Faasoaina Atu o Lou Malamalama

Saunia e Neill F. Marriott

Fesoasoani Lua i le Au Peresitene Aoao o Tamaitai Talavou

E tatau ona tatou tutu mausali i lo tatou faatuatua ma siitia o tatou leo e folafola atu aoaoga faavae moni.

O le po nei, ou te fia iloiloina ai ni tiutetauave taua se lua ua ia i tatou: muamua, o le faaopoopoina e le aunoa o le malamalama ma le upumoni o le talalelei i o tatou olaga, ma le lona lua, o le faasoaina atu o lena malamalama ma le upumoni i isi.

O outou iloaina le taua tele o outou? O outou taitoatasi uma—i le taimi lenei—e taua ma manaomia i le fuafuaga o le faaolataga a le Tama Faalelagi. O loo i ai le tatou galuega e fai. Ua tatou iloaina upumoni o le talalelei toefuataiina. Pe ua tatou saunia ea e puipuia na upumoni? E manaomia ona tatou ola ai; e manaomia ona tatou faasoaina atu. E tatau ona tatou tutu mausali i lo tatou faatuatua ma siitia o tatou leo e folafola atu aoaoga faavae moni.

I le Liahona, o Setema 2014, ua tusia ai e Elder M. Russell Ballard: “Tatou te manaomia le tele o le uunaiga tulaga ese ma le faatuatua o tamaitai. Tatou te manaomia i latou e aoao le aoaoga faavae ma malamalama i mea ua tatou talitonu i ai ina ia mafai ona tuuina atu a latou molimau e uiga i le moni o mea uma.”¹

Uso e, ua outou faamalosia lo’u faatuatua ia Iesu Keriso. Ua ou vaai i a outou faataitaiga, faalogo i a outou molimau, ma lagonaina lo outou faatuatua mai Pasila i Botswana! Ua outou maua le tomai e uunaia ai i latou o loo siomiaina outou i soo se mea tou te malaga i ai. Ua lagonaina e tagata o loo siomiaina outou—mai i o outou aiga i tagata fesootai i a outou telefoni feaveai ma mai i a outou uo i luga o ala o faasalalauga faaleagafesootai ia i latou o loo nonofo i o outou autafa i lenei po. Ou te ioe i le saunoaga a Sister Harriet Uchtdorf, o lē na tusia, “O outou … o ni faataitaiga malolosi ma le naunautai i se lalolagi ua matuā faapogisaina a o outou faaali atu, e ala i le auala o loo outou soifua ai i o outou olaga, e faapea o le talalelei o se savali o le fiafia.”²

Sa ta’ua e Peresitene Thomas S. Monson, “Afai e te manao e tuu atu le malamalama i isi, e tatau ona e susulu atu oe lava.”³ E mafai faapefea ona tatou faatumauina le mumū o lena malamalama o le upumoni i totonu o i tatou? O nisi taimi ou te lagona ai e pei au o se matāuila ua tau le mumū. E faapefea la ona tatou susulu atili atu?

Ua aoao mai tusitusiga paia, “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili.”⁴ E tatau ona tatou tumau pea i le Atua e pei ona taua e tusitusiga paia. E tatau ona tatou o atu i le puna o le malamalama—i le Tama Faalelagi ma Iesu Keriso ma tusitusiga paia. E mafai foi ona tatou malaga atu i le malumalu, ma le iloaina o mea uma o i totonu o ona puipui e taulai atu ia Keriso ma Lana taulaga togiola maoae.

Mafaufau i aafiaga o i ai i malumalu i o latou siosiomaga. Latou te faamatagofieina totonu o aai; latou te susulu mai i tumutumu o mauga. Aisea latou te faamatagofieina ai [aai]ma susulu mai? Aua e pei ona fai mai tusitusiga paia, “[E] susulu le upumoni,”⁵ ma ua i ai i malumalu upumoni ma faamoemoega e faavavau; e faapena foi outou.

I le 1877, sa saunoa ai Peresitene George Q. Cannon e faapea, “O malumalu uma … e faaitiitia ai le mana o Satani i le lalolagi.”⁶ Ou te talitonu po o fea lava e fausia ai se malumalu i le lalolagi, na te tuleia i tua le pogisa. O le faamoemoega o le malumalu o le auauna atu i tagata ma tuuina atu i fanau uma a le Tama Faalelagi le tomai e toe foi ai ma mau faatasi ma Ia. Pe le o tutusa ea o tatou faamoemoega ma [faamoemoega] o nei fale faapaiaina, nei maota o le Alii? Ia auauna atu ai i isi ma fesoasoani ia i latou e tulei i tua le pogisa ma toe foi atu i le malamalama o le Tama Faalelagi?

O galuega paia faalemalumalu o le a faatuputeleina ai lo tatou faatuatua ia Keriso, ona mafai lea ona tatou uunaia atili le faatuatua o isi. E ala i le agaga faafaileleina o le malumalu, e mafai ai ona tatou aoaoina le mea moni, le mana, ma le faamoemoe o le Togiola a le Faaola i o tatou olaga patino.

I le tele o tausaga talu ai na feagai ai lo matou aiga ma se luitau tele. Sa ou alu i le malumalu ma tatalo ai ma le faatauanau mo se fesoasoani. Sa ou maua ai se taimi o mea moni. Sa ou maua se uunaiga manino o o’u vaivaiga, ma sa faateia ai lava a’u. I lena taimi o aoaoga faaleagaga, na ou vaaia ai se tamaitai faamaualuga o faia ni mea i lana lava ala, ae le o ala a le Alii, ma mitamita ai lava o ia faalilolilo mo soo se mea ua ausiaina. Sa ou iloa na ou vaai ia te au lava. Sa ou tatalo i lo’u loto i le Tama Faalelagi, ma faapea atu, “Ou te le fia manao ia avea ma lena tamaitai, ae e faapefea ona ou sui?”

E ala i le agaga mama o faaaliga i totonu o le malumalu, sa aoaoina ai a’u i lo’u manaomia atoatoa o se Togiola. Sa ou liliu vave atu i le Faaola o Iesu Keriso i ou mafaufauga ma lagona ai le aveesea o lo’u mafatiaga ma na faatumulia lou loto i se faamoemoega sili. Sa na o Ia lava lou faamoemoe, ma na ou moomoo e na o Ia e pipii atu i ai. Na manino ia te au o se tamaitai natura ma manatu faapito, “o se fili i le Atua”⁷ ma [o se fili] i tagata e mafai ona ia uunaia. I totonu o le malumalu i lena aso na ou aoao ai ua na o le Togiola a Iesu Keriso e mafai ona suia ai lo’u natura faamaualuga ma o le a mafai ai ona ou faia le lelei. Na ou lagonaina le malosi o Lona alofa ma sa ou iloa o le a Ia aoaoina au e ala i le Agaga ma suia a’u pe a ou tuuina atu lo’u loto atoa ia te Ia.

O lea ou te tauivi pea ma o’u vaivaiga, ae ou te faalagolago i le fesoasoani paia a le Togiola. O lenei aoaoga mama na oo mai ona sa ou ulufale atu i le malumalu paia, e saili le toomaga ma ni tali. Sa ou ulu atu i le malumalu ma le mamafatu, ma na ou tuua [le malumalu] ma le iloaina sa ia te au se Faaola e mamana i mea uma ma e tumu i le alofa. Sa ou lagonaina le māmā o mafatiaga ma le olioli aua na ou mauaina Lona malamalama ma taliaina Lana fuafuaga mo a’u.

I le tutu ai i le lalolagi atoa, ua i ai i malumalu o latou lava foliga tulaga ese ma mamanu i le pito i fafo, ae o totonu o loo i ai uma ia i latou le malamalama e faavavau e tasi, faamoemoega, ma le upumoni. I le 1 Korinito 3:16 tatou te faitau ai, “Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?” O i tatou foi o ni afafine o le Atua ua tuu i le lalolagi atoa, e pei o malumalu, ma ua tofu i tatou ma o tatou lava foliga tulaga ese ma mamanu i fafo, e pei o malumalu. Ua ia i tatou foi se malamalama faaleagaga i totonu o i tatou, e pei o malumalu. O lenei malamalama faaleagaga o se faatusa o le malamalama o le Faaola. O isi o le a tosina mai i lenei malamalama.

Ua ia i tatou ni a tatou lava matafaioi i le lalolagi—mai le tama teine, tina, taitai, ma le faiaoga i le uso, tagata faigaluega, āvā, ma isi. E taua i latou taitoatasi. O le a i ai i matafaioi taitasi le mana amiotonu pe a tatou mafaufau i upumoni o le talalelei ma feagaiga o le malumalu i o tatou olaga.

Na saunoa mai Elder D. Todd Christofferson, “I tulaga uma lava, e mafai e se tina ona faaaoga se faatosinaga e le tutusa ma se isi lava tagata i soo se isi lava sootaga.”⁸

A o laiti le ma fanau, na ou lagonaina le pei o se sui kapeteni o se vaa, faatasi ai ma lou toalua, o David, ma na ou vaai faalemafaufau i le ma fanau e toa 11 o ni vaega o ni vaa laiti o loo faaopeopea i ō ma autafa i le uafu, o loo sauni e o atu i le vasa o le lalolagi. Na ma’ua lagonaina ma David le manaomia o le mauaina o uunaiga i aso uma mai le Alii mo le taitaiga sili ona lelei e folau ai ma ā ma’ua vaa laiti.

Na faatumulia ou aso i mea e faagalo gofie e pei o le gaugauina o le tagamea, faitauina o tusi a tamaiti, ma le kukaina o meaai (casseroles) mo le ‘aiga o le afiafi. O nisi taimi i totonu o uafu i o tatou aiga, e le o mafai ona tatou iloa e ala i faatinoga faatauvaa ma faifai pea, e aofia ai—tatalo faaleaiga, suesueina o tusitusiga paia, ma afiafi faaleaiga—e tutupu mai ai ni mea tetele. Ae ou te molimau atu o nei lava faatinoga o loo i ai se taua e faavavau. E oo mai le olioli tele pe a tuputupu a’e na vaa laiti—o a tatou fanau—i ni vaa folau malolosi i luga o le sami ua faatumulia i le malamalama o le talalelei ma ua saunia e “o atu i le galuega a le Atua.”⁹ O a tatou faatinoga iti o le faatuatua ma auaunaga o le auala lea e mafai ai e le toatele o i tatou ona tumau pea i le Atua ma iu ai ina aumaia le malamalama ma le mamalu e faavavau i o tatou aiga, o a tatou uo, ma a tatou paaga. O loo outou maua le tomai e faatosina ai isi!

Mafaufau i le faatosinaga o le faatuatua a se teineitiiti o le vaitausaga o le Peraimeri e mafai ona i ai i lona aiga. O le faatuatua o la ma’ua tama teine na faamanuiaina ai lo matou aiga ina ua leiloa lo ma atalii laitiiti i se paka faafiafia. Na feoai faananati solo ma le atuatuvale le aiga e saili o ia. Mulimuli ane, sa toso atu e le ma tama teine e 10 tausaga lou lima ma faapea mai, “Tina, e le tatau ea ona tatou tatalo?” Na sa’o lava o ia! Na faapotopoto le aiga i le lotolotoi o le tumutumu o tagata na matamata mai ma tatalo ina ia maua le ma tama. Na matou maua o ia. I teineiti uma o le Peraimeri ou te faapea atu, “Faamolemole ia faamanatu pea i o outou matua e tatalo!”

O lenei tau mafanafana na ou maua ai le avanoa e auai ai i se tolauapiga a tamaitai talavou e 900 i Alaska. Sa loloto a latou faatosinaga ia te au. Na latou o mai i le tolauapiga ua saunia faaleagaga, ua faitauina le Tusi a Mamona ma taulotoina le “O Le Keriso Soifua: O Le Molimau a le Au Aposetolo.” I le po lona tolu o le tolauapiga, na tutu faatasi uma ai tamaitai talavou e 900 ma taulotoina le pepa atoa i le upu i le upu.

Na faatumulia e le Agaga le fale tele, ma na ou naunau e auai atu i ai. Ae sa le mafai. Ou te le i faia mea sa manaomia ina ia taulotoina ai.

Ua amata nei ona ou aoaoina upu “O Le Keriso Soifua” e pei ona faia e nei uso, ma ona o a latou faatosinaga ua atili ai ona ou lagonaina atoatoa le feagaiga o le faamanatuga ia manatua pea le Faaola, a o o’u faia ma toe faia [upu] o le molimau a le Au Aposetolo e uiga ia Keriso. Ua amata ona i ai se uiga loloto o le faamanatuga ia te au.

O lo’u faamoemoega o le ofo atu lea i le Faaola o se meaalofa o le Kerisimasi i lenei tausaga e ala i le taulotoina “O Le Keriso Soifua” ma faatauaina i lo’u loto i le aso 25 o Tesema. Ou te faamoemoe e mafai ona ou avea ma se faatosinaga mo le lelei—e pei ona faia e uso o Alaska mo a’u.

E mafai ona e mauaina oe lava i upu nei o lenei pepa “O Le Keriso Soifua”? “Na Ia augani mai i tagata uma ina ia mulimuli atu i Lana faataitaiga. Na Ia femaliuai i auala o Palesitina, ma faamalolo i e mama’i, faapupula i e tauaso, ma faatutu mai e na oti.”¹⁰

O i tatou, o uso o le Ekalesia, tatou te le savalia auala o Palesitina e faamalolo ai e mama’i, ae e mafai ona tatou tatalo ma faaaoga le alofa faamalolo o le Togiola i se sootaga ua ma’i ma atuatuvale.

E ui e le mafai ona tatou faapupulaina se tauaso i le auala [na faia ai] e le Faaola, ae e mafai ona tatou molimau atu i le ata o le faaolataga i e ua tauaso faaleagaga. E mafai ona tatou faapupulaina mata o lo latou malamalamaaga i le manaomia o le mana o le perisitua i feagaiga e faavavau.

O le a tatou le faatutuina e ua oti e pei ona faia e le Faaola, ae e mafai ona tatou faamanuia ē ua maliliu e ala i le sailia o o latou suafa mo galuega faalemalumalu. Ona mafai moni lea ona tatou faatutu i latou mai i lo latou faalepuipui o agaga ma ofo atu ia i latou le ala o le ola e faavavau.

Ou te molimau atu o loo i ai so tatou Faaola soifua, o Iesu Keriso, ma e ala i Lona mana ma le malamalama o le a mafai ai ona tatou tuleia i tua le pogisa o le lalolagi, tuuina atu le leo i le upumoni ua tatou iloa, ma faatosina mai isi e o mai ia te Ia. I le suafa o Iesu Keriso, amene.