Kuo Pau Ke Ke Lotu
Jimy Saint Louis, Haiti
Tā fakatātā ʻa Bradley H. Clark
ʻI he ʻaho 12 ʻo Sānuali ʻo e 2010, naʻe fakahaaʻi mai ʻe he Tamai Hēvaní kiate au Hono mālohí hili e holafa ha fale piliki fungavaka fā ʻi ha mofuike fakalilifu naʻá ne fakamamahiʻi ʻa Haiti.
Lolotonga ʻeku kaikaila hake mei he mamafa ʻo e fale holó, naʻe lea mai ha leʻo fakanonga kiate au: “ʻE Simi, ko e hā ʻoku ʻikai ke ke lotu ai kae tuku e kaikailá?”
Ka neongo ia, ne ʻikai lava ʻo taʻofi ʻeku kaikailá, koeʻuhí he naʻá ku manavasiʻi te u mate ʻi ha ngaahi miniti siʻi. Naʻe toe ongo mai e leʻó, ʻo hangē ha kaungāmeʻa lelei naʻe fakaʻaiʻai ʻe ha loto holi lahi ke tokoni: “ʻE Simi, kuo pau ke ke lotu.”
Naʻe fakaʻau ʻo ʻikai toe makātakiʻi ʻa e mamahi ʻi hoku ongo vaʻé, pea naʻe fakaʻau ke ʻosi ʻa e ʻokisena ʻi he fakapoʻuli naʻá ne ʻākilotoa aú. Naʻe toe ongo mai ʻa e leʻó: “ʻE Simi, kuo pau ke ke lotu.”
Naʻe tuku leva ʻeku fakafepakí ʻi he momeniti ko iá. Naʻá ku lea ʻi ha leʻo angavaivai ʻo pehē: “Tamai Hēvani, ʻokú Ke ʻafioʻi hoku mālohí, pea ʻokú Ke ʻafioʻi ʻa e fuoloa te u lava ʻo kātakiʻi ai e mamahi ko ʻení. ʻOku ou kole ki hoʻo ʻAfió, kātaki ʻo toʻo e mamahí ni meiate au. ʻI he huafa ʻo Sīsū Kalaisí, ʻēmeni.”
Hili pē ʻeku fai ʻa e lotu faingofua ko ʻení, naʻá ku tō ʻo mohe. ʻOku ʻikai ke u manatuʻi e meʻa naʻe hoko hili iá, ka ʻi heʻeku ʻā hake mei ha mohe maʻú, naʻe mole atu ʻa e mamahí. ʻI ha taimi nounou mei ai, naʻe maʻu au ʻe he kau fai fakahaofi moʻuí ʻi heʻenau fekumi ki he kau faingataʻaʻia ʻi he fale holo ʻo hoku ʻōfisí.
Hili iá ne u ʻilo ai ko au toko taha pē ʻi he kau ngāue ʻe toko nima ʻi he fungavaka ua ʻo e fale Poata Pilinisí naʻá ku ngāue aí, naʻe hao moʻui mei he fale holó. Ne tuʻusi hoku vaʻe ʻe taha koeʻuhí ko hoku ngaahi laveá, pea naʻá ku nofo falemahaki ʻi ha ngaahi māhina lahi. Ka ʻoku ou ʻiloʻi naʻe ueʻi au ʻe he Laumālie Māʻoniʻoní ke u lotu pea naʻe tali ʻe he Tamai Hēvaní ʻa e lotu ko iá.
ʻOku ou lava ʻo fakamoʻoni ʻoku tali ʻe he Tamai Hēvaní ʻetau ngaahi lotú ʻi Heʻene founga pē ʻAʻaná pea fakatatau ki Hono finangaló—ʻi ha feituʻu pē mo e taimi pē ʻoku tau lotu aí.