“Savali Musuia o Aso Mamalu e Lua”

“Ua tatou lagonaina savali musuia i nei aso mamalu e lua,” na saunoa mai ai Peresitene Thomas S. Monson i le faaiuga o le Konafesi Aoao lona 184 Faaleafatausaga i le Aso Sa, 5 Oketopa, 2014.

Na aofia i na savali le taua o le atiinaeina o se molimau lea o le a mafai ai ona e onosaia tulaga uma; mulimuli i le ala a le Faaola ma avea ma se soo tuuto; mulimuli ma lagolagoina ia perofeta; faaaoga ma le atamai le faitalia; ma faia o le aiga e avea o se nofoaga o le alofa, saogalemu, faataitaiga, ma le aoaoina o le talalelei.

I lana saunoaga amata i le Aso Toonai, na faailoa mai ai e Peresitene Monson o loo faaauau pea ona tuputupu ae le Ekalesia. “Ua silia nei ma le 15 miliona tagata malolosi ma o loo faateleina pea le aofai,” na saunoa ai Peresitene Monson. “O loo agai pea i luma a tatou taumafaiga faafaifeautalai e aunoa ma le faalavelaveina. Ua silia ma le 88,000 faifeautalai o loo auauna atu, i le faasoaina atu o le savali o le talalelei i le lalolagi atoa.”

I le sauniga o le afiafi o le Aso Toonai, sa faamalolo ai ma le faamamaluina ia Elder Carlos H. Amado ma Elder William R. Walker o le Korama Muamua a Fitugafulu. O Elder Arayik V. Minasyan ma Elder Gvido Senkans sa faamalolo mai o ni Fitugafulu Eria.

O le taimi muamua lenei i le konafesi aoao, ua saunoa ai nisi o failauga e le sa latou gagana autu le Igilisi i a latou lava gagana. O Elder Chi Hong (Sam) Wong na saunoa mai i le faaKenitonisia, o Elder Eduardo Gavarret ma Elder Hugo E. Martinez i le faaSipaniolo, ma Elder Carlos A. Godoy i le faaPotukale.

Na faatumulia e le motu o tagata le Maota Autu mo Konafesi e 21,000-nofoa ma isi eria i le Lotoa o le Malumalu i le Aai o Sate Leki, Iuta, ISA, mo sauniga taitasi o le konafesi, lea sa faaliliuina i gagana e silia ma le 90 ma faasalalauina i le silia ma le 170 atunuu ma teritori. E le gata i lea, sa maua foi taualumaga [o le konafesi] i luga o televise, leitio, satelite, ma le Initoneti, e aofia ai ma masini feaveai. O lenei konafesi na faailogaina ai le 90 tausaga o faasalalauga i leitio ma le 65 tausaga o faasalalauga i televise o le konafesi.

Na saunoa Peresitene Thomas S. Monson i le taimi o le sauniga o le afiafi o le Aso Sa o le konafesi aoao.