men rekabwilōn̄lōn̄” raar jino waļo̧k. M̧oktata, rekar m̧an jinō im ebaj mej wōt jidik jān jorrāān ko n̄ane, ak Jemedwōj Ilan̄ eo eakwe im kabwilōn̄lōn̄ eaar dāpij mour eo an.
Ilo tōre eo, jinō, ruo jatū leddik redikļo̧k, im n̄a kar jokwe ilo juon m̧ōn reen. Kōm̧ ar mour kōn men eo wōnāāō im jidik jeram̧m̧an eo me jinō eaar bōke kōn kar mej eo an jema iiō ko m̧okta.
Jet armej, ekoba ro uwaan Kabun̄ in, raar kajjitōk, “Kwōn peran n̄an kōmakeik jinōm̧ im etal in jerbale juon am mijen?” Ron̄jake kajjitōk in elōn̄ alen ekōm̧m̧an pere ko ilo būruwō.
Juon raan stake būreejtōn eo aō eaar kūrtok eō im ba n̄an eō ke peba in mijen eo aō em̧ōj an itok im eaar kajjitōk ippa bwe in ilo̧k n̄an opiij eo an joteen eo bwe en letok n̄an eō embilob eo jān ra eo eutiej an Kabun̄ in. Ikar jim̧or ikūm̧kūm̧ im m̧ōņōņō kōn ennaan ko.
Ejja raan eo wōt, mānija eo ilo jikin jerbal eo eaar kajjitōk n̄an kōnono ippa m̧okta jān m̧ōn̄ā in rālep. Ke ikar deļo̧n̄e ļo̧k opiij eo an, ekar iakiakwe eō ilo juon mejatoto eo ejouj, im kōm̧ kar kōnono ium̧win jet minit ikijeen aō kamminene im kōn ta eo ikar ekkatak ilo kom̧pani eo. Innām, juon em̧m̧aan ekajoor ilo doulul eo ekar ba juon men eo ekar juon ettōņak an elōn̄ iaan armej ro ilo bukwōn eo: “kwokar kōm̧m̧ane juon jerbal em̧m̧an ijin āinwōt juon rikaminene, im kōm̧ kōņaan kōjerbal eok im dāpij eok uwaan tiim in. Ta Am̧ Ļōmņak?
Ekar juon iaan kālet ko reppen ilo mour eo aō. En̄jake eo ilo iien eo ekar āinwōt ejjeļo̧k jem̧ļo̧kin. Ekar āinwōt ij ron̄ an armej ba n̄an eō eļan̄n̄e ij kōmakeikļo̧k jinō kōn ejjeļo̧k jāān im ilo̧k n̄an mijen.
Kōn menin, iaar keememej men ko iaar ekkatak jān jeje ko rekwojarjar im jān ritōl ro aō ilo Kabun̄ in im ilo juon wāween eo ekwojarjar, ilukkuun jeļā bwe Anij ekōņaan bwe in jerbal āinwōt juon mijenede. ej jerbal aolep raan n̄an Kabun̄ eo An. Iaar jeļā bwe E enaaj kake n̄an baam̧le eo Aō, bwe imaron̄ lōke E, im bwe men otemjej renaaj em̧m̧an.
Iaar kōmeļeļeik wāween eo n̄an mānija eo, im uwaak eo ej bwe in ļōmņak wōt kake: “Iaar ļōmņak kwaar juon likao eo ebolel, im kwoj kwowaan menin em̧m̧an n̄an eok.”
Iaar kam̧m̧oolol e jān tum̧wilaļ in būruwō kōn jouj eo an, im 28 raan tokālik iaar em̧m̧akūt n̄an jikin kamminene eo an mijenede ilo Sāo Paulo, Brazil.
Ilo mijen eo aō, Irooj eaar kabwe aikuj ko an baam̧le eo aō jān ro m̧ōttam̧ ilo Kabun̄ in im ilo wāween ko rekabwilōn̄lōn̄. Ājmour eo an jinō eaar em̧m̧anļo̧k im jerbal ko rem̧m̧an raar alikkar n̄an leddik ro jeiū im e.
“Men ko rekabwilōn̄lōn̄” raar lukkuun waļo̧k ke iaar kālet n̄an jerbal n̄an Irooj. Aaet inaaj kobaik naan in kam̧ool eo aō ippān taujin naan in kam̧ool ko an ro jet ro raar ilo̧k ilo jerbal eo an Anij bwe jerbal in mijenede en im̧we mour eō aō.