Aua le Faatauvaaina Mea Paia

Saunia e Elder Larry S. Kacher

O Le Fitugafulu

Iloilo a tatou filifiliga e ala i le fesili ifo ia i tatou lava i le fesili, “Pe o totoina ma le mausali a’u faaiuga i le eleele lafulemu o le talalelei a Iesu Keriso?”

Uso e ma tuafafine, o faaiuga tatou te faia i lenei olaga e matuai aafia ai lava le ala i lo tatou ola e faavavau. O loo i ai uma ni malosiaga vaaia ma lē mavaaia o loo faatosinaina ai a tatou filifiliga. Na ou aoaoina le taua o lenei [mataupu faavae] i se auala patino e tusa ma le lima tausaga talu ai i se auala na semanu ou te oo ai i se taunuuga matautia.

Na matou malaga ma aiga ma uo i le itu i saute o Omani. Na tonu ia i matou e fai se malologa i luga o le matafaga i le talafatai o le Vasa Initia. E lei leva ona matou taunuu, ae fesili mai le ma afafine e 16 tausaga le matua, o Nellie, pe mafai ona ia aau atu i le mea na ia manatu o se tama’i motu oneone. O le matauina o le sou o galu, na ou fai atu ai ia te ia o le a ou alu muamua, ma le manatu atonu o loo i ai ni āu aave matautia.

Ina ua mavae ona aau ai mo se taimi puupuu, na ou valaau atu i lou toalua e fesili i ai pe ua ou tai latalata i le tama’i motu oneone. Na ia tali mai, “Ua leva ona e pasiaina.” Ma le lē iloaina, na maileia a’u i se āu aave¹ ma toso faatopetope atu ai a’u i le sami i fafo i le tuā’au.

Sa ou lē mautonu po o le a le mea e fai. Na pau le mea na mafai ona ou mafaufau i ai o le toe liliu mai ma aau agai atu i le matafaga. O le mea sese tonu lava lena sa fai. Sa ou lagona le vaivai. O malosiaga e sili atu ma lo’u malosi na toso mamao atua a’u i le tuā’au. O le mea na atili ai ona leaga o le faatuatuaina e lo’u toalua o la’u faaiuga, ma ia aau mai ai i le ala lava e tasi.

Uso e ma tuafafine, ou te manatu sa telē lava se avanoa ou te lē ola ai ma, ona o la’u faaiuga, semanu e ono oti ai foi si ou toalua. Ina ua mavae se taumafaiga tele ma le mea na ou talitonu o se fesoasoaniga mai le lagi, sa tei ai lava ua pa’i o ma vae i le oneone ma mafai ai ona ma savavali saogalemu atu i a ma uo ma lo ma afafine.

O loo i ai le tele o āu fetafea’i i lenei olaga faalelalolagi—o nisi e saogalemu a o isi e leai. Na aoao mai Peresitene Spencer W. Kimball e faapea o loo i ai ni malosiaga malolosi i o tatou lava olaga e pei o āu lē mavaaia o le vasa.² O nei malosiaga e moni. E le tatau ona tatou lē amanaiaina i latou.

Se’i ou tau atu ia te outou se isi āu, o se āu paia, ua avea ma se faamanuiaga maoae i lo’u olaga. O a’u o se tagata liliu mai i le Ekalesia. Ae ou te le’i liliu mai, o le sini o lou olaga o le faase’e aisa, o lea na ou siitia atu ai i Europa ina ua maea le aoga maualuga e faataunuu lena manaoga. I le mavae ai o ni nai masina o mea na foliga mai o se olaga atoatoa, na ou lagona ai e tatau ona ou alu ese. I lena taimi, ou te le’i malamalama i le mafuaaga o lena lagona, ae na ou filifili e mulimuli i ai. Na ou i’u ane i Provo, Iuta, ma ni nai uo lelei o e, e pei foi o au, sa le auai i le ekalesia.

A o ou i ai i Provo, na ou feiloai ai i tagata o e na soifua i se olaga na telē lona eseesega nai lo au. Sa ou tosina atu ia i latou, e ui sa ou le iloaina le mafuaaga. I le taimi muamua, na ou teenaina nei lagona, ae na vave ona ou maua se filemu ma le mafanafana ou te le’i iloaina lava muamua. Na amata ona ou taliaina se āu e ese ai—o se āu na aumaia ia te au se malamalamaaga o se Tama Faalelagi alofa ma Lona Alo, o Iesu Keriso.

Sa papatisoina a’u ma a’u uo i le 1972. O lenei āu fou na ou filifilia e mulimuli ai, o le talalelei a Iesu Keriso, na maua ai le taitaiga ma le uiga moni o lou olaga. Peitai, na i ai lava foi ma ona luitau. Na fou mea uma ia te au. Sa i ai taimi, na ou lagona ai ua leiloa ma ua lē mautonu. O fesili ma luitau na auala mai uma i uo ma aiga.

Sa i ai sa’u filifiliga e fai. O nisi o a latou fesili na fatuina ai le masalosalo ma le lē mautonu. O se filifiliga sa taua tele. O fea o le a ou liliu atu i ai mo ni tali? Na toatele i latou na mananao e faatalitonu au i mea sese o o’u ala—“o āu aave o le tuā’au” na naunau e toso ese atu au mai le āu malū na avea ma se punavai matagofie o le fiafia. Na ou aoao ma le manino tele le mataupu faavae, o loo i ai le “faafeagai o mea uma” ma le taua o le faatinoina mo au lava ma aua nei lafoai atu la’u faitalia i isi.³

Na ou fesili ifo ia te au, “Aisea o le a ou fulitua ai i mea na aumaia ia te au le tele o le mafanafana?” E pei ona faamanatu atu e le Alii ia Oliva Kaotui, “Ou te lei tautala atu ea le filemu i lou mafaufau e uiga i le mataupu?”⁴ Na faapea uma lava lou aafiaga. O lea, na ou liliu atu ai, faatasi ai ma le tuuto tele, i se Tama Faalelagi alofa, i tusitusiga paia, ma i ni uo faatuatuaina.

Ae, sa i ai pea le tele o fesili sa le mafai ona ou taliina. O le a faapefea ona ou talanoaina le lē mautonu na latou fatuina? Nai lo le faatagaina o i latou e faaumatia le filemu ma le fiafia na oo mai i lou olaga, na ou filifili ai e faagalo i latou mo sina taimi, ma faatuatuaina le taimi a le Alii, o le a Ia faaali mai mea uma. Na ou maua le filemu i Lana fetalaiga i le Perofeta o Iosefa Samita: “Faauta, o outou o ni fanau laiti, ma e lē mafai ona outou gafatia mea uma i le taimi nei; e ao ina outou tutupu a’e i le malosi faaleagaga ma i le malamalama o le upumoni.”⁵ Na ou filifili ia aua ne’i lafoaia mea na ou iloa e moni e ala i le mulimuli atu i se āu lē mailoa ma masalosalo—o se “āu aave i le tuā’au” ua faamoemoeina. E pei ona aoao mai e Peresitene N. Eldon Tanner, na ou aoaoina “le tele o le atamai ma le lelei atu mo tagata e talia ia upumoni faigofie o le talalelei … ma talia e ala i le faatuatua i na mea ia na te … le malamalama i ai.”⁶

Pe o le uiga ea o lenei mea ua leai se avanoa mo se fesili faamaoni? Fesili i le alii talavou o lē na saili le toomaga i se vao paia ma le manao ia iloa pe o le fea o lotu uma e tatau ona auai ai. U’u le Mataupu Faavae ma Feagaiga i lou lima, ma iloa le tele o mea ua faaali mai i lenei talafaamaumau paia ona o se taunuuga o se sailiga faamaualalo mo le upumoni. E pei ona maua e Iosefa, “A e afai ua leai se poto i so outou, ina ole atu ia i le Atua, [o lē] foai tele mai i tagata uma ma le le toe ta’uta’ua, … ona foaiina mai ai lea ia te ia.”⁷ E ala i le faia o fesili faamaoni ma e ala i le sailia o tali faalelagi, tatou te aoao ai “fasifuaitau ma lea fasifuaitau, mataupu i lea mataupu,”⁸ a o tatou faateleina le malamalama ma le poto.

O le fesili e lē o le “O i ai ea se avanoa mo se fesili faamaoni?” ae o le “O fea ou te liliu atu i ai mo le upumoni pe a i ai ni fesili?” “Mata e lava lou atamai e manatua ai mea ou te iloaina e moni e ui lava i ni nai fesili atonu o ia te a’u?” Ou te molimau atu o loo i se punavai paia—o Lē e silafia mea uma—le gataaga mai le amataga. O mea uma ua i ai i Ona luma.⁹ Ua molimau mai tusitusiga paia Na te “lē savali i ala faapiopio, … pe ese foi o ia mai le mea na ia fetalai mai ai.”¹⁰

I lenei faigamalaga faaletino e le tatau ona tatou mafaufau o a tatou filifiliga e aafia ai na o i tatou lava. Talu ai nei, na asiasi mai ai se alii talavou i lou aiga. Na i ai se agaga lelei ia te ia, ae na ou lagona e le o auai atoatoa i gaoioiga a le Ekalesia. Na ia tau mai ia te au na tausia o ia i se aiga e faatotonugalemu i le talalelei seia oo ina lē faamaoni lona tama i lo la va ma lona tina, lea na oo ai ina tetea ma aafia uma ai loa ona tei ma fesiligia ai le Ekalesia ma pauu ese ai. Na mamafatu lou loto a o ou talanoa ma lenei tamā talavou, ua aafia ona o filifiliga a lona tamā, o loo ia tausia i le taimi nei ni agaga faapelepele i fafo atu o faamanuiaga o le talalelei a Iesu Keriso.

O le isi alii ou te iloaina, na i ai se taimi o lona olaga na avea ai ma tagata faamaoni o le Ekalesia, na i ai ni fesili e uiga i ni aoaoga faavae patino. Nai lo le ole atu i le Tama Faalelagi mo ni tali, na ia filifili e faalagolago atoa i puna faalelalolagi mo le taitaiga. Na liliu lona loto i le itu sese a o ia saili i mea na foliga mai o viiga a tagata. Atonu na faamalieina lona faamaualuga, a o le mea sili sa le tumau, ae sa vavaeeseina o ia mai mana o le lagi.¹¹ Nai lo le mauaina o le upumoni, na maumau atu ai lana molimau ae maua mai ai le toatele o tagata o le aiga.

O nei alii e toalua na maileia i āu aave o le tuā’au lē mavaaia ma aumai ai le toatele faatasi ma i laua.

I le isi itu, ou te mafaufau ia LaRue ma Louise Miller, o matua o lo’u toalua, o ē e ui sa le tele ni oa faalelalolagi, ae na filifili ina ia aoao atu aoaoga faavae mama o le talalelei toefuataiina i le la fanau ma ia soifua ai foi i aso uma o o laua olaga. E ala i le faia o lea mea, ua la faamanuiaina ai a laua fanau i fua o le talalelei ma le faamoemoe o le ola e faavavau.

I lo latou aiga na latou atiina ae ai se mamanu lea e faaaloalogia ai le perisitua, lea na faateleina ai le alofa ma le fealofani, ma le nofoaga na taitaia ai e mataupu faavae o le talalelei o latou olaga. Sa faaalia faatasi e Louise ma LaRue le uiga o le soifua ai i o latou olaga ua mamanuina ia Iesu Keriso. Na mafai ona manino le vaai a le la fanau i le āu tonu o le olaga lea e aumaia le filemu ma le fiafia. Ma na latou filifili e tusa ai ma lena [ala]. E pei ona sa aoao mai e Peresitene Kimball, “Afai e mafai ona tatou fatuina … se āu malosi, ma mausali e tafe atu agai i a tatou sini o se olaga amiotonu, e mafai ona aveina i tatou ma a tatou fanau i luma e ui i matagi o faigata, lē fiafia, [ma] faaosoosoga o loo agi faasaga mai.”¹²

E afaina ea a tatou filifiliga? E aafia ai ea na o i tatou? Pe ua tatou faatulaga ea o tatou olaga ia mausali i le āu e faavavau o le talalelei toefuataiina?

Mai lea taimi i lea taimi, ou te mafaufau ai lava se mea ou te fefe ai. Ae a pe ana faapea ou te fai atu i lou afafine, o Nellie, i lena aso ia Setema, a o malolo i le matafaga o le Vasa Initia, “Ioe, alu oe. Aau atu i lena tama’i motu oneone.” Pe afai foi na ia mulimuli atu i lau faataitaiga ma lē mafai ai ona toe aau mai i tua [i le matafaga]? Ae a pe ana ou ola i le olaga ma le iloaina o la’u faataitaiga na mafua ai ona toso atu [lo’u toalua] e se āu aave i le tuā’au i le sami, ma lē toe foi mai ai?

O taua ea āu o loo tatou filifili e mulimuli i ai? E afaina ea a tatou faataitaiga?

Ua faamanuiaina i tatou e le Tama Faalelagi i le meaalofa paia o le Agaga Paia e taialaina a tatou filifiliga. Ua Ia folafola mai ia i tatou ia musumusuga ma faaaliga a o tatou ola agavaa e mauaina. Ou te valaaulia outou e faaaoga lenei meaalofa paia ma iloilo a tatou filifiliga e ala i le fesili ifo ia i tatou lava i le fesili, “Pe o totoina ma le mausali a’u faaiuga i le eleele lafulemu o le talalelei a Iesu Keriso?” Ou te valaaulia outou e faia soo se fetuunaiga e manaomia, pe itiiti pe tele, ia mautinoa ai faamanuiaga e faavavau o le fuafuaga a le Tama Faalelagi mo outou ma i latou tou te alolofa i ai.

Ou te molimau atu o Iesu Keriso o lo tatou Faaola ma le Togiola. Ou te molimau atu o feagaiga tatou te osia ma Ia o ni feagaiga paia. E le tatau lava ona tatou manatu faatauvaa i mea paia.¹³ Tau ina ia tatou tumau ma le faamaoni, ou te tatalo ai i le suafa o Iesu Keriso, amene.