Faaaliga Faifai Pea
Saunia e Peresitene Henry B. Eyring
Fesoasoani Muamua i le Au Peresitene Sili
O faaiuga faaletagata ma manatu faautauta o le a lē lava e maua ai tali i fesili e aupito sili ona taua i le olaga. Tatou te manaomia faaaliga mai le Atua.
O lo’u faamoemoe mo i tatou i le asō ia mafai ona tatou lagona uma le alofa ma le malamalama mai le Atua. E toatele o loo faafofoga mai i le asō o ē o lagona se mana’o faanatinati mo lena faamanuiaga o le faaaliga faaletagata lava ia mai lo tatou Tama Faalelagi alofa.
Mo peresitene o misiona, atonu e avea ma se tatalo faatauanau le iloaina pe faapefea ona uunaia se faifeautalai o loo tauivi. Mo se tama po o se tina o i ai i se nofoaga o le lagolagi na faatamaiaina e le taua, o le a avea ma se mana’o naunautai e iloa pe siitia atu lo latou aiga i le saogalemu pe faamautu ai pea i le mea o i ai. E faitau selau peresitene o siteki ma epikopo o loo tatalo i le asō ina ia iloa le auala e fesoasoani ai i le Alii e laveai se mamoe ua leiloa. Ae mo se perofeta, o le iloaina lea o le mea e finagalo le Alii ia te ia e saunoa atu ai i le Ekalesia ma i se lalolagi ua vāvāō.
Tatou te iloa uma o faaiuga faaletagata ma manatu faautauta o le a lē lava e maua ai tali i fesili e aupito sili ona taua i le olaga. Tatou te manaomia faaaliga mai le Atua. Ma e le na o se tasi se faaaliga o le a tatou manaomiaina i taimi e atuatuvale ai, ae tatou te manaomia se tafe mai faafouina faifai pea [o faaaliga]. Tatou te le manaomia na o se emo se tasi o le malamalama ma le mafanafana, ae tatou te manaomia faamanuiaga faifai pea o fesootaiga ma le Atua.
O le i ai o le Ekalesia i le taimi nei na pogai mai i se alii talavou i le iloaina sa moni. Na iloa e le taulealea o Iosefa sa le’i mafai ona ia iloa mo ia lava po o le fea o ekalesia e auai atu i ai. O lea na ia ole atu ai i le Atua e pei ona ta’u atu ia te ia e le tusi a Iakopo e mafai ona ia faia. Na faaali mai le Atua le Tama ma Lona Alo Pele i le togavao. Na Laua taliina le fesili lea na sili atu ma le mana o Iosefa e malamalama ai.
E le gata ina sa valaauina o ia e le Atua e faatuina le Ekalesia moni a Iesu Keriso, ae o le Ekalesia na toefuatai mai i ai le mana e talosaga ai le Agaga Paia ina ia mafai ona faaauau pea faaaliga mai le Atua.
Na faamatalaina e Peresitene Boyd K. Packer lena faailoga e iloa ai le Ekalesia moni i le auala lenei: “Ua faaauau pea ona tuuina mai faaaliga i le Ekalesia: o loo mauaina e le perofeta mo le Ekalesia; ae o le peresitene mo lana siteki, lana misiona, po o lana korama; o loo maua e le epikopo mo lana uarota; o loo maua e le tama mo lona aiga; faapea ai foi ona maua e tagata taitoatasi mo ia lava.”1
O lena faagasologa matagofie o faaaliga e amataina, faaiuina, ma faaauau pea pe a tatou mauaina faaaliga faaletagata lava ia. Sei o tatou avea Nifae le sili, le atalii o Liae, ma o tatou faataitaiga. Na faia e lona tama se miti. O nisi o le aiga o Nifae na manatu o le miti a Liae o se faamaoniga o le faaletonu o le mafaufau. O le miti na aofia ai se poloaiga mai le Atua mo atalii o Liae e faataunuu le tulaga lamatia tele o le toe foi atu i Ierusalema mo papatusi ia o loo i ai le afioga a le Atua ina ia mafai ona latou avea i latou i lo latou faigamalaga i le laueleele na folafolaina.
E masani ona tatou sii maia le folafolaga lototoa a Nifae ina ua faatonuina i latou e lona tama e toe foi i Ierusalema. Ua outou silafia ia upu: “O le a ou alu ma fai mea ua poloaiina e le Alii.”2
Ina ua faafofoga Liae o tautala Nifae i na upu, ua tau mai e tusitusiga paia e faapea na “fiafia tele [o ia].”3 Na fiafia o ia aua sa ia iloa na faamanuiaina Nifae i le faaaliga na faamaonia ai o le miti a lona tama o se fesootaiga moni lava mai le Atua. Sa le’i faapea atu Nifae, “O le a ou alu ma fai mea ua poloaiina ai au e lou tama.” Nai lo lena sa ia faapea atu, “O le a ou alu ma fai mea ua poloaiina e le Alii.”
Mai i o outou aafiaga i o outou lava aiga, ua outou iloa ai foi le mafuaaga na “fiafia tele” ai Liae. O lona olioli na oo mai mai le iloaina na maua e Nifae faaaliga e faamaonia ai.
E toatele matua ua faatulagaina ni tulafono faaleaiga mo le taimi e toe foi mai ai se tamaitiiti talavou i le aiga i le po. Ae mafaufau i le olioli pe a iloa e matua, e pei ona iloaina e se tasi o matua i ni nai vaiaso talu ai, e faapea o se tamaitiiti na faatoa alu ese ma le aiga [ma nofo na o ia], e le gata na ia faatulagaina se taimi mo ia lava e tatau ai ona foi i le fale ae na tausia foi le Sapati e pei ona sa aoaoina ai o ia i le aiga. O faaaliga a se matua e i ai sona aafiaga tumau i faaaliga patino o loo faaauau pea i se tamaitiiti.
Masalo pe na malamalama lou tina i lena mataupu faavae o faaaliga. A o avea au ma se alii talavou, ou te tapunia ma le lemu tele le faitotoa i tua pe a ou tuai atu i le fale i le afiafi. E ao ona ou pasia le potu moe o lou tina ina ia oo atu ai i lou potu. E ui i lou tolotolo filemu, o le taimi lava ou te oo atu ai i lona faitotoa e le’i tapunia atoa, ou te faalogoina ma le lemu lou igoa, “Hal, sau i totonu mo sina taimi.”
Ou te alu i totonu ma nofo i le pito o lona moega. E pogisa le potu. Afai na e faafofoga i ai, e te manatu sa avea na o se talanoaga faaleuo e uiga i le olaga. Ae e oo mai i lenei aso, e mafai ona ou manatua ma le manino mea na ia ta’u maia faatasi ai ma le mana e tasi ou te lagonaina pe a ou faitau i le pepa o lou faamanuiaga faapeteriaka.
Ou te le’i iloaina le mea na ia talosaga i ai i le tatalo a o ia faatalitali mo au i na po. Ou te manatu atonu na avea o se vaega mo lou saogalemu. Ae ou te mautinoa na ia tatalo i le ala e tasi e tatalo ai se peteriaka a o lei tuuina atu e ia se faamanuiaga. E tatalo o ia ina ia oo atu ana upu o ni afioga a le Atua i lē e taliaina, ae le o ni ana upu. O tatalo a lou tina mo lena faamanuiaga sa taliina i ou luga. O loo i ai o ia i le lalolagi o agaga ma ua silia nei ma le 40 tausaga. Ou te mautinoa ua ia fiafia tele ua faamanuiaina a’u aua na ou iloaina poloaiga a le Atua i mea na ia tau maia ia te au. Ma ua ou taumafai e alu ma faia e pei ona ia faamoemoeina o le a ou faia.
Ua ou vaaia lena lava vavega e tasi o faaaliga faifai pea i peresitene o siteki ma epikopo i le Ekalesia. Ma, e pei ona moni foi i faaaliga i taitai faaleaiga, e faatoa taua le faaaliga pe afai e taitai atu tagata ina ia maua faaaliga e faamaonia ai o le finagalo lea o le Atua.
Sa ou vaaia lena vavega o faaaliga ina ua mavae le faatamaiaga o le malepe o le Faatanoavai Tele o Teton i Idaho i le 1976. E toatele outou e silafiaina le tala o le mea na tupu. Ae o le faataitaiga o faaaliga faifai pea lea na mauaina e se peresitene o se siteki e mafai ona faamanuiaina ai i tatou uma i aso o i luma atu.
Na aveesea le faitau afe o tagata i le mavae ai o le faatamaiaina o o latou fale. Na nafa se peresitene o le siteki, o se faifaatoaga, i le lotoifale ma le taitaiga o taumafaiga laveai. Na ou i ai i totonu o se potuaoga a le Kolisi o Ricks i ni nai aso talu le faalavelave. Sa taunuu atu se taitai mai le matagaluega a le malo mo faalavelave. O ia ma ona alii ofisa lagolago na o mai i le potu tele lea na faapotopoto ai e le peresitene o le siteki ia epikopo ma e oo lava i nisi o faafeagaiga o isi tapuaiga i le lotoifale. Sa ou i ai iina aua o le toatele o tagata na sao mai na tausia ma faanonofo i le lotoa o le kolisi lea sa avea ai au ma peresitene.
Ina ua amata le fonotaga, na tu i luga le sui mai le malo mo faalavelave ma amata ona saunoa atu ma le leo malosi i mea e manaomia ona fai. Ina ua maea ona ia lisiina galuega taitasi e lima pe ono na ia fa mai na taua, na tali atu ma le leo lemu le peresitene o le siteki, “Ua uma ona matou faia mea na.”
I le mavae ai o ni nai minute, na faapea atu le alii mai le malo mo faalavelave, “Ou te manatu o le a ou nofo i lalo ma vaavaai mo sina taimi.” Ona faalogologo lea o ia ma ana ofisa lagolago a o lipoti atu e epikopo ma peresitene o korama mea na latou faia. Na latou faamatalaina le taitaiga na latou maua ma mulimuli i ai mai i o latou taitai. Na latou talanoa e uiga i mea na musuia i latou e fai a o latou faataunuuina faatonuga e saili ia maua aiga ma fesoasoani atu ia i latou. Sa leva le afiafi. Na latou vaivai tele e faaali atu le tele o lagona faamomoiloto sei vagana ai lo latou alolofa mo tagata.
Na tuu atu e le peresitene o le siteki ni nai faatonuga mulimuli i epikopo, ona ia faasilasila atu lea o se taimi mo le isi fonotaga faalelipoti i le taeao po e sosoo ai.
O le taeao na sosoo ai na taunuu ai le taitai o le vaega faalemalo i le 20 minute a o lei amataina le fonotaga faalelipoti ma galuega faatino sa faatulagaina. Sa ou tu latalata ane. Na ou faalogo atu o ia musumusu atu i le peresitene o le siteki, “Peresitene, o le a se mea e te finagalo matou te faia ma la’u vaega?”
O le mea na vaaia e lena alii ua ou vaaia foi i le tele o taimi o le faanoanoa ma le tofotofoina i le lalolagi atoa. Na sa’o lava Peresitene Packer. E oo mai faaaliga faifai pea i peresitene o siteki ina ia siitia ai i latou i luga a’e o lo latou poto ma tomai. Ma, e le gata i lena, e tuuina atu e le Atua ia i latou ua taitaia e le peresitene se molimau e faamaonia ai o ana poloaiga e mai le Atua e ala mai i le Agaga Paia i se tagata le atoatoa.
Ua faamanuiaina au e valaauina e mulimuli i taitai musuia i le tele o taimi o lou olaga. A o avea ma se alii talavou, na valaauina au e avea ma fesoasoani i le peresitene o le korama a toeaina. Na mulimuli ane avea au ma se fesoasoani i peresitene o itu e toalua, ma i se Epikopo Pulefaamalumalu o le Ekalesia, o se uso o le Korama a Aposetolo e Toasefululua, ma o se fesoasoani i Peresitene e toalua o le Ekalesia. Ua ou vaai i faaaliga ua tuuina atu ia i latou ma faamaonia atu i ē e mulimuli ia i latou.
O lena faaaliga patino o le taliaina, lea tatou te mananao uma i ai, e le faigofie ona maua, pe faigofie foi ona oo mai e pei ona ole atu ai. Na tuuina mai e le Alii taiala nei ina ia fesoasoani ia i tatou i le mauaina o ia ituaiga o molimau mai le Atua. O se taiala mo soo se tasi o sailia faaaliga faaletagata lava ia e pei ona tatau ai ia i tatou uma.
“Ia tuu foi lou loto ia tumu i le alofa mama i tagata uma, ma i le auaiga o le faatuatua, ma ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi.
“O le a avea le Agaga Paia ma āu soa e le aunoa.”4
O le savali ua ou maua mai lena [mau] e mo i tatou uma. Aua nei e manatu mama i lagona o le alofa e te mauaina mo le perofeta a le Atua. Po o fea lava ou te alu i ai i le Ekalesia, po o ai lava le perofeta i lena taimi, o le a fesili mai tagata o le ekalesia, “Pe a e taunuu i le laumua o le Ekalesia, e mafai ona e ta’u atu i le perofeta lo matou alolofa tele mo ia?”
E sili atu lena mea nai lo le faamemelo atu i se tagata tautaua po o lagona tatou te mauaina i nisi taimi ona o lo tatou faamemelo fua i tagata lauiloa. O se meaalofa mai le Atua. Faatasi ai ma lena [meaalofa] o le a e mauaina ma le faigofie le meaalofa o le faaaliga e faamaonia [ai se poloaiga] pe a ia saunoa atu i lona tofiga o le perofeta a le Alii. O le alofa e te lagonaina o le alofa lea ua i ai i le Alii mo soo se tasi ua avea ma Ona fofoga.
E le faigofie le lagonaina pea o lena mea aua e masani ona talosaga le Alii i Ana perofeta e tuuina atu le fautuaga lea e faigata mo tagata ona taliaina. O le a taumafai le fili o o tatou agaga e taitai atu i tatou ia faatausuai ma masalosalo i le valaauga o le perofeta mai le Atua.
Ua ou vaai i le auala e mafai ai e le Agaga Paia ona musuia se loto ua faamaluluina ina ia puipuia se soo lotomaualalo o Iesu Keriso i faaaliga e faamaonia ai.
Na auina atu a’u e le perofeta ina ia tuuina atu le mana paia o faamauga i luga o se alii i se aai laitiiti mamao lava. E na o le perofeta a le Atua o loo i ai ki e filifili ai le tagata e mauaina le mana paia lea na tuuina atu e le Alii ia Peteru, le Aposetolo sinia. Na ou mauaina lena lava mana e tasi o faamauga, ae ua na o le faatonuga lava a le Peresitene o le Ekalesia e mafai ai ona ou tuuina atu i se isi tagata.
O lea, i se potu o se falesa e mamao mai Sate Leki, na ou tuu ai ou lima i luga o le ulu o lenei alii na filifilia e le perofeta ina ia mauaina le mana faamau. O ona aao na faaalia ai ni faailoga o le olaga atoa o le galueaiina o le eleele mo se tupe itiiti. Sa alala lona faletua faatinoiti i ona talaane. Na ia faaalia foi ni faailoga o tausaga o le galue malosi faatasi ma si ana tane.
Na ou tau atu upu na tuuina mai e le perofeta: “I lalo o le pule faamatuu ma le tiutetauave mai,” ona sosoo ai lea ma suafa o le perofeta, “o lē o loo umiaina ki uma o le perisitua i luga o le lalolagi i lenei taimi, ou te faaee atu ai le mana o faamauga i luga,” ma ou tuuina atu le suafa o le tagata ma le igoa o le malumalu o le a ia auauna atu ai o se faifaamauga.
Na tafe ifo loimata i ona alafau. Na ou vaaia le tagi foi o lona faletua. Na ou faatalitali mo i laua ina ia toe maua le toamalie. Na tu i luga le faletua ma savali mai ia te au. Na ia tepa mai i luga ona faapea mai lea ma le atuatuvale, ua ia fiafia ae ua ia faanoanoa foi. Sa ia faapea mai sa ia fiafia tele e alu i le malumalu faatasi ma lona toalua, ae o le taimi nei ua ia lagona e le tatau ona ia alu faatasi ma ia aua ua filifilia o ia e le Atua mo se faatuatuaga mamalu ma paia. Ona ia faapea mai lea o ona lagona o le le agavaa e avea ma ana soa i le malumalu na oo mai ona e le mafai ona ia faitau pe tusitusi foi.
Na ou faamautinoa atu ia te ia o le a faamamaluina lona toalua i lona auai atu faatasi ma ia i le malumalu ona o lona mana maoae faaleagaga. Faatasi ai ma sina ou malamalama teisi i lana gagana, na ou tau atu ai ia te ia na faaali mai e le Atua ia te ia ni mea e sili atu nai lo o aoaoga uma faalelalolagi.
Sa ia iloa e ala i le meaalofa o le Agaga na tuuina mai ai e le Atua e ala i Lana perofeta se faatuatuaga faalelagi i le tane na ia alofa i ai. Sa ia iloaina mo ia lava o ki e tuuina atu ai lena mana faamau na umiaina e se tamalii na te le’i vaai muamua lava i ai ma iloaina patino, o le perofeta soifua a le Atua. Sa ia iloaina, e aunoa ma le tauina atu ia te ia e se molimau ola, na tatalo le perofeta e uiga i le suafa o lana tane. Sa ia iloaina mo ia lava na tali mai le Atua.
Sa ia iloa foi o sauniga o le a faatinoina e lana tane o le a fusifusia ai tagata mo le faavavau i le malo selesitila. Na faamautinoa atu i lona mafaufau ma le loto o le folafolaga na faia e le Alii ia Peteru o loo faaauau pea i le Ekalesia: “O se mea foi e te fusifusia i le lalolagi, e fusifusia foi lea i le lagi.”5 Sa ia iloaina lena mea mo ia lava, e ala i faaaliga, mai le Atua.
Se’i o tatou toe foi atu i la tatou vaega amata. “O loo faaauau pea faaaliga i le Ekalesia: o loo maua e le perofeta faaaliga mo le Ekalesia; o le peresitene mo lana siteki, lana misiona, po o lana korama; o loo maua e le epikopo mo lana uarota; o le tama mo lona aiga; faapea foi le tagata mo ia lava.”6
Ou te tuuina atu lau molimau e moni. E faafofoga le Tama Faalelagi i a outou tatalo. E alofa o Ia ia te outou. Na te silafia o o outou igoa. O Iesu o le Keriso, o le Alo o le Atua, ma lo tatou Togiola. E alofa o Ia ia te outou e sili atu i lo outou tomai e malamalama ai.
E sasaa mai e le Alii faaaliga, e ala i le Agaga Paia, i luga o Ana fanau. E fetalai o Ia i Lana perofeta i le fogaeleele, i le taimi nei o Thomas S. Monson. Ou te molimau atu o loo ia umiaina ma faaaogaina ki uma o le perisitua i le lalolagi.
A o e faafofoga i lenei konafesi i saunoaga a i latou ua valaauina e le Atua e saunoa atu mo Ia, ou te tatalo ina ia e maua le faaaliga e faamaonia ai o loo e manaomia ona toe maua lou auala i luga o le faigamalaga i le aiga, ina ia mau faatasi ma Ia i totonu o se aiga ua faamauina e faavavau. I le suafa paia o Iesu Keriso, amene.