Mauaina o le Filemu Tumau ma le Fausiaina o Aiga e Faavavau
Saunia e L. Tom Perry
O Le Korama a Aposetolo e Toasefululua
O le talalelei a Iesu Keriso lea e maua ai lenei faavae lea e mafai ona tatou maua ai i ona luga le filemu tumau ma fausia ai iunite faaleaiga e faavavau.
O la tatou malaga i le olaga e i ai lava vaitau o taimi lelei ma taimi leaga. E tofu lava ia taimi ma ni luitau eseese. O le auala tatou te aoao ai e fetuutuunai i suiga ia e oo mai e faalagolago lea i le faavae o loo tatou fausia ai i luga. O le talalelei a lo tatou Alii ma le Faaola o loo maua ai se faavae mautinoa ma mausali. O loo fausia lea i fasi mea laiti a o tatou mauaina le malamalama e uiga i le fuafuaga e faavavau a le Alii mo Lana fanau. O le Faaola o le Faiaoga Sili lea. Tatou te mulimuli ia te Ia.
O loo molimau mai tusitusiga paia ia te Ia ma tuuina mai se faataitaiga o le amiotonu atoatoa mo i tatou e mulimuli ai. Na ou faasoa atu i le au paia o le Ekalesia i se konafesi talu ai o loo ia te au ni api o tusigamanatu ia sa faamaumau ai e lo’u tina mea sa ia faaaogaina e saunia ai ana lesona o le Aualofa. E tutusa lelei le aoga o ia manatu i aso nei e pei ona sa i ai i na aso. O se tasi o ia mea o se upusii na tusia i le 1908 e Charles Edward Jefferson e faatatau i uiga o Iesu Keriso. E faitauina:
“O le avea ma se Kerisiano o le faamemelo lea ia Iesu ma le faamaoni ma le naunau tele lea tatou te tuu atu ai lo tatou ola atoa ia te Ia a o tatou taumafai ia avea e faapei o ia.
“… E mafai ona tatou iloaina o ia e ala i upu na ia fetalaia, e ala i galuega sa ia faia, ma e ala foi i mea na te lei fetalaia. E mafai ona tatou iloaina o ia e ala foi i uunaiga na te faia muamua i ana uo ma le lona lua i ana paaga, ma le lona tolu i tagata na latou soifua faatasi i lona vaitaimi. …
“O se tasi o ia vaaiga o le seneturi lona luasefulu o le le faamalieina [ma faafitauli]. …
“… O loo alaga mai le lalolagi mo se mea, ae latou te le iloa po o le a lena mea. Ua oo mai le tamaoaiga; … [ma] ua faatumulia le lalolagi i mea… fou e fatufatua’i e tomai ma le poto, ae… tatou te le o malolo [lava], lē faamalieina, [ma] lē mautonu.… [Afai tatou te susu’e] le Feagaiga Fou [e faafeiloai i tatou e upu nei], ‘O mai ia te au ma o le a ou avatu ia te outou le malologa, o au o le areto o le ola, o au o le Malamalama o le lalolagi, Afai e fia inu se tasi, ina sau ia ia te au e inu ai, ou te avatu ia te outou Lo’u filemu, e maua e Outou le mana, Tou te olioli foi’” (The Character of Jesus [1908], 7, 11, 15–16).
E mamanuina se vaega o alii ma tamaitai e i latou o loo vagaia i latou ma filifili latou te nonofo faatasi. O e foi latou te tepa taulai atu i ai ma taumafai e faataitai i ai e mamanuina ai foi o latou uiga. O Iesu o le Faataitaiga sili. Ua na o le pau lava le auala e maua ai le filemu tumau o le tepa atu lea ia te Ia ma ola ai.
O le a se mea e uiga ia Iesu e sili ona taua tatou te suesue i ai?
O le au tusitala o le Feagaiga Fou … sa le i popole lava i le tulaga faaletino o [Iesu], o laei sa Ia laeiina, po o fale sa afio ai o Ia.… Sa soifua mai o ia i se faatanoa vao, sa galue i se fale kamuta, sa aoao atu mo le tolu tausaga, ona maliu ai lea i luga o se satauro.… Sa tusiaina le Feagaiga Fou e ni tagata sa naunau … e faatumau lo latou taulaiga ia te [Ia]” (The Character of Jesus, 21–22) faatasi ai ma se faamautinoaga o Ia lava o le Alo o le Atua, le Faaola ma le Togiola o le lalolagi.
O se tasi o faataoto a le Faaola, ou te talitonu e faatatau tonu i o tatou nei aso.
O loo i ai i le Mataio mataupu 13, tatou te faitau ai:
“Ua momoe tagata, ona alu ane ai lea o le ua ita mai ia te ia, ua na luluina le titania i totonu o le saito, ona alu ese ai lea i lona ala.
“Ua totogo ae le saito, ma fua mai, ona iloa ai lea o le titania.
“Ona o mai ai lea o auauna a le matai o le aiga, ua faapea mai ia te ia, Le alii e, e le o le saito lelei ea na e luluina i lou fanua? O lenei, pe naifea nei titania?
“Ona fai atu ai lea o ia ia te i latou, ua fai lenei mea e se tagata ua ita mai. Ona fai mai lea o auauna ia te ia, E te finagalo ea matou te o atu e veleeseina ia mea?
“A ua fai atu ia, Aua; ina ne’i outou liai ma le saito pe a outou vele ese le titania.
“Tuu ia, ia tupu lua pea seia oo i le seleselega, a oo atu i ona po e selesele ai, ou te fai atu ai i e selesele, Ia outou muai faapotopoto mai le titania, ma outou fusia i fusi e susunu ai, a o le saito, tou te faaputuina lea i lo’u fale saito” (fuaiupu 25–30).
O lena fili tuai o tagata uma ua ia mauaina le anoanoai o togafiti ua ia mafai ona mafaufau i ai e faasalalau solo ai le titania. Ua ia maua ni auala e ulu atu ai e oo lava i le paia o o tatou lava fale. O auala leaga ma faalelalolagi ua matua salalau solo lea ua foliga mai ua leai se auala moni e veleeseina ai. Ua oo mai i fesootaiga eseese ma oo mai ai i masini ua tatou atiaeina tatou te aoao ai ma faafiafia ai i tatou. Ua matua ola faatasi ma fetiinai le saito ma le titania. E tatau i se tausifanua o loo puleaina le fanua, i lona malosi atoa, ona faafaileleina lea saito lelei ma ia matua malosi lava ma matagofie ia le mafai ai e le titania ona faatosinaina i le vaai po o le faalogo. Ua faamanuiaina lava i tatou o tagata o le Ekalesia a le Alii i le mauaina o le talalelei faapelepele a lo tatou Alii ma le Faaola e avea ma se faavae e mafai ona tatou fausia ai i luga o tatou olaga.
Mai le Tusi a Mamona i le 2 Nifae tatou te faitau ai: “Aua faauta, ou te toe fai atu ia te outou afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia” (2 Nifae 32:5).
E le tatau lava ona tatou faatagaina leo o le lalolagi e puleaina ma lofituina ai lena leo filemu ma itiiti.
Ua lapataiina ma le mautinoa i tatou e uiga i mea e tutupu ia o le a tatou fetaiai i o tatou aso. O lo tatou luitau o le auala tatou te saunia ai mo mea o le a tutupu ia na fetalai i ai le Alii o le a mautinoa lava e oo mai.
E toatele i latou i lo tatou lalolagi popolevale ua malamalama o le faamalepeina o le aiga ua na o le faanoanoa ma le leai o se faamoemoe na te aumaia i se lalolagi pagatia. I le avea ai ma tagata o le Ekalesia, ua i ai ia i tatou le tiutetauave e faasao ma puipuia le aiga o se iunite faavae o le malo ma le faavavau. Ua lapataiina ma muai lapataiina i tatou e perofeta e uiga i taunuuga lē maalofia ma faataumaoi o tulaga faatauaina faaleaiga ua faatamaiaina.
A o faaauau pea ona mataituina i tatou e le lalolagi, tau ina ia tatou mautinoa o a tatou faataitaiga o le a faatumauina ma lagolagoina ai le fuafuaga na mamanuina e le Alii mo Lana fanau iinei i le olaga faaletino. O aoaoga aupito silisili o aoaoga uma e tatau ona faia i faataitaiga amiotonu. E tatau ona avea o tatou aiga ma ni nofoaga paia ina ia mafai ai ona tetee atu i malosiaga o le lalolagi. Manatua o le faamanuiaga aupito silisili a le Alii e oo mai ma ua tuuina mai i aiga amiotonu.
E tatau ona tatou faaauau pea e iloilo ma le totoa la tatou faatinoga o ni matua. O le aoaoga aupito sili ona mamana e mafai ona maua e se tamaitiiti e sau mai lona tama ma le tina e popole ma amiotonu. Ia tatou tagai muamua lava i le matafaioi a le tina. Faalogo i le upusii lenei mai ia Peresitene Gordon B. Hinckley:
“O tamaitai latou te fatuina le fale e avea ma aiga e sili atu lona sao i le malo nai lo i latou e faatonuina ni autau tetele pe tutu o ni taitai o faalapotopotoga lelei. O ai na te mafaia ona tuu se tau i luga o se faatosinaga a se tina i lana fanau, se tina matua i ana fanau, po o tamaitai o aiga ma tuafafine i o latou aiga lautele?
“E le mafai ona tatou amata fuatiaina pe faatusatusa le faatosinaga a tamaitai o e, i a latou lava auala, e fausia se olaga mausali faaleaiga ma faafailele se lelei tumau o le tupulaga o le lumanai. O faaiuga e faia e tamaitai o lenei tupulaga o le a faavavau o latou taunuuga. Ou te fia faapea atu o tina o aso nei e leai so latou lava avanoa sili atu ma e leai se isi luitau ogaoga atu i lo le faia o mea uma latou te mafaia e faamalosia ai le [aiga]” (Standing for Something: 10 Neglected Virtues That Will Heal Our Hearts and Homes [2000], 152).
Ia sei o tatou tagai i le matafaioi a se tama e faia i o tatou olaga:
E tuuina atu e tama ia faamanuiaga ma faatino ia sauniga paia mo le la fanau. O le a avea nei mea ma ni mea faaleagaga taua i o latou olaga.
E aafia patino lava tama i le taitaiina o tatalo faaleaiga, faitauina o tusitusiga paia i aso uma, ma afiafi faaleaiga i vaiaso taitasi.
E fausia e tama ni tu masani faaleaiga e ala i le faaaofia ai o ia i le fesoasoani atu i le fuafuaina o malaga ma tafaoga faaleaiga ia o le a aafia uma ai tagata o le aiga. O manatuaga o nei taimi faapitoa e faatasitasi ai o le a le galo lava i le la fanau.
E faataunuu e tama faatalanoaga fai soo taitoatasi ma le la fanau ma aoao i latou i mataupu faavae o le talalelei.
E aoao e tamā ia atalii ma afafine i le taua o le galue ma fesoasoani ia i latou e faamautu ni sini taua i o latou lava olaga.
E fai e tama se faataitaiga o auaunaga faamaoni i le talalelei.
Faamolemole ia manatua, o lou valaauga paia o se tama i Isaraelu—lou valaauga sili ona taua i le olaga nei ma le faavavau atoa—o se valaauga lea e le mafai ona faamaloloina mai ai oe.
I le tele o tausaga talu ai i konafesi faalesiteki, na matou faaalia ai se ata e faamanino ai le autu o le savali matou te tuuina atu. I le gasologa o le tausaga, a o matou femalagaai solo i le Ekalesia i a matou asiasiga atofaina mo konafesi faalesiteki, sa oo ai ina matou masani tele i mea o loo i ai i le ata. Sa toetoe lava a mafai ona matou taulotoina atoa. Sa tumau pea le savali i lo’u mafaufau i nei mau tausaga e tele. O le ata sa faamatalaupu ai Peresitene Harold B. Lee ma ia faamatalaina ai se mea na tupu i le aiga o lona afafine. Ma e faapenei lona faamatalaina:
I se tasi afiafi sa taumafai ai ma le naunautai le tina o le aiga e faamaea le tuufaguina o ni fualaau aina suamalie. Mulimuli ane ua sauni tamaiti e momoe ma ua toafilemu mea uma; sa tonu ia te ia e faamaea le tuufaguina o fualaau aina suamalie. A o amata ona ia fisiina ma aveese vaega leaga o fualaau aina suamalie, na o mai tama laiti i le umukuka ma fai mai ua sauni i laua mo le la lotu moe.
I le le manao ai e faalavelave atu, sa vave fai atu ai le tina i tama, “E a pe a fai na o oulua le lua tatalo i le po nei ae sei galue pea Tina e fai ia fualaau aina suamalie?”
O le alii matua o atalii nei e toalua sa musu e alu ese ma fai mai, “O le a le mea e sili ona taua, tatalo po o fualaau aina?” (Tagai Aoaoga a Peresitene o le Ekalesia: Harold B. Lee [2000], 143–44.)
O nisi taimi tatou te oo ai i ni tulaga ia tatou te maua ai le avanoa e aoao ai i tamaiti se lesona lea o le a i ai se aafiaga tumau i o latou olaga talavou. Ioe, e sili atu lava le taua o tatalo nai lo fualaau aina. O se matua faamanuiaina e le tatau lava ona pisi tele e pue mai lena taimi i se olaga o se tamaitiiti lea e mafai ona aoaoina ai se lesona taua.
O lo’u talitonuga maumaututu lava e leai ma se taimi i lou olaga i le anoanoai o tausaga o le olaga ua sili ona manaomia ai e fanau a lo tatou Tama i le Lagi le faatosinaga taiala a ni matua faamaoni ma tuuto i lo le taimi nei. Ua ia i tatou se talatuu tautupu o matua e lafoaia toetoe lava o mea uma latou te maua ina ia maua ai se nofoaga e mafai ai ona latou tausia a latou fanau i le faatuatua ma le lototele ina ia mafai ai e le tupulaga e sosoo ai ona mauaina avanoa sili atu nai lo o avanoa na latou maua. E tatau ona tatou mauaina i totonu o i tatou lava lea agaga naunautai lava e tasi ma faatoilalo ia luitau tatou te fetaiai i le agaga lava e tasi o le ositaulaga. E tatau ona tatou totoina i tupulaga o le lumanai se faalagolagoga sili atu ona malosi i aoaoga a lo tatou Alii ma le Faaola.
“Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).
O le talalelei a Iesu Keriso lea e maua ai lenei faavae lea e mafai ona tatou maua ai i ona luga le filemu tumau ma fausia ai iunite faaleaiga e faavavau. Ou te molimau atu ai i lenei mea i le suafa o lo tatou Alii ma le Faaola, o Iesu Keriso, amene.