O Mai Ia Ina Matamata

Saunia e Elder David A. Bednar

O Le Korama a Aposetolo e Toasefululua

O Le Ekalesia a Iesu Keriso o loo avea pea ma o le a avea pea ma ekalesia faamisiona.

E tuusao atu ma le patino la’u savali i tagata taitoatasi e le o ni tagata o Le Ekalesia a Iesu Keriso o le Au Paia o Aso e Gata Ai. O le a ou talanoaina se fesili taua atonu o loo i ai i le toatele o outou: “Aisea e naunau tele ai le Au Paia o Aso e Gata Ai e tau mai ia te au mea latou te talitonu i ai ma valaaulia au e aoao e uiga i la latou ekalesia?”

Ou te tatalo ia fesoasoani mai le Agaga o le Alii ia te au ia fesootai atu ma le mataalia, ma ia outou malamalama manino ai, i la’u tali i lenei fesili taua.

O Se Tiute Paia

O soo tuuto o Iesu Keriso o loo avea pea ma o le a avea pea ma faifeautalai totoa ma filiga. O se faifeautalai o se soo o Keriso o le e molimau atu e uiga ia te Ia i Lana matafaioi o le Togiola ma folafola atu upumoni o Lana talalelei.

O Le Ekalesia a Iesu Keriso o loo avea pea ma o le a avea pea ma ekalesia faamisiona. Ua taliaina e tagata taitoatasi o le Ekalesia a le Faaola le matafaioi paia e fesoasoani i le faataunuuina o le tiute paia ua tuuina mai e le Alii i Ana Aposetolo, e pei ona faamaumauina i le Feagaiga Fou:

“O lenei ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia:

“Ia outou aoao atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi, Amene” (Mataio 28:19–20).

E matua mamafa lava i le Au Paia o Aso e Gata Ai lenei tiutetauave e aoao atu tagata uma i atunuu uma e uiga i le Alii o Iesu Keriso ma Lana talalelei toefuataiina. Matou te talitonu i le Ekalesia lava e tasi lea na faavaeina e le Faaola anamua lea ua toe faatuina i luga o le lalolagi e Ia lava i aso e gata ai. O aoaoga faavae, mataupu faavae, pule o le perisitua, sauniga, ma feagaiga o Lana talalelei o loo maua i aso nei i Lana Ekalesia.

Matou te valaaulia oe ina ia auai faatasi ma i matou i le lotu pe aoao faatasi foi ma faifeautalai faamisiona, matou te le o taumafai e faatau atu se oloa. I le avea ai ma tagata o le Ekalesia, matou te le mauaina ni faailoga po o ni togi faaponesi i se tauvaga faaleagaga. Matou te le o sailia ia tau lava ina faateleina se aofaiga faafuainumera o le Ekalesia. Ma le mea sili ona taua, matou te le o taumafai e faamalosia oe ia talitonu e pei ona matou talitonu. O loo matou valaauliaina oe ia faafofoga i upumoni toefuataiina o le talalelei a Iesu Keriso ina ia e suesue, mafaufau loloto, tatalo ma ia iloa mo oe lava ia pe moni mea o loo matou faasoaina atu ia te oe.

Atonu e tali mai nisi o outou, “Ae ua ou talitonu ia Iesu ma mulimuli i Ana aoaoga,” po o le “Ou te le o mautinoa pe o i ai moni lava se Atua.” O a matou valaaulia ia te oe e le o se taumafaiga ia faavaivaia ou tu masani faalelotu po o aafiaga faaleolaga. Aumai uma mea ua e iloa e moni, lelei, ma tauleleia—ma faataitai la matou savali. E pei lava ona faailoa atu e Iesu i Ona soo e toalua ia “o mai ia ina matamata” (Ioane 1:39), o lea matou te uunaia ai oe ia e susu mai ma vaai pe faalauteleina ma faaoaina e le talalelei toefuataiina a Iesu Keriso mea na ua e talitonu i ai e moni.

O le mea moni, matou te lagonaina se tiutetauave paia e momoli atu lenei savali i malo uma, ituaiga, gagana, ma nuu. Ma o le mea tonu lena o loo matou faia i se malosiaga i le taimi nei e silia ma le 88,000 faifeautalai faamisiona o loo galulue i le silia ma le 150 setete tumaoti i le lalolagi atoa. O nei alii ma tamaitai ofoofogia o loo fesoasoani atu i tagata o la tatou Ekalesia e faataunuu le tiutetauave patino na tofia mai le lagi lea e ao ai ona folafola atu e i tatou taitoatasi le talalelei e faavavau a Iesu Keriso (tagai MF&F 68:1).

E Sili Atu Nai Lo se Tiute Faaleagaga

Ae o lo matou naunautaiga e folafola atu lenei savali ua le na o se taunuuga o se lagona o se tiute faaleagaga. Ae, o lo matou manao ia faasoa atu le talalelei toefuataiina a Iesu Keriso ia te outou o se ata moni lea o le taua o nei upumoni ia i matou. Ou te talitonu e mafai ona ou faamatalaina sili le pogai matou te tuusao atu ai e saili e faamalamalama o matou talitonuga ia te oe e ala i se aafiaga sa ma mauaina ma lo’u toalua i le tele o tausaga ua mavae faatasi ma o ma atalii e toalua.

I se tasi afiafi sa ma tutu ai ma Susana i talaane o se faamalama i lo ma fale ma matamata atu i le toalua o ma atalii o loo taaalo i fafo. I le taimi o le la taaloga, sa manu’a ai le alii laitiiti o le toa lua lea i se tamai faalavelave laitiiti. Sa vave ona ma iloaina sa lei tuga lona manuaga, ma sa tonu ai ia i maua e le manaomia se fesoasoaniga vave. Sa ma mananao ia matau ma vaavaai pe o le a aoga se tasi o a matou talanoaga faaleaiga e uiga i le agalelei faaleuso. O le mea na sosoo ai sa mataina uma ma faagaeetiaina.

Sa faamafanafana e le uso matua ma fesoasoani ma le faaeteete i le uso laitiiti e aumai i le fale. Sa ma tutu ma Susana e latalata i le umukuka ina ia mafai ai ona ma vaai atu po o le a le isi mea o le a sosoo ai, ma sa ma sauni foi ma te vave faalavelave atu i ai pe afai o i ai nisi manuaga tuga po o se faalavelave ogaoga foi e ono tulai mai.

Sa toso mai e le uso matua se nofoa i le paipa i le umukuka. Sa ia a’e i luga o le nofoa, ma fesoasoani i lona uso ia oso i luga o le nofoa, ki le vai, ma amata loa ona liligi i ai se vaega tele o le fasimoli fufulu ipu i luga o le lima ua maosia o lona uso laitiiti. Sa ia faia le mea sili na te mafaia e fufulu lemu ese ai le palapala. O uiga faaalia o le uso laitiiti i lenei faiga ua na o le faaaogaina o le gagana mai tusitusiga paia e mafai ona faamatalaina tonu ai: “Ma o le a i ai se pogai o le latou uio ai, ma tagitu’i, ma tagiaue, ma lilivau ai o latou nifo” (Mosaea 16:2). Ma sa uio lena tamaitiiti!

Ina ua maea ona fufulu, sa faamago ma le faaeteete le lima i se solo. Sa iu ina uma le uio. Sa sosoo ai ma le a’e i luga o le uso matua i le fata o le umukuka, tatala se kapoti, ma maua ai se kulimi fou fai manu’a. E ui sa le tetele ni maosiosia i le lima o lona uso laitiiti, ae sa toetoe lava uma atoa i ai le kulimi fai manu’a i le lima atoa na maosia. Sa lei toe i ai se uio, aua na manino lava le fiafia o le uso laitiiti i aafiaga malu o le kulimi e sili atu i lo lona talisapaia o aafiaga o le fufuluina i le fasimoli fufulu ipu.

Sa toefoi atu le uso matua i le kapoti lea sa ia maua ai le kulimi ma vaaia ai se tamai pusa fou o fusi manu’a. Ona ia tatalaina lea ma faapipii solo mea faapipii i luga ma lalo o le lima o lona uso—mai lava le tapulima e oo atu i le tulilima. Faatasi ai ma le foiaina o le faalavelave, atoa ai ma puka mai le fasimoli, kulimi, ma fusi manu’a ua taatitia solo i le umukuka, sa feosofi ese ai aualii laiti nei mai le nofoa ma ni ataata ma ni foliga fiafia.

O le mea na sosoo ai na tupu e sili atu ona taua. Sa ao mai e le uso na manua ia mea faapipii na totoe, ma le kulimi lea ua toetoe lava a uma, ma toe foi atu i fafo. Sa vave ona ia sailia ana uo ma amata ona faakulimi ma faapipii o latou lima. Sa ma maofa ma Susana i le faamaoni, naunautai ma le faananati o lona tali atu.

Aisea na faia ai e lena tamaitiiti le mea na ia faia? Faamolemole matau sa ia manao vave e aunoa ma le tau mafaufau e tuu atu i ana uo le mea lea e tasi sa fesoasoani ia te ia ina ua ia manua. Sa lei tau uunaia, luiina, faaosofia, pe faamalosi lena tamaitiiti e faatino. O lona manao e faasoa atu o le taunuuga masani lea o se aafiaga patino sili ona aoga ma faamanuiaina.

O le toatele o i tatou o tagata matutua e faapena tonu foi o tatou uiga pe a tatou maua se togafiti po o se vailaau lea e faatoafilemu ai se tiga ua leva ona tatou mafatia ai, pe tatou te maua foi se fautuaga e mafai ai ona tatou faafetaiaia luitau i le lototele atoa ai ma le onosaia o mea ua le mautonu ai. O le faasoa atu i isi tagata o mea e aupito sili ona taua ia i tatou pe na aoga foi ia i tatou o se mea ua masani ai lava.

O lenei mamanu e tasi ua manino faapitoa lava i tulaga o le taua sili faaleagaga ma taunuuga. Mo se faataitaiga, o se tala i se voluma o tusitusiga paia ua lauiloa o le Tusi a Mamona o loo faamamafa ai se miti na maua e se taitai perofeta anamua e igoa ia Liae. O le vaega tutotonu o le miti a Liae o le laau o le ola—o le faatusa lea o le “alofa o le Atua” lea ua “silisili atu ona manaomia i mea uma” ma “silisili ona olioli i le agaga” (1 Nifae 11:22–23; tagai foi 1 Nifae 8:12, 15).

Sa faamalamalama mai e Liae:

“Ma sa oo ina ou alu atu ma ai i lona fua; ma sa ou iloa ua sili ona suamalie, nai lo o mea uma sa ou tofo muamua i ai. Ioe, ma sa ou vaai o le fua o le laau ua pa’epa’e, ua sili atu nai lo mea papa’e uma ua ou vaai i ai.

“Ma a’o ou ai le fua o le laau, sa faatumulia lo’u agaga i le olioli tele; o le mea lea, sa amata ai ona ou manao ia aai ai foi lo’u aiga” (1 Nifae 8:11–12; faaopoopo le faamamafa).

O le faailoaga aupito silisili lava o le alofa o le Atua mo Lana fanau, o le galuega i la le tino, taulaga togiola, ma le Toetu o le Alii o Iesu Keriso. O le fua o le laau e mafai ona manatu i ai o se faatusa mo faamanuiaga o le Togiola a le Faaola.

O le tali vave atu a Liae e ai i le fua o le laau ma le lagonaina o le olioli tele o se manao faateleina lea e faasoa atu ma auauna atu i lona aiga. O lea, a o ia liliu atu ia Keriso, sa ia liliu atu foi i isi i le alofa ma auauna atu i ai.

O le isi mea taua na tupu i le Tusi a Mamona o loo faamatalaina ai le mea na tupu i se alii e igoa ia Enosa ina ua mavae ona faafofogaina ma tali mai le Atua i lana tatalo sili ona naunautai ma faatauanau.

Sa ia fai mai:

“Ma sa matelaina lo’u agaga; ma sa ou tootuli i lalo i luma o lo’u Tufuga, ma ou tagi atu ia te ia i le tatalo malosi ma le faatauanau mo lo’u lava agaga; ma sa ou tagi atu ia te ia i le aso atoa; ioe, ma ina ua oo mai le po sa ou sii maualuga a’e pea lo’u leo sa oo ina oo atu i le lagi.

“Ma sa oo mai se siufofoga ia te au, ua fetalai mai: Enosa e, ua faamagaloina au agasala, ma o le a faamanuiaina oe.

“Ma o au o Enosa, sa ou iloa e le mafai ona pepelo le Atua; o le mea lea, sa tafi ese ai lo’u lagona o a’u sese.

“Ma sa ou fai atu: Le Alii e, ua faapefea ea ona faia lenei mea?

“Ma sa fetalai mai o ia ia te au; Ona o lou faatuatua ia Keriso, o lē e te lei faalogo lava pe na e vaai muamua i ai. … O le mea lea, inā alu ia, ua faamamaina oe i lou faatuatua.

“O lenei, sa oo ina ua ou faalogo atu i nei upu sa amata ona ou lagona se naunauga mo le manuia o o’u uso, o sa Nifae; o le mea lea, sa ou sasaa atu ai lo’u agaga atoa i le Atua mo i latou” (Enosa 1:4–9; faaopoopo le faamamafa).

Ina ua liliu atu Enosa i le Alii “ma le faamoemoe atoa o le loto” (2 Nifae 31:13), sa faateleina i le taimi foi lava lena lona popole mo le manuia o lona aiga, o uo, ma paaga.

O lesona tumau tatou te aoaoina mai nei tala e lua o le taua lea o le lagonaina i o tatou lava olaga patino ia faamanuiaga o le Togiola a Iesu Keriso e fai ma mea e manaomia mo auaunaga faamaoni ma le naunautai ia e sili atu i lo le tau “na ona faatino.” E pei foi o Liae, Enosa ma le ma atalii laitiiti i le tala na ou faamatalaina, e faapena foi tatou o tagata o Le Ekalesia a Iesu Keriso o le Au Paia o Aso e Gata Ai e lagonaina le tiga e fesootai ma mea faaleagaga ua le mautonu ai ma le agasala. Tatou te lagonaina foi le faamamaina, le filemu o le mafaufau, o le faamaloloina faaleagaga ma le faafouina, atoa ai ma le taitaiga lea e na o le aoaoina ma le ola i mataupu faavae o le talalelei a le Faaola e maua ai.

Ua maua i le Togiola a Iesu Keriso le mana faamama e talafeagai e mama ma paia ai, o le pulu pasama mālū e faamalolo ai ni manuaga faaleagaga ma aveesea ai le tausalaina, faapea ai ma le puipuiga lea e mafai ai ona tatou faamaoni i taimi o le lelei ma taimi o le leaga.

O Loo I Ai le Upumoni A’ia’i

Ia te outou o tagata o aiga ma uo e le o ni tagata o Le Ekalesia a Iesu Keriso o le Au Paia o Aso e Gata Ai, ua ou taumafai e faamalamalama atu mafuaaga autu ua avea ai matou ma faifeautalai.

O loo i ai upumoni a’ia’i i se lalolagi ua faateteleina ona faaleagaina ma aveesea mataupu autu. I se aso o lumanai, e “tootuli [ai] tulivae uma lava” ma “ta’uta’u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tama” (Filipi 2:10–11). O Iesu le Keriso o Ia moni o le Alo e Toatasi o le Tama Faavavau na Fanaua. I le avea ai ma tagata o Lana Ekalesia, tatou te molimau o loo soifua o Ia ma ua toefuatai mai Lana Ekalesia i lona atoatoa i nei aso e gata ai.

O valaaulia matou te tuu atu ia te outou ia aoao ma faataitai la matou savali o taunuuga o aafiaga lelei o le talalelei a Iesu Keriso ua i ai i o matou olaga. O nisi taimi atonu matou te faafiufiu pe tuusao pe oo lava i le faifai pea a matou taumafaiga. O lo matou manao faigofie lava ia faasoa atu ia te outou upumoni ia e matua silisili ona taua ia i matou.

I le avea ai ma se tasi o Aposetolo a le Alii, ma e faatasi ai ma le malosi atoa o lo’u agaga, ou te molimau atu i Lona paia ma le moni a’ia’i. Ma ou te valaaulia outou ia “o mai ia ina matamata” (Ioane 1:39), i le suafa paia o le Alii o Iesu Keriso, amene.