O Le Faamanatuga—o se Toefaafouina o le Agaga
Saunia e Cheryl A. Esplin
Fesoasoani Lua i le Au Peresitene Aoao o le Peraimeri
O le Agaga e faamaloloina ma toefaafouina o tatou agaga. O faamanuiaga folafolaina o le faamanatuga o le a tatou “maua pea lona Agaga e faatasi ma i [tatou].”
Sa fesili mai se vaega o tamaitai talavou ia te au i se tasi taimi, “O le a se mea sa e moomoo e te fia iloaina a o e matua e pei o i matou?” Afai ou te taliina lena fesili i le taimi nei, ou te faaaofia ai le manatu lenei: “A na ou pei o lo outou matutua ou te moomoo maimau pe ana ou malamalama atili i le taua o le faamanatuga nai lo le mea sa ou i ai. Maimau pe ana ou malamalama i le faamanatuga i le auala na faamatalaina ai e Elder Jeffrey R. Holland. Sa saunoa o ia, ‘O se tasi o valaaulia taua e le mavavaeeseina mai le sauniga faamanatuga o le avea lea ma se aafiaga faaleagaga moni, se sauniga paia, se toefaafouina o le agaga.’1”
E mafai faapea ona avea le faamanatuga ma “se aafiaga faaleagaga moni, se sauniga paia, se toefaafouina o le agaga” i vaiaso taitasi?
E avea le faamanatuga ma se aafiaga faaleagaga faamalosiau pe a tatou faalogo atu i tatalo o le faamanatuga ma toe tuuto atu i a tatou feagaiga. O le faia o lenei mea, e tatau ai ona tatou naunau ia ave i o tatou luga le suafa o Iesu Keriso.2 O le ta’ua ai o lenei folafolaga, sa aoao mai ai Peresitene B. Eyring: “O lona uiga e tatau ona tatou vaai ia i tatou lava o ni Ona soo. O le a tatou faamuamua o Ia i o tatou olaga. O le a tatou mananao i mea e finagalo i ai o Ia nai lo mea tatou te mananao i ai po o mea ua aoao mai le lalolagi ia tatou mananao i ai.”3
A tatou fetagofi atu i le faamanatuga, ua tatou osifeagaiga foi ina ia “manatua pea”4 Iesu Keriso. I le po a o lei faasatauroina o Ia, sa faapotopoto mai ai e Keriso Ana Aposetolo ia te Ia ma faatulagaina le faamanatuga. Sa Ia tofitofiina le areto, faamanuia, ma fetalai atu, “Ina tago ia, ina aai; e fai lenei mea ma faamanatuga o lo’u tino ou te tuuina atu e togiola ai outou.”5 Sa sosoo ai ona Ia ave se ipu uaina, faafetai atu, ma avatu i Ana Aposetolo e inu ai, ma fetalai atu, “E faia lenei mea ma faamanatuga o lo’u toto … , ua faamaligiina mo le toatele o e talitonu i lo’u igoa.”6
Ia sa Nifae ma faapena foi i le Toefuataiga o Lana Ekalesia i aso e gata ai, sa ia toe fetalai mai e tatau ona tatou fetagofi atu i le faamanatuga e manatua ai o Ia.7
A tatou aai ma feinu i le faamanatuga, tatou te tautino atu i le Atua o le a tatou manatua pea Lona Alo i taimi uma, ae le na o le taimi puupuu o le sauniga faamanatuga. O le uiga o lenei mea o le a tatou tepa taulai atu pea i le faataitaiga ma aoaoga a le Faaola e taiala ai o tatou manatu, a tatou filifiliga, ma a tatou amioga.8
E faamanatu mai foi e le tatalo o le faamanatuga ia i tatou e tatau ona tatou “tausi i ana poloaiga.”9
Na fetalai Iesu, “Afai tou te alofa mai ia te au, ia outou tausi mai i au poloaiga.”10 O le faamanatuga tatou te maua ai se avanoa mo se iloiloga faaletagata lava ia ma se avanoa e liliu atu ai o tatou loto ma agaga i le Atua. O le usiusitai i poloaiga e aumaia ai le mana o le talalelei i o tatou olaga ma se filemu ma se faaleagaga sili atu.
O le faamanatuga e maua ai se taimi mo se aafiaga moni faaleagaga a o tatou mafaufau i le mana togiola ma le gafatia o le Faaola e ala i Lana Togiola. Sa aoaoina talu ai nei e se taitai o Tamaitai Talavou e uiga i le malosi tatou te mauaina pe a tatou taumafai e aai ma feinu ma mafaufau atoa i le faamanatuga. A o galue e faamaea se tulaga manaomia i le tusi o le Alualu i Luma o le Tagata Lava Ia, sa ia faatuina ai se sini ia taulai atu i upu o viiga ma tatalo o le faamanatuga.
O vaiaso taitasi, na te faia ai se iloiloga o ia lava i le taimi o le faamanatuga. Na te toe manatua mea sese sa ia faia, ma sa ia tuuto atu ina ia lelei atu i le vaiaso e sosoo ai. Sa ia faafetai i le mafai ona faasa’o ia mea ma faamamaina. O le toe tepa i tua i le aafiaga, sa ia fai mai ai, “Sa ou galue i le vaega o le salamo o le Togiola.”
I se tasi Aso Sa ina ua uma le iloiloina o ia lava, sa amata ona ia lagona le faanoanoa ma le le mautonu. Sa iloa e ia o loo ia faia pea lava pea ni mea sese lava e tasi, i lea vaiaso ma lea vaiaso. Ona ia maua lea o se musumusuga manino o loo ia lafoaia se vaega tele o le Togiola—le mana gafatia o Keriso. Sa galo ia te ia taimi uma sa fesoasoani ai le Faaola ia te ia ina ia avea ma tagata e tatau ona ia avea ai ma auauna atu e sili atu ma lona lava tulaga gafatia.
O le mafaufau ai i lenei mea, sa ia toe mafaufau ai i le vaiaso na muamua atu. Fai mai o ia: “O se lagona o le olioli na tafiesea ai lou faanoanoa a o ou matauina le anoanoai o avanoa ma tomai ua Ia tuuina mai ia te au. Sa ou matauina ma le agaga faafetai le tomai lea sa ia te au ina ia iloa ai manaoga o lau tama pe afai e le o iloaina. Sa ou matauina pe a ou lagona i se aso ua le mafai ona ou toe faia se isi mea, sa mafai ona ou ofo atu ni upu faamalosiau i se uo. Sa ou faaalia le onosai i se tulaga sa masani ona ou tali atu ai i se itu le lelei.”
Sa ia faaiu mai: “A o ou faafetai i le Atua mo le mana gafatia o le Faaola i lou olaga, sa ou lagona se faamoemoe sili atu i le faagasologa o le salamo lea sa ou galue ai ma sa ou tulimatai atu i le isi vaiaso e sosoo ai ma se faamoemoe faafouina.”
Sa aoao mai Elder Melvin J. Ballard i le auala e mafai ona avea ai le faamanatuga ma se aafiaga faamalolo ma faamamaina. Sa saunoa o ia:
“O ai se tagata o i tatou e le faamanualia lona agaga i upu, manatu, po o se amio, mai le isi Sapati i le isi Sapati? Tatou te faia mea ia tatou te salamo ai ma mananao ina ia faamagaloina. … O le auala e maua ai le faamagaloga o le … salamo i a tatou agasala, o atu ia i latou ua tatou agasala ai pe solitulafono ai ma tapā sa latou faamagaloga ona toe faaleleia lea i le laulau o le faamanatuga lea, pe afai tatou te salamo ma le faamaoni ma tuu i tatou lava i tulaga e tatau ai, o le a faamagaloina i tatou, ma o le a oo mai le faamalologa faaleagaga i o tatou agaga. …
“Sa saunoa Elder Ballard, “Ou au o se molimau o loo i ai se agaga o loo auai i le faataunuuina o le faamanatuga ina ia faamafanafanaina le agaga mai le ulu seia oo i vae; e te lagona lava le faamaloloina o manua o le agaga, ma le aveesea o le avega. E oo mai le mafanafana ma le fiafia i le agaga ua agavaa ma naunau moni lava ina ia ‘ai ma inu i lenei meaai faaleagaga.”11
E mafai ona faamaloloina ma toe faafouina o tatou agaga ua faamanualia e le gata ona ua faamanatu mai ia i tatou e le areto ma le vai le ositaulagaina e le Faaola o Lona tino ma le toto ae ona ua faamanatu mai foi e faatusa ia i tatou o le a avea pea o Ia ma a tatou “areto o le ola”12 ma le “vaiola.”13
Ina ua uma ona faataunuuina le faamanatuga ia sa Nifae, sa fetalai atu Iesu:
“O ia o le e ai i lenei areto ua ai o ia i lou tino mo lona agaga; o ia o le e inu i lenei uaina ua inu o ia i lou toto mo lona agaga; ma o le a le fia ai lava pe fia inu lona agaga, ae o le a faatumuina.
“O lenei, ina ua uma ona aai ma feinu le motu uma o tagata, faauta, sa tumu i latou i le Agaga.”14
O nei upu, ua aoao mai ai i tatou e Keriso e faamaloloina ma faafouina e Keriso o tatou agaga. O faamanuiaga folafolaina o le faamanatuga o le a tatou “maua pea lona Agaga e faatasi ma i [tatou].”15
Pe a ou ‘ai ma inu i le faamanatuga, ou te vaai faalemafaufau atu i nisi taimi i se atavali o loo faaali mai ai le Faaola toetu ma Ona aao o loo faaloaloa mai, e pei ua Ia saunia e talia i tatou i Lana opo agaalofa. Ou te fiafia i lenei atavali. A ou mafaufau i ai i le taimi o le faataunuuina o le faamanatuga, e siitiaina lou agaga e toetoe lava a ou lagonaina le fetalaiga a le Faaola: “Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au.”16
E avea le au Perisitua Arona ma sui o le Faaola pe a latou saunia, faamanuia, ma tufatufa atu le faamanatuga. A o faaloaloa mai e se o umiaina le perisitua lona lima e ofo mai ia i tatou ia faatusa paia, e peisea’i o loo faaloaloa mai e le Faaola Lava Ia Lona aao o le alofa mutimutivale, ma valaauliaina i tatou taitoatasi e aai ma feinu i meaalofa taua o le alofa ua faaavanoa mai e ala i Lana taulaga togiola—o meaalofa o le salamo, faamagaloga, mafanafana, ma le faamoemoe.17
O le faatele lava o lo tatou mafaufau loloto i le taua o le faamanatuga, o le tele foi lena o lona paia ma le anoa ia i tatou. O le mea lenei sa faailoa atu e se tama e 96 tausaga le matua ina ua fesili lona atalii, “Tama, aisea e te alu ai i le lotu? E le mafai ona e vaai, e le mafai ona e faalogo, e faigata ona e fealuai. Aisea e te alu ai i le lotu?” Sa tali atu le tama, “O le faamanatuga. Ou te alu e ‘ai ma inu i le faamanatuga.”
Tau ina ia taitasi i tatou ma o mai saunia i le sauniga faamanatuga ina ia maua “se aafiaga faaleagaga moni, se sauniga paia, se toefaafouina mo lo [tatou] agaga.”18
Ou te iloa o loo soifua lo tatou Tama Faalelagi ma lo tatou Faaola. Ou te faafetai mo le avanoa ua saunia e le faamanatuga ia lagona ai lo Laua alofa ma ia aai ma feinu ai i le Agaga. I le suafa o Iesu Keriso, amene.