Laveai i le Lotogatasi

Saunia e Elder Chi Hong (Sam) Wong

O Le Fitugafulu

Ina ia mafai ona fesoasoani atu i le Faaola, e tatau ona tatou galulue faatasi i le lotogatasi ma le aufaatasi. E taua tagata uma, tofiga uma, ma valaauga uma.

E masani ona faalogo atu ia Peresitene Thomas S. Monson o saunoa mai, “Aapa atu e laveai.”¹ Ou te mafaufau i se tala i le Feagaiga Fou. O se faataitaiga tonu lava lea o le auala e mafai ai e tagata ma faifeautalai ona galulue faatasi i le lotogatasi e ala i le aapa atu o aufono a uarota ma laveai mai. O le tala o loo maua i le Mareko 2:1–5. Ou te iloa o aafiaga ia sa faaaoga e Iesu e aoao ai ia i tatou ia nisi o aoaoga ma mataupu faavae sa tele lava ina musuia ma faigofie ona malamalama ai.

O se tasi o tagata o i lenei tala o se alii e maua i le supa, o se tagata e le mafai ona minoi e aunoa ma se fesoasoani. Na o le mafai ona nofo lenei tagata i le fale, ma faatalitali mo se fesoasoani.

I lo tatou vaitaimi, atonu e tupu faapenei. E toafa tagata sa faataunuuina se tofiga mai le latou epikopo e o e asiasi, i se fale o se alii e maua i le ma’i o le supa. E mafai ona ou iloa atu o se tasi o i latou e sau mai le Aualofa, e tasi mai le korama a toeaina, tasi mai le Perisitua Arona, ma le tagata mulimuli, o se faifeautalai faamisiona e toatasi. I se fono a le uarota lata mai nei, ina ua uma ona fefautuaai faatasi e uiga i manaoga i totonu o le uarota, sa tuuina atu e le epikopo ni tofiga “laveai”. Sa tofia nei tagata e toafa e fesoasoani i lenei alii o mafatia i le supa. E le mafai ona latou faatali seia sau lava ia i le lotu. E tatau ona latou o atu i lona fale ma asia o ia. E tatau ona latou sailiina o ia, ma sa latou o ai. Sa aumai le tagata ia Iesu.

“A ua o mai nisi ia te ia, ua au mai le tagata supa, o loo fataina mai e le toafa” (Mareko 2:3).

Peitai, sa tumu tele le potu. Sa le mafai ona latou ofi mai i le faitotoa. Ou te mautinoa sa latou taumafai mea uma na mafai ona latou mafaufau i ai, ae sa le mafai ona ofi mai i totonu. E lei ogatasi mea na tutupu e pei ona sa latou fuafuaina. Sa i ai ni faafitauli i le ala o le “laveai.” Ae latou te lei toilalo ai. Latou te lei tuulafoaia le tagata supa i le faitotoa. Sa latou fefautuaai faatasi i le isi mea e fai—pe faapefea ona latou aumaia le tagata ia Iesu Keriso mo le faamalologa. O le galuega o le fesoasoani atu ia Iesu Keriso i le laveaia o agaga, ia i latou lava, e lei faigata tele. Sa latou faia se fuafuaga—e lei faigofie, ae sa latou faataunuuina.

“Ua le mafai foi i latou ona faalatalata atu ia te ia, aua le motu o tagata, ona latou tatala lea o le ufi o le fale sa i ai o ia: ua faasosofa i ai, ona latou tuutuu ifo ai lea o le moega o taoto ai le supa” (Mareko 2:4).

Sa latou aveina o ia i luga o le taualuga. Ma le mafaufau e leai se faasitepu i fafo latou te feaei ai, o le a tele foi se taimi e alu e ave uma ai tagata i le tauluga. Ou te manatu atonu sa tupu i le auala lenei: semanu e a’e muamua le alii talavou mai lana uarota i le taualuga. Aua e laitiiti ma e malosi tele, e le faigata tele mo ia. E tatau ona malosi le uunai mai lalo o lana soa o faiaoga o aiga mai le korama a toeaina ma le faifeautalai faamisiona umi ma malosi. O le tuafafine o le Aualofa e faamanatu ia i latou ina ia faaeteete ma avatu ni upu o le faamalosiauga. Ona aveese lea e alii o ufi o le fale ao faaauau pea ona faamafanafana atu le tuafafine i le tagata ao ia faatalitali e faamaloloina—ina ia mafai ona minoi lava ia ma ia saoloto.

O lenei tofiga laveai e manaomia tagata uma ina ia galulue faatasi. I le taimi sili ona taua, o le a faaaoga ai se faatulagaga mataalia ina ia tuutuu ifo i lalo le tagata supa mai le taualuga. E tatau ona galulue faatasi ma le lotogatasi tagata e toafa. E le tatau ona i ai se feeseeseaiga ia i latou e toafa. E tatau ona latou tuutuu ifo i lalo le tagata supa i le tulaga lava e tasi. Afai ae vave ona faamaamulu e se tasi le maea nai lo le isi toatolu, o le a pau ese le tagata mai le moega. E le mafai ona ia taofia ia lava ona o lona tulaga vaivai.

Ina ia mafai ona fesoasoani atu i le Faaola, e tatau ona tatou galulue faatasi i le lotogatasi ma le ogatasi. E taua tagata uma, tofiga uma, ma valaauga uma. E tatau ona tatou tutufaatasi i lo tatou Alii o Iesu Keriso.

Na iu lava ina taoto le tagata supa i luma o Iesu. “Ua silafia e Iesu lo latou faatuatua, ona fetalai atu lea o ia i le supa, Lo’u atalii e, ua faamagaloina au agasala” (Mareko 2:5). Sa faaali e Iesu le alofa mutimutivale ia te ia ma faamaloloina o ia—e le na o le faaletino ae faapea foi i le faaleagaga: “Atalii e, ua faamagaloina au agasala.” Pe le matagofie ea lena mea? Pe tatou te le mananao ea ia tupu lena foi mea ia i tatou? Ia te au lava ia, ioe.

O tatou iloa ea se tasi i o tatou olaga o mafatia i se supa faaleagaga, se tasi ua le mafai ona toe foi mai na o ia i le Ekalesia? E mafai ona avea o ia o se tasi o a tatou fanau, se tasi o o tatou matua, se toalua, po o se uo.

Faatasi ai ma lo toatele naua o faifeautalai faamisiona o loo avanoa i iunite taitasi o le Ekalesia, o se tulaga atamai mo epikopo ma peresitene o paranesi le faaaoga lelei o a latou aunofo a uarota ma paranesi. E mafai ona valaaulia e epikopo tagata taitasi o le aufono a le uarota e o mai ma se lisi o igoa o i latou o e atonu o manaomia se fesoasoani. O le a fefautuaai faatasi ma le mataalia ia tagata o le aufono a le uarota i auala sili latou te fesoasoani atu ai. O le a faalogologo ma le mataalia ia epikopo i manatu ma faia ni tofiga.

O faifeautalai faamisiona o ni punaoa sili lea i totonu o uarota mo nei taumafaiga laveai. E laiti i latou ma e tumu i le malosi. Latou te fiafia ina ia maua se lisi o igoa patino e galulue ai. Latou te fiafia e galulue faatasi ma tagata o le uarota. Latou te iloa o avanoa sili nei mo i latou e sailiili ai. Latou te tuuto atu i le faatulagaina o le malo o le Alii. Ua ia i latou se molimau malosi o le a avea atili i latou faapei o Keriso ao latou auai i nei taumafaiga laveai.

I le faaiuga, sei ou faasoa atu ia te outou se tasi o oa natia o loo maua i lenei tala faatusipaia. O loo i ai i le fuaiupu e 5: “Ua silafia e Iesu lo latou faatuatua” (faaopoopo le faamamafa). Ou te lei iloaina lenei mea i le tuanai—lo latou faatuatua. O le a aafia foi i le tuufaatasiga o le faatuatua le soifua laulelei o isi.

O ai na tagata ia na ta’ua e Iesu? E mafai ona aofia ai le toafa o e na fataina le tagata supa, o le tagata supa lava ia, tagata o e na tatalo mo ia, ma i latou o e na i ai iina na faalogologo i le talaiga a Iesu ma vivii lemu i o latou loto mo le vavega o le a vave ona oo mai. E mafai foi ona aofia ai se toalua, se matua, se atalii po o se afafine, se faifeautalai, se peresitene o le korama, se peresitene o le Aualofa, se epikopo, ma se uo mamae. E mafai ona tatou fesoasoani uma i le tasi ma le isi. E tatau ona tatou auai ma le naunautai e le aunoa e saili ina ia laveai mai i latou e i ai manaoga.

Ou te molimau atu o Iesu Keriso o se Atua o vavega. E alofa Iesu Keriso ia i tatou uma ma e i ai le mana e laveai ai ma faamaloloina, i le faaletino ma le faaleagaga. A tatou fesoasoani ia te Ia i Lana misiona o le laveaiina o agaga, o le a laveaiina foi i tatou i le faagasologa. Ou te molimau atu ai i Lona suafa paia, o Iesu Keriso, amene.