Naʻe Liliu Hoku Lotó ʻe he Meʻa Naʻá ku Akó

Darcy Logan, Alaska, USA

Hili e mālōlō homa foha taʻu 18, ko Sekisoní, ne u fakakaukauloto lahi ki he lelei mo e taumuʻa ʻo ʻeku moʻuí. Naʻe ʻi ai hoku foha ʻi he taʻengatá, pea naʻá ku maʻu ha holi lahi ke moʻui ʻi ha founga te mau lava ke toe fiefia ʻi homau vā fetuʻutaki fakafāmilí. Naʻá ku toe fie maʻu foki ke mahino lelei ange e folofolá koeʻuhí ke nau tataki ʻeku moʻuí.

ʻOku ʻikai ke u fuʻu fakapapauʻi e taimi naʻe kamata ai ʻeku tokanga ki he lotó, ka naʻe fakaʻaiʻai ia ʻe he ʻamanaki lelei ke toe sio ki homa fohá. ʻI heʻeku lau e Tohi ʻa Molomoná, naʻe kamata ke u fakatokangaʻi e founga hono fakaʻaongaʻi fakataipe ʻai e lotó ʻi he tuʻunga ʻo e moʻui ʻa ha taha pe fakataumuʻa ʻa e kakaí pe tūkungá.

Ko e taimi kotoa pē naʻe lau ai ki he lotó, tatau ai pē pe ʻoku fefeka pe molū, te u ʻai ha kiʻi foʻi haati kulokula ʻi he tafaʻakí. Naʻe kamata ke u sio ki ha ngaahi sīpinga. ʻI he molū e loto ʻo e kakaí, naʻa nau maʻu ai ʻa e mālohi ke matuʻuaki e faingataʻá, naʻe fakautuutu ʻenau ʻofa ki he niʻihi kehé, pea naʻa nau hoko ʻo angalelei mo angaʻofa ange. Naʻá ku ako ko e fakatomalá ʻa e meʻa ʻokú ne liliu e lotó ʻi heʻetau kole ki he Fakamoʻuí mo ʻEne feilaulau fakaleleí

Naʻá ku fiefia ʻi ha aʻusia fakaʻofoʻofa ʻi hono ako e Tohi ʻa Molomoná. Naʻe liliu hoku lotó ʻe he meʻa naʻá ku akó, ʻa ia kuó ne liliu ʻeku moʻuí. Kuo tokoniʻi foki au ʻe he meʻa naʻá ku akó ʻi heʻeku ngāue fakapalofesinalé ʻi heʻeku tokoni ki he ngaahi hoa-malí ʻi honau ngaahi faingataʻaʻiá. Kuo kamata ke mahino ʻe lava ke u akoʻi mo fakamanatu ki he ngaahi hoa-malí fekauʻaki mo e ngaahi tefitoʻi moʻoni tatau ʻokú ne ʻomi ʻa e fiemālie ʻi he nofo-malí mo e feohi fafale moʻoní. ʻOku ʻi ai ha kiʻi faingamālie ʻo e hoko ʻa e liliú pe kātaki fuoloá, kae ʻoua kuo nau ʻomi ha loto vaivai ki heʻenau nofo-malí.

Talu mei he taimi naʻá ku tā ai e fanga kiʻi haati ʻi he tafaʻaki ʻo ʻeku Tohi ʻa Molomoná, kuó u faʻa foki ke toe lau ʻa e ngaahi veesi ko iá pea hokohoko atu ʻa e ako mei he ngaahi veesi ko iá. Kuó u maʻu foki ha ngaahi fakamatala foʻou ki he lotó naʻe ʻikai ke u fakatokangaʻi ʻi heʻeku ʻuluaki laukongá, ʻa ia ʻoku fakamanatu mai ʻe ʻi ai maʻu pē ha meʻa foʻou ʻi he folofolá ke ako, mahino, pea fakaʻaongaʻi.

Ko e mahuʻinga tahá, ʻoku fakamanatu mai kiate au ʻa e ʻofa ʻa ʻeku Tamai Hēvaní mo hoku Fakamoʻuí. Koeʻuhí ko e ʻofa ko iá, te u maʻu hoku fāmilí ʻo taʻengata. ʻOku ou ʻilo ʻeni ʻaki hoku lotó kotoa, pea ʻoku ou houngaʻia moʻoni ai.