Ko e Folofolá ʻi he malumalu ʻo e Ngaahi Fetuʻú
“ʻTaki pea mo fakamoʻoniʻi ʻe he Laumālié” (Tohi Hiva ʻA e Fānaú, 66).
ʻI heʻeku kei siʻí, naʻá ku saiʻia mo hoku ngaahi tuongaʻané ke mohe ʻi tuʻa ʻi he lolotonga e faʻahitaʻu māfaná. Na’a mau fofola homau mohengá ʻi he fakafaletoló, pea mau sio ki he ngaahi pupunga fetuʻú mo fakafanongo ki he tangi ʻa e kakalú ʻi heʻemau fakamohemohe hifó.
ʻI ha pō ʻe taha naʻá ku ʻi he fakafaletoló ai mo hoku tuongaʻane lahi ko Lelí. Naʻá ma mālōlō lelei mo sio hake ki he ngaahi fetuʻú. Naʻe ʻikai ke faʻa talanoa ʻa Leli, ka ʻi he pō ko iá naʻá ne pehē naʻá ne fie maʻu ke fai mai ha ngaahi talanoa. Naʻá ne fai mai ha ngaahi talanoa mei he Tohi ʻa Molomoná, ʻo kamata ʻaki ʻa e mavahe ʻa Līhai mo hono fāmilí mei Selusalemá.
Kuó u fanongo ki he ngaahi talanoa mei he Tohi ʻa Molomoná ʻi he Palaimelí kimuʻa, ka naʻe kehe ia ʻi hono fai ʻe Lelí. Naʻe ongo moʻoni ange ia. ʻI heʻeku sio hake ki he ngaahi fetuʻú mo fakafanongo ki hoku tuongaʻané, naʻá ku ongoʻi māfana mo fiefia ʻi hoku lotó. Neongo naʻe ʻikai ke u ʻiloʻi ia ʻi he taimi ko iá, ka ne u ongoʻi naʻe fakahā mai ʻe he Laumālie Māʻoniʻoní kiate au naʻe moʻoni ʻa e Tohi ʻa Molomoná.
ʻI ha ngaahi māhina siʻi mei ai, naʻá ku maʻu ha tohi ʻo e ngaahi talanoa fakatātā mei he Tohi ʻa Molomoná ʻi homau falé. ʻI heʻeku kamata ke laú, naʻá ku maʻu e ongo māfana mo fiemālie tatau, ʻa ia ne u maʻu ʻi he taimi ne fai mai ai ʻe Leli kiate au e ngaahi talanoa tatau pē.
Hili ha ngaahi taʻu mei ai, ʻi heʻeku feinga ke fakapapauʻi pe ne u maʻu ha fakamoʻoní, naʻá ku kiʻi loto-mamahi ʻi he teʻeki ke u maʻu ha tali ʻoku lahi pe mālohí. Naʻe ʻuhinga nai ʻeni naʻe ʻikai ke ʻi ai haʻaku fakamoʻoni? Ne u manatuʻi leva e ongo ne u maʻu ʻi he taimi ne fakahoko mai ai kiate au ʻe hoku tuongaʻané ʻa e ngaahi talanoa mei he Tohi ʻa Molomoná, pea ne u ʻiloʻi naʻá ku ʻiloʻi naʻe moʻoni ʻa e Siasí.
ʻOku ʻikai hoko mai maʻu pē ha fakamoʻoni ʻi ha momeniti lahi ʻe taha. ʻOku faʻa hoko mai ia ʻi ha ngaahi momeniti iiki mo fakalongolongo lahi ʻa ia ʻoku fanafana mai ai e Laumālie Māʻoniʻoní ʻoku moʻoni ʻa e ngaahi meʻá ni.