O A Tatou Galuega o le Auaunaga Patino

Saunia e Elder Hugo E. Martinez

O Le Fitugafulu

O le alofa ia Iesu Keriso e tatau ona avea ma o tatou taiala pe afai e tatau ona tatou mataala i manaoga o i latou e mafai ona tatou fesoasoani i ai i nisi auala.

I Le Ekalesia a Iesu Keriso o le Au Paia o Aso e Gata Ai, ua tuuina mai ia i tatou le avanoa ma le faamanuiaga patino e auauna atu ai. I le taimi atoa o avea ai au o se tagata o le ekalesia, ua ou auauna atu ai i le tele o auala. E pei o le faamatalaga a Brother Udine Falabella, le tama o Elder Enrique R. Falabella, e masani ona fai mai, “O lē auauna atu mo se mea, e lelei mo se mea; o lē auauna atu i le leai o se mea, e lelei mo le leai o se mea.” O upu nei e tatau ona tatou taofia i o tatou mafaufau ma o tatou loto.

Ao ou sailia le taitaiga i le taimi o lau auaunaga, sa ou maua ai le toafimalie i le manatuaina e taulai atu le Faaola i le tagata ma le aiga. O lona alofa ma le gauai alofa atu i le tagata ua aoao ai au Na te silafiaina le taua tele o fanau taitasi a le Tama Faalelagi ma e taua mo i tatou le faamautinoaina o loo auauna atu ma faamalosia tagata taitasi i le talalelei a Iesu Keriso.

I tusitusiga paia ua tatou faitau ai:

“Ia manatua ua tele lava le taua o agaga i le silafaga a le Atua. …

“Ma afai e faapea lua te galulue i o oulua aso uma … ma aumai, nao se agaga e toatasi ia te a’u, e matua tele lava lo oulua olioli faatasi ma ia i le malo o lo’u Tama!”¹

E taua tele agaga uma i le Atua, aua o i tatou o Ana fanau ma ua ia i tatou le gafatia e avea ai faapei o Ia.²

O le alofa ia Iesu Keriso e tatau ona avea ma o tatou taiala pe afai e tatau ona tatou mataala i manaoga o i latou e mafai ona tatou fesoasoani i ai i nisi auala. O aoaoga a lo tatou Alii, o Iesu Keriso, ua faaali mai ia i tatou le ala. Ma o le auala lena na amata ai la tatou auaunaga patino: ia iloa manaoga, ona tausia lea o na manaoga. E pei ona saunoa mai Sister Linda K. Burton, peresitene aoao o le Aualofa, “Muamua matau, ona auauna atu ai lea.”³

O Peresitene Thomas S. Monson o se faataitaiga sili o lenei mataupu faavae. Ia Ianuari 2005, sa ia pulefaamalumalu ai i se konafesi a taitai perisitua i Puerto Rico ae ona faataitaia le auala sa tuuina atu ai le auaunaga e le Faaola ma Ana auauna e ala i se auaunaga patino. I le faaiuga o lena fonotaga matagofie, sa amata faafeiloai ai e Peresitene Monson ia taitai perisitua uma sa auai. Sa faafuasei, ona ia matauina se tasi o i latou sa matamata mai i mea uma mai se mea mamao, sa tu ese mai na o ia.

Sa savali ese atu Peresitene Monson mai le vaega, e agai atu i lena uso, ma talanoa ia te ia. Faatasi ai ma ni lagona, sa tau atu e José R. Zayas ia te ia o se vavega lona agai atu ia te ia ma o se tali i tatalo sa la faia ma lona toalua, o Yolanda, ao lei faia le sauniga. Sa ia tau atu ia Peresitene Monson sa tulaga faaletonu lona afafine ma sa ia te ia se tusi mai lona toalua sa ia manao e tuu atu ia Peresitene Monson. Sa tau atu e Brother Zayas i lona toalua e faigata talu ai o le a pisi tele Peresitene Monson. Sa faalogologo atu Peresitene Monson i le tala ma fesili atu mo le tusi, lea sa ia lauina lemu. Ona ia tuuina lea i totonu o le taga o lona suti ma fai atu ia Brother Zayas o le a ia faataunuuina le la talosaga.

O lea auala, sa pai atu ai lo tatou Alii, o Iesu Keriso i lena aiga, e ala atu i Lana auauna. Ou te talitonu o afioga a le Faaola i le faataoto o le Samaria agalelei e faatatau ia i tatou: “Ina alu ia, ma ia e faapea ona fai.”⁴

I le aso 21 Setema, 1998, na taia ai Puerto Rico e le Afa o Siaosi, ma faaleaga ai le tele o mea. O Sister Martinez, le ma fanau e toalima, ma au sa matou sao mai lena afa tele ma o ona matagi malolosi e ala i le nonofo i lo matou fale. Peitai, e lua vaiaso sa leai ai se vai ma le eletise.

Ina ua uma le matou sapalai vai, sa faigata le aumaiga o nisi vai. E le galo ia te au le uso lea na auauna mai ia i matou e ala i le tuuina mai o lena vai taua, ma e e le galo foi le auala alofa na auauna mai ai foi ia tuafafine ia i matou.

Sa sau Germán Colón i lo matou fale ma se konateina palasitika lapoa o vai i se pikiapu. Sa fai mai o ia, i ana lava upu, “ou te iloa e i ai lau fanau laiti o e manaomia le vai.” O ni nai aso mulimuli ane, sa uta ai e Brother Noel Muñoz ma Herminio Gómez ni tane vai lapopoa e tolu i luga o se loli. Sa faafuasei ona oo mai i lo matou fale ma faatutumu uma faguvai sa avanoa i vai inu, ma valaaulia foi o matou tuaoi e faatutumu a latou faguvai.

Na taliina a matou tatalo e ala i a latou auaunaga patino. Na atagia i foliga o na uso e toatolu le alofa o Iesu Keriso mo i tatou, ma o la latou auaunaga—i nisi upu, la latou auaunaga patino—na aumaia mea e sili atu nai lo vai inu i o matou olaga. Mo atalii po o afafine uma o le Atua, o le iloaina o loo popole tagata ma tausia lona soifua laulelei e taua tele.

Ou te molimau atu ia te outou e silafia i tatou taitoatasi ma patino e le Tama Faalelagi ma lo tatou Alii, o Iesu Keriso. Mo lena mafuaaga, ua La saunia ai mea tatou te manaomia ina ia tatou maua le avanoa e ausia ai o tatou gafatia faalelagi. I luga o le ala, ua La tuuina i ai tagata o le a fesoasoani ia i tatou. Ma, a o avea i tatou ma meafaigaluega i Ona aao, o le a mafai ona tatou auauna atu ma fesoasoani ia i latou ua La faaali mai ia i tatou i se faaaliga.

O lenei auala, ua aapa atu ai le Alii o Iesu Keriso i fanau uma a le Tama Faalelagi. O le a aoina mai e le Leoleo Mamoe Lelei Ana mamoe uma. O le a Ia faia auauai ao latou faaaogaina lelei la latou filifiliga tatau—pe a uma ona faalogo i leo o Ana auauna ma talia la latou auaunaga. O le a latou iloaina loa Lona siufofoga, ma o le a latou mulimuli ia te Ia. O sea auaunaga patino e taua i le tausiga o feagaiga o le papatisoga.

E pei foi, o le avea ma se faataitaiga lelei o se soo o Iesu Keriso o sa tatou mataitusi sili lea o le faailoaina atu ia i latou tatou te faasoa atu i ai Lana talalelei. A tatalaina o tatou gutu ma faasoa atu le talalelei toefuataiina a Iesu Keriso, e avea i tatou ma “Ana leoleo mamoe fesoasoani, ua tuu atu i ai se tiute e fafaga lana lafu mamoe ma tamai mamoe o Lana lafu”⁵; tatou te avea ma “e vaivai ma e faatauvaa”⁶ “o fai faiva i tagata.”⁷

O la tatou auaunaga ma la tatou galuega patino e le faatapulaaina i e o soifua i lenei lalolagi. E mafai foi ona tatou faia le galuega mo e ua maliliu—mo i latou o e o nonofo i le lalolagi o agaga ma e, i le taimi o lo latou olaga faitino, e lei maua le avanoa e talia ai ia sauniga faaola a le talalelei a Iesu Keriso. E mafai foi ona tatou tausia se api talaaga ma tusi ai o tatou talafaasolopito o aiga ina ia liliu atu loto o e soifua agai i e o soifua—faapea ma loto o e o soifua i o latou tuaa. E faatatau lava i le fesootaiina o o tatou aiga, i lea tupulaga i lea tupulaga, i sootaga e faavavau. A tatou faia, e avea i tatou ma “faaola i le mauga o Siona.”⁸

Ua tatou maua le avanoa faapitoa e avea ai ma meafaigaluega i Ona aao. E mafai ona avea ai i o tatou faaipoipoga, tatou aiga, ma a tatou uo, ma o tatou uso a tagata. O la tatou auaunaga patino lena o ni soo moni a Iesu Keriso.

“E faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma oti:

“Ona tuu ai lea e ia o mamoe i lona itu taumatau, a o oti i lona itu tauagavale.

“Ona fai atu ai lea o le Tupu i e o i lona itu taumatau, o mai ia, o outou ua faamanuiaina e lo’u Tama, ia fai mo outou le tofi le malo ua saunia mo outou ao lei faavaeina le lalolagi:

“Aua na ou fia ‘ai ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai, sa fai a’u ma tagata ese, ona outou talia lea o a’u:

“Na ou le lavalava, ona outou faaofuina lea o a’u; na ou ma’i, ona outou asiasia mai lea o a’u; na ou i le fale puipui, ona outou o ane ai lea ia te au.

“Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fafagaina oe? Po o fia inu, ma matou avane e te inu ai?

“O anafea foi na matou iloa ai oe o le tagata ese, ma matou talia oe? Po o le le lavalava, ma matou faaofuina oe?

“O anafea foi na matou iloa ai oe ua ma’i, po o i le fale puipui, ma matou o atu ai ia te oe?

“Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai.”⁹

Tau ina ia tatou faia faapea o la’u tatalo lea i le suafa o Iesu Keriso, amene.