2015
Teuteu ki he Toetuʻú
Māʻasi 2015

Teuteu ki he Toetuʻú

ʻOku fokotuʻu ʻe Sīsū Kalaisi e sīpinga haohaoá ke tau muimui ai. ʻE lava ke ke fakaʻaongaʻi ʻa e ʻekitivitī ko ʻení ke ako lahi ange kiate Ia mo teuteu ki he Toetuʻú. Kamata ʻi he fika 1 ʻi he Sāpate kimuʻa he Toetuʻú. Lau fekauʻaki mo Sīsū mo tali ʻa e fehuʻí, ʻi he ʻaho takitaha. Hili iá pea kosi ʻo toʻo e fakatātā ʻoku hoa mo iá pea tānaki atu ia ki he sātí.

  1. Naʻe fufulu ʻe Sīsū e vaʻe ʻo ʻEne kau ākongá pea fakafiemālieʻi ʻa kinautolu ʻi Heʻene pehē, “ʻOua naʻa mamahi homou lotó, pea ʻoua naʻa manavahē ia” (Sione 14:27). Ko e hā te ke lava ʻo fai ke tokoniʻi pe fakafiemālieʻi ha kaungāmeʻa ʻi he ʻaho ní?

  2. Lolotonga ʻa e ʻOhomohe Fakaʻosí, naʻe akoʻi ʻe Sīsū ʻEne kau ākongá ke nau maʻu ʻa e sākalamēnití. Naʻá Ne folofola kiate kinautolu, “Fai ʻeni ʻi he fakamanatu kiate au” (Luke 22:19). Ko e hā ha founga ‘e taha te ke lava ‘o loto-ʻapasia ange ai lolotonga e sākalamēnití?

  3. ʻI he kamata ʻe Sīsū ʻa e Fakaleleí ʻi he Ngoue ko Ketisemaní, naʻá Ne fai e meʻa ne finangalo e Tamai Hēvaní ke Ne faí, neongo naʻe mātuʻaki faingataʻa. Naʻá ne lotu ʻo pehē, “ʻOua naʻa fai hoku lotó, ka ko e finangalo ʻoʻoú” (Luke 22:42). Ko e hā ha founga ‘e taha te ke lava ‘o talangofua ange ai ʻi he lotú, akó, pe ʻi ʻapi?

  4. ʻI he fakamamahiʻi ʻe he kakaí ʻa Sīsū lolotonga e Tutukí, naʻá Ne pehē, “Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34). Ko e hā ʻoku mahuʻinga ai ke fakamolemoleʻi ʻa e niʻihi kehé?

  5. Naʻe fakapapauʻi ʻe Sīsū ʻe tokangaʻi lelei ʻEne faʻeé hili ʻEne pekiá. Naʻá Ne tala kia Sione, “Vakai ko hoʻo faʻeé,” pe ke ngaohi ʻa Mele ʻo hangē pē ko ʻene faʻeé (Sione 19:27). Ko e hā te ke lava ʻo fai he ʻahó ni ke tokoni ki hoʻo mātuʻá pe kau tauhí?

  6. Kimuʻa pē peá Ne pekiá, naʻe lotu ʻa Sīsū ki he Tamai Hēvaní ʻo pehē, “ʻOku ou tuku hoku laumālié ki ho nimá” (Luke 23:46). Te ke lava fēfē ʻo ʻai ke toe makehe ange hoʻo ngaahi lotú?

  7. Hili ʻEne pekiá, naʻe toe moʻui ʻa Sīsū! Ko e ʻuhinga ʻeni ʻoku tau fakamanatua ai ʻa e Toetuʻú. Naʻe ʻaʻahi ʻa Kalaisi ki Heʻene kau ākongá hili e Toetuʻú pea lea ʻo pehē, “ʻOua naʻá ke taʻetui, kae tui” (Sione 20:27). Ko e hā ʻoku fuʻu mahuʻinga ai ʻa e Toetuʻú?