Ko e Meʻa Mahuʻinga Taha ʻOku ou Maʻú
ʻOku nofo ʻa e tokotaha naʻá ne faʻú ʻi Palāsila.
ʻI heʻemau konifelenisi fakavahaʻa siteiki ʻa e toʻu tupú, ne mau maʻu kotoa ha Tohi ʻa Molomona pea naʻe fakaafeʻi kimautolu ke ʻave ia ki ha taha. Naʻá ku loto ke foaki ʻeku tohí ki he taha hiva ʻiloa ʻoku ou saiʻia taha aí.
ʻI heʻeku ʻiloʻi ʻoku fai haʻane koniseti ʻi hoku koló, naʻá ku fakakaukau ko e faingamālie lelei tahá ʻeni. ʻOku fai ha lulu ʻi heʻene ngaahi koniseti kotoa pē ke fili ha kau poupou ʻe 15 ke feʻiloaki mo ia ʻi mui ʻi he siteisí. ʻOku fuʻu faingataʻa ke fili kita, ka naʻá ku kau pē.
ʻI ha ngaahi uike siʻi kimuʻa he konisetí, naʻá ku hiki ʻeku fakamoʻoní ʻi he Tohi ʻa Molomona peá u lotu. Naʻá ku fakamatala ki he Tamai Hēvaní ʻoku ngalingali he ʻikai fili au pea ʻoku ou fie maʻu ʻEne tokoní.
ʻI heʻeku “ʻēmení” pē, naʻe tatangi ʻeku telefoni toʻotoʻó ko ha tā mei he ʻōfisi ʻo e taha hivá. Kuo fili au!
ʻI he ʻaho ʻo e konisetí, ne u foaki ʻa e tohí ki he taha hivá ʻi mui ʻi he siteisí. Naʻá ne fakaava ia mo lau ʻeku fakamoʻoní: “Naʻá ku tuku ha taimi lahi ʻi hono fakakaukauʻi ha meʻaʻofa mahuʻinga, ʻe ʻaonga kiate koé. Naʻá ku ʻiloʻi naʻe fie maʻu ke u ʻoatu ha meʻa naʻe mahuʻinga koeʻuhí ko e meʻa naʻe ʻi aí kae ʻikai koeʻuhí ko hono totongí. Ko e Tohi ʻa Molomoná ʻeni; ko e meʻa mahuʻinga taha ia ʻoku ou maʻú. ʻE hoko ia kiate koe foki kapau te ke lau ia.”
Naʻá ne fāʻofua mai kiate au mo pehē te ne lau ia. Ne ʻikai ke u lava ʻo fakamaʻumaʻu hoku loʻimatá!
Ko ha aʻusia hāhāmolofia ia ke foaki ʻa e Tohi ʻa Molomoná ki ha tokotaha ʻiloa. Ka ʻoku totonu ke hoko hono vahevahe ʻo e tohí ko ha meʻa angamaheni. Naʻá ku mei ʻoange ia ki haku kaungāmeʻa he akó, ko ha kaungāʻapi, pe ha toe taha kehe.
Ko hotau ngaahi fatongiá ke foaki ʻa e Tohi ʻa Molomoná, fai ʻetau fakamoʻoní, lea kau ki he Siasí, mo e hoko ko ha faʻifaʻitakiʻangá. ʻOku ʻikai totonu ke tau mā ke vahevahe ʻa e ongoongolelei ʻo Sīsū Kalaisí.