Susū Maia i le Konafesi

Saunia e Peresitene Thomas S. Monson

A o tatou faalogologo atu, ia ootia o tatou loto ma faateleina lo tatou faatuatua.

Ou uso e ma tuafafine, ua ou fiafia lava e faafeiloai atu ia te outou i lenei konafesi maoae i le lalolagi. Ua tatou potopoto faatasi i nofoaga i le lalolagi atoa e faalogologo ma aoao mai i uso ma tuafafine o e ua tatou lagolagoina o ni Pulega Aoao ma taitai aoao o le Ekalesia. Ua latou sailia le fesoasoaniga a le lagi e faatatau i a latou savali o le a latou faasoa atu, ma ua latou lagonaina musumusuga e faatatau i mea o le a fofogaina.

O lenei konafesi ua faailoga ai le 90 tausaga o faasalalauga i le leitio o le konafesi aoao. I le konafesi ia Oketopa o le 1924, sa faasalalauina ai sauniga i luga o le leitio mo le taimi muamua lava e ala i le Leitio KSL sa umiaina e le Ekalesia. Ua faailogaina foi i lenei konafesi le 65 tausaga o faasalalauga i televise o le konafesi. I le konafesi aoao sa faia ia Oketopa 1949, sa muai faasalalauina ai sauniga i le televise i Sate Leki atoa i luga o le Televise KSL.

Tatou te faamamaluina faamanuiaga o ala o faasalalauga i nei ona po i le faatagaina ai o le faitau miliona o tagata o le Ekalesia e maimoaina pe faafofoga foi i le konafesi aoao. O sauniga o lenei faaiuga o le vaiaso o loo faasalalau atu i luga o televise, leitio, keipo, masini satelite, ma le Initoneti, e aofia ai masini feaveai.

I le ono masina ua tea talu mai le taimi mulimuli na tatou feiloai ai, sa faapaiaina ai le malumalu fou e tasi ma le tasi sa toe faapaiaina. Ia Me sa faapaiaina ai e Peresitene Dieter F. Uchtdorf le Malumalu o Fort Lauderdale Florida. Sa faia ai se fiafia matagofie faaleaganuu a le autalavou i le aso a o lumanai ai le faapaiaga. O le aso na sosoo ai, i le Aso Sa, 4 o Me, sa faapaiaina ai le malumalu i sauniga e tolu.

I le lua vaiaso talu ai sa ou maua ai le avanoa e toe faapaia ai le Maumalu o Ogden Iuta, lea sa muai faapaiaina i le 1972 e Peresitene Iosefa Filitia Samita. Sa faia foi se fiafia tele faaleaganuu i le aso a o lumanai ai le toe faapaiaga, faatasi ai ma le toatele naua o le autalavou sa auai lea sa faia ai ni faafiafiaga eseese se lua, e eseese uma tagata faafiafia i faafiafiaga taitasi. I le aotelega, e 16,000 le autalavou sa auai. Sa faia ia sauniga o le toefaapaiaga i le aso na sosoo ai, faatasi ai ma le toatele o le Usoga na auai, faapea ai ma taitai o ausilali ma le peresitene o le malumalu, o ona fesoasoani, ma o latou faletua.

O loo malosi pea le fausiaina o o tatou malumalu. O le masina fou o le a faapaiaina ai le Malumalu fou o Phoenix Arizona, ma o le tausaga fou, i le 2015, ua matou faamoemoe ai e faapaia pe toe faapaia isi malumalu e le itiiti ifo ma le lima, ma isi malumalu o loo faalagolago i le faamaeaina.

E pei ona ou ta’ua ia Aperila, a maea ona fausiaina ma faapaiaina uma malumalu ua uma ona faasilasila atu, o le a atoa ai le 170 malumalu e faaaogaina i le lalolagi atoa. Ona o loo taulai atu a matou taumafaiga i le faamaeaina o malumalu ua uma ona faasilasila atu, o lea matou te le toe faasilasilaina atu ai nisi malumalu fou i le taimi nei. Peitai, i le lumanai, pe a matou iloaina manaoga ma maua ni fanua, o le a toe faasilasila atu ai nisi malumalu faaopoopo.

O loo faaauau pea ona tuputupu ae le Ekalesia. Ua silia nei ma le 15 miliona tagata malolosi ma o loo faateleina pea le aofai. O loo agai pea i luma taumafaiga faafaifeautalai e aunoa ma le faalavelaveina. Ua silia ma le 88,000 faifeautalai o loo auauna atu, i le faasoaina atu o le savali o le talalelei i le lalolagi atoa. Matou te toe faamautu atu o le galuega faafaifeautalai o se tiute faaleperisitua, ma e matou te uunaia alii talavou uma e agavaa ma malolosi ia auauna atu. Matou te faafetai tele mo tamaitai talavou o loo auauna atu foi. O loo latou faia se saofaga iloga, e ui e le o noatia i latou i lalo o se poloaiga e auauna atu e pei o alii talavou.

Ou te valaaulia nei outou ia outou gauai atu i uso ma tuafafine o le a saunoa atu i le asō ma taeao i sauniga o la tatou konafesi. O i latou uma ua talosagaina e saunoa atu ua lagonaina se tiutetauave tele i le faia o lea mea. A o tatou faalogologo atu, ia ootia o tatou loto ma faateleina lo tatou faatuatua, ou te tatalo faamaulalo ai i le suafa o Iesu Keriso, amene.