Nofo i totonu o le Vaa ma Pipiimau!
Saunia e Elder M. Russell Ballard
O Le Korama a Aposetolo e Toasefululua
Afai tatou te faatumauina la tatou taulaiga i le Alii, ua folafola mai ia i tatou se faamanuiaga e le mafaatusaliaina.
Talu ai nei, sa ave ai e sa’u uo sona atalii i se folauga i lalo i le Vaitafe o Kolorato e oso atu i le itu tatafe o le āfu o Cataract Canyon, i le itu i saute o Iuta. Ua lauiloa le itu tatafe lea i lona sou ma le aave e 14 maila (23 km) le umi lea e mafai lava ona matuai lamatia.
I sauniuniga mo lea folauga mata’ina, sa la iloiloina ai ma le toto’a le uepisaite a le National Park Service, lea o loo i ai faamatalaga taua e uiga i sauniuniga a le tagata lava ia atoa ai ma tulaga lamatia masani e lē mailoa.
I le amataga o le malaga, sa faamalamalama atu i ai e se tasi o taiala atamai ni faatonuga taua mo le saogalemu, sa faamamafaina ai ni tulafono se tolu ia o le a faamautinoa ai le saogalemu o le malaga i vaega tatafe ma sou. “Tulafono muamua: nofo i totonu o le vaa! Tulafono lona lua: ia fai se ofufaaola i taimi uma! Tulafono lona tolu: ia pipiimau uma lima e lua i taimi uma!” Ona ia faapea mai lea, faatasi ai ma nisi faamamafa faaopoopo, “Ae o le mea sili o mea uma, ia manatua le tulafono muamua: nofo i totonu o le vaa!”
O lenei folauga ua faamanatu mai ai ia te au la tatou malaga faaletino. O le toatele o i tatou e oo i vaitau i o tatou olaga tatou te talisapaia ai le malū ma le filemu o le olaga. I isi taimi, tatou te fetaiai ai ma le tatafe o le vai lea e faatusatusa atu i le sou o loo i ai i le āfu e 14 maila le umi i Cataract Canyon—o luitau e mafai ona aofia ai faafitauli o le soifua maloloina faaletino ma faalemafaufau, o le maliu o sē pele, o miti ma faamoemoega lē taulau, ma—mo nisi—e oo lava i se faafitauli o le faatuatua pe a fetaiai ma faafitauli o le olaga, fesili, ma masalosaloga.
Ua saunia e le Alii i Lona agalelei se fesoasoani, e aofia ai se vaa, ni sapalai taua e pei o ofufaaola, ma ni tagata taiala atamamai latou te tuuina mai le taitaiga ma faatonuga mo le saogalemu e fesoasoani ai ia i tatou ia sao atu i lo tatou vaitafe o le olaga e tau atu i lo tatou taunuuga mulimuli.
Sei o tatou mafaufau i le tulafono muamua: “nofo i totonu o le vaa”!
Sa masani lava ona faaaoga e Peresitene Polika Iaga “le Vaa Tuai o Siona” e fai ma faatusa o Le Ekalesia a Iesu Keriso o le Au Paia oAso e Gata Ai.
Sa ia saunoa i se tasi taimi: “Ua tatou i ai i le ogatotonu o le vasa. A oo mai faafitauli, ma e faapei ona faapea mai seila, ua ia galue ma le malosi. ‘O le a ou le nofo iinei,’ ua fai mai ai se tasi; ‘Ou te le talitonu o le “Vaa lenei o Siona”. ‘Ae o loo tatou i ai i le ogatotonu o le vasa.’ ‘Ou te le popole, ou te le nofo iinei.’ Ua tatala le peleue, ona ia oso lea i lalo. Mata e le malemo o ia? Ioe. E faapena i latou o e o ese mai lenei Ekalesia. O le ‘Vaa Tuai o Siona,’ e ao ona tatou nonofo ai.”1
I se isi taimi, sa saunoa atu ai Peresitene Iaga e faapea o loo popole foi o ia i tagata ua leiloa lo latou ala ina ua faamanuiaina i latou—a o lelei lena o le olaga: “O le taimi o le malū, pe a folau atu le vaa tuai o Siona i se sau mālū, [ma] pe a filemu mea uma i luga o le vaa, e fia o atu ai nisi o uso i tamai vaa laiti e fai sina … ‘au’au, ma o nisi e malelelmo ai, o isi e se ese atu, ae o isi e toe foi mai i luga o le vaa. Sei o tatou nonofo pea i le vaa tuai o le a ia avatua i tatou ma le [saogalemu] i le uafu; e le manaomia ona e popole.”2
Ma le mea mulimuli, sa faamanatu mai e Peresitene Iaga i le Au Paia: “O loo tatou i ai i luga o le vaa tuai o Siona. … o loo i ai le [Atua] i le foeuli, ma o le a i ai lava iina. … O loo lelei mea uma, pepese Aleluia; aua o loo iinei le Alii. Na te faatonu mai, taiala ma taitai. Afai o le a i ai le talitonuga atoa o tagata i lo latou Atua, ma lē lafoaia a latou feagaiga, po o lo latou Atua, o le a Ia taitai i tatou i le ala sa’o.”3
E tusa ai ma luitau o loo tatou feagai ai i aso nei, e faapefea ona tatou nonofo i luga o le Vaa Tuai o Siona?
O le auala lenei. E manaomia ona tatou lagonaina se liuaina faifai pea e ala i le faateleina o lo tatou faatuatua ia Iesu Keriso ma lo tatou faamaoni i Lana talalelei i o tatou olaga atoa—e le na o le faatasi, ae ia faifai soo. Sa fesili Alema, “Ma o lenei faauta, ou te fai atu ia te outou, ou uso e, afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?”4
O tagata taiala atamamai o aso nei e mafai ona faatatau i aposetolo ma perofeta o le Ekalesia ma taitai perisitua musuia ma taitai o ausilali i le lotoifale. Latou te fesoasoani ia i tatou ia taunuu ma le saogalemu i lo tatou taunuuga faaiu.
Talu ai nei sa ou lauga ai i le semina mo peresitene fou o misiona ma fautuaina nei taitai:
“Ia faatumau le taulaiga a le misiona i taitai o le Ekalesia. … O le a lē mafai lava … ona matou taitaiseseina [outou].
“Ma a outou aoao atu a outou faifeautalai ia faataulai mai la latou vaai ia i tatou o taitai, aoao i latou ia aua lava nei mulimuli atu ia i latou e manatu e sili atu lo latou iloa i le auala e taitai ai mataupu a le Ekalesia i lo le … Tama Faalelagi ma le Alii o Iesu Keriso” e ala i taitai perisitua o loo i ai ki e pulefaamalumalu ai.
“Ua ou iloaina i lau galuega o i latou e faasolo ina leiloloa [ma] fenumiai e masani lava o i latou ia e tele ina … galo ia i latou a saunoa loa le Au Peresitene Sili ma le Korama a Aposetolo e Toasefululua i se leo autasi, o le siufofoga lava lea o le Alii mo lena taimi. Ua faamanatu mai e le Alii ia i tatou, ‘Pe i lo’u lava leo po o i le leo o a’u auauna, ua tutusa lava’ [MF&F 1:38].”5
I se isi faaupuga, latou te tuua le Vaa Tuai o Siona—latou te pauu ese; latou te liliuese. O le mea e faanoanoa ai, e tele lava ina latou oo i taunuuga mo se taimi puupuu ma mulimuli ane ai oo i taunuuga sa lei faamoemoeina mo se taimi umi, e le gata mo i latou lava ae faapena foi mo o latou aiga.
O o tatou taitai faale-Ekalesia i le lotoifale, e pei foi i latou o tagata taiala atamamai, sa aoaoina e aafiaga o le olaga; sa aotauina ma fautuaina e aposetolo ma perofeta ma isi taitai o le Ekalesia; ae o le mea sili ona taua, sa aoaoina patino e le Alii Lava Ia.
I se tasi taimi i lenei tausaga, sa ou lauga ai i le autalavou matutua o le Ekalesia i le faasalalauga o le faigalotu a le OAE ia Me. Sa ou fai atu:
“Ua ou faalogo e manatu nisi tagata e le iloa e taitai o le Ekalesia le mea moni o loo tutupu i le lalolagi. O le mea e galo ia i latou, o i matou o alii ma tamaitai ua lava le poto masani, ma ua matou ola i le tele o nofoaga ma galulue faatasi ma le tele o tagata mai tulaga eseese. O a matou tofiga faale-Ekalesia o i ai nei matou te malaga ai i le lalolagi atoa, lea matou te feiloai ai ma taitai faaupufai, faalelotu, faapisinisi, ma taitai o galuega alofa i le lalolagi. E ui ina matou asiasi atu i le Maota Paepae i Uosigitone D.C. faapea ai ma taitai o malo [ma isi lotu] i le lalolagi atoa, ae ua matou asiasi atu foi i [aiga ma tagata] sili ona limavaivai i le lalolagi. …
“A outou mafaufau loloto i o matou olaga ma auaunaga, o le a outou ioeina lava ua matou vaaia ma tofo i le lalolagi i auala ua oo foi i ai isi. O le a outou iloaina e tele atu mea o loo tutupu ua matou vaaia i le lalolagi i lo le toatele o isi tagata. …
“… O loo i ai se mea e uiga i le atamai o le tagata toatasi ma le atamai tuufaatasi o [taitai o le Ekalesia] ia e tatau ona outou maua ai sina mafanafana. Ua matou oo uma i ai, e aofia ai taunuuga o tulafono ma aiaiga faavae eseese faalemalo, faanoanoaga, faalavelave, ma maliu i o tatou lava aiga. E le o tāvavaeeseina i matou mai i o outou olaga.”6
Faatasi ai ma le tulafono muamua e pei ona ou faaaogaina, ia manatua le tulafono lona lua ma le tolu: ia faia se ofufaaola i taimi uma, ma pipiimau uma lima e lua. O fetalaiga a le Alii, o loo maua i tusitusiga paia ma aoaoga a aposetolo ma perofeta, ua Latou aumaia se fautuaga ma le taitaiga e faapea, a mulimulitaia, o le a avea o se ofufaaola faaleagaga ma o le a fesoasoani ia i tatou ia iloa ai le auala e pipiimau ai i lima uma e lua.
E manaomia ona avea i tatou e faapei o atalii o Mosaea o e na “malolosi i le malamalama o le upumoni.” E mafai ona tatou avea ma ni alii ma ni tamaitai “mafaufau lelei.” E na o le pau le mea e mafai ai ona ausiaina lenei mea o lo tatou “suesue [lea] i tusitusiga paia ma le filiga, ina ia [tatou] iloa le afioga a le Atua.”7
I le suesueina ai o tusitusiga paia ma upu a aposetolo ma perofeta ua mavae ma onapo nei, e tatau ai ona tatou taulai atu i le suesueina, ola ai, ma le fiafia i le aoaoga faavae a Keriso.
E faaopoopo atu i le atiaeina o mausa o le faitauina o tusitusiga paia a le tagata lava ia, e manaomia ai ona tatou avea e pei o atalii o Mosaea ma tuu atu i tatou lava “i le tatalo tele ma anapogi.”8
E foliga mai o mea nei e le faigofie ona fuatiaina e matua taua lava. Ia faatumau le taulaiga i nei mea faigofie ma aloese mai mea faalavefau.
E pei ona ou iloaina tagata e le o nonofo i totonu o le vaa ma e le o pipiimau foi o latou lima uma e lua i taimi o tofotofoga ma faafitauli po o e foi e le o nonofo i totonu o le vaa i taimi o le malū o le tai, ua ou matauina ai foi o le toatele o i latou ua le o toe i ai so latou taulaiga i upumoni autu o le talalelei—o mafuaaga na ala ai ona latou auai i le Ekalesia i le taimi muamua lava, o mafuaaga na latou tumau ai i le tuuto atoatoa ma le toaaga e ola i tulaga faatonuina o le talalelei faapea ai ma le faamanuiaina o isi e ala atu i auaunaga tuuto ma faapaiaina, ma auala ua i ai le Ekalesia i o latou olaga “o se nofoaga o le tausiga faaleagaga ma le tuputupu ae.”9
Sa aoao mai e Iosefa Samita lenei upumoni autu: “O mataupu faavae autu o la tatou tapuaiga o le molimau a aposetolo ma perofeta e faatatau ia Iesu Keriso, ‘e faapea na maliu o ia, sa tanumia, ma toetu mai i le aso tolu, ma afio ae i luga i le lagi;’ ma o isi mea ua na o ni faaopoopoga i nei mea, lea e faatatau i la tatou tapuaiga.”10
Afai tatou te faatumauina la tatou taulaiga i le Alii, ua folafola mai ia i tatou se faamanuiaga e le mafaatusaliaina: “O le mea lea, e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tama: O le a outou maua le ola e faavavau.”11
O nisi taimi e amata ai ona taulai atu tagata faamaoni o le Au Paia o Aso e Gata Ai ma tagata sailiili faamaoni i “mea faaopoopo” i lo o mataupu faavae autu. O lona uiga, e faaosooso i tatou e Satani ia faalavelaveina lo tatou taulai atu i le savali faigofie ma manino o le talalelei toefuataiina. O e ua faalavefauina e tele lava ina le toe aai ma feinu i le faamanatuga ona ua latou taulai atu, pe ua naunau atoa, i ni faiga masani po o ni aoaoga e itiiti se taua.
O isi atonu e taulai atu i fesili ma masalosaloga o loo latou lagonaina. Ioe, o le i ai o ni fesili ma le lagonaina o le masalosalo o loo ogatusa lea ma le avea ai ma se soo tuuto. Talu ai nei, sa ta’ua ai e le Aufono a le Au Peresitene Sili ma le Korama a Aposetolo e Toasefululua e faapea: “Matou te malamalama mai lea taimi i lea taimi, o le a i ai pea ni fesili i tagata o le Ekalesia e uiga i aoaoga faavae, talafaasolopito, po o faiga masani a le Ekalesia. O loo saoloto pea tagata o le Ekalesia i taimi uma e fai mai ai na fesili ma saili atu ma le naunautai i se malamalama sili atu.”12
Manatua, sa i ai ni fesili a Iosefa Samita lava ia lea na amata ai le Toefuataiga. Sa avea o ia ma se tagata suesue ma, e pei o Aperaamo, sa ia mauaina ni tali i fesili sili ona taua o le olaga.
O fesili taua e taulai atu i le mea e sili ona taua—le fuafuaga a le Tama Faalelagi ma le Togiola a le Faaola. O la tatou sailiga e tatau ona taitai atu ai i tatou e avea ma ni soo agalelei, agamalu, agaalofa, lotofaamagalo, onosai, ma tuuto. E pei ona aoao mai Paulo, e tatau ona tatou loto e “fesui i a [tatou] avega e ave, ma ia faapea ona [tatou] faia le tulafono a Keriso.”13
O le tauave e le tasi o le avega a le isi e aofia ai le fesoasoani atu, lagolagosua, ma le malamalama i tagata uma, e aofia ai ē mamai, o ē vaivai, o ē matitiva i la le agaga ma la le tino, o ē suesue ma ē atuatuvale, faapea ai foi ma isi soo o le au paia—e aofia ai taitai o le Ekalesia ua valaauina e le Alii e auauna atu mo se vaitau.
Uso e ma tuafafine, nonofo i totonu o le vaa, faaaoga o outou ofufaaola, ma pipiimau i lima uma e lua. Aloese mai mea faalavefau! Ma afai e i ai se tasi o outou e pa’u ese mai le vaa, o le a matou saili ia te oe, maua oe, auauna atu ia te oe, ma toso mai oe ma le saogalemu i luga o le Vaa Tuai o Siona, lea o loo i ai le Atua lo tatou Tama ma le Alii o Iesu Keriso i le foeuli ma o le a taialaina i tatou i le ala sa’o, ou te molimau atu ai ma le faamaulalo i le suafa o Iesu Keriso, amene.