Manatuʻi Ko ʻEnau Fili
ʻOku ʻaonga ʻa e tauʻatāina ke filí ki he tokotaha kotoa pē, kau ai ʻa kinautolu ʻokú ke fakaafeʻi ke ako kau ki he Siasí.
Tā fakatātaaʻi ʻe Beth M. Whittaker
ʻI hoʻo fakaafeʻi ha niʻihi kehe ke ako kau ki he ongoongoleleí, ʻoku mahuʻinga ke ʻiloʻi ʻoku nau maʻu ʻa e tauʻatāina ke filí ke fili pe te nau tali pe ʻikai hoʻo fakaafé. ʻOku ʻikai fakafuofuaʻi hoʻo lavameʻá ʻi heʻenau talí; ʻoku fua ia ʻi hoʻo tukupā ke vahevahé.
Ko ia kapau ʻoku ʻikai fakafuofuaʻi ʻa e lavameʻá ʻiate kinautolu ʻoku nau tali ʻió pe papitaisó, ko e hā ʻoku totonu ke ke nofotaha aí ʻi hoʻo fokotuʻu ha ngaahi taumuʻa ki he ngāue fakafaifekaú? Fokotuʻu hoʻo fakakaukaú ʻi he meʻa te ke lava ʻo faí kae ʻikai ko e founga tali ʻa e niʻihi kehé. Manatuʻi, ʻokú ke maʻu foki mo e tauʻatāina ke filí. Te ke lava ʻo fili ke:
Faʻa fakaafeʻi, pea fakaafeʻi ʻa e tokotaha kotoa pē. Koeʻuhí ʻoku ʻikai lava ke ʻiloʻi kimuʻa pe ko hai ʻoku mahuʻingaʻia pe ʻikai mahuʻingaʻia ʻi he ongoongoleleí, vahevahe maʻu pē hoʻo fakaafé pea vahevahe ia mo e tokolahi taha te ke lavá, ʻo fakatautefito hoʻo tokangá ki he ngaahi ueʻi ʻa e Laumālié. ʻOku tau lavameʻa ko ha kau faifekau ʻi heʻetau fakaafeʻi ʻa e kakaí ke nau ako mo tali ʻa e moʻoní.
Anga fakakaungāmeʻa pē. Kapau he ʻikai tali ʻe ha taha ha fakaafe ke ako lahi ange, hokohoko atu pē ke anga fakaʻapaʻapa mo angalelei. Tauhi ʻa e ngaahi feohi fakakaungāmeʻá kapau ʻoku māʻolunga e ngaahi tuʻunga moʻuí. Fakaaʻu ʻa e ʻofa faka-Kalaisí ki he tokotaha kotoa pē te ke lavá, ʻo tatau ai pē kapau ʻoku ʻikai ke mahino kiate kinautolu e meʻa kotoa pē ʻokú ke tui ki ai mo fakahokó.
Hokohoko atu ke angatonu. Naʻe fakamatalaʻi lelei taha ia ʻe he Fakamoʻuí: “Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” (Mātiu 5:16). ʻOfa ʻi he ongoongoleleí pea moʻui ʻaki e ongoongoleleí, pea ʻe vave pe ʻe kimui ai te ke ʻilo ʻa e kakai ʻoku nau fie ʻilo ki hono ʻuhingá pea ʻoku nau mateuteu ke tali ʻa e ongoongoleleí.
Ke ke vilitaki ʻi he faʻa kātaki. Hangē ko ʻene hā ʻi he talanoa ʻi he toʻomataʻú, ko e taimi ʻe niʻihi ʻoku fie maʻu ʻa e ngaahi fakaafe lahi kimuʻa he taimi totonú. Hokohoko atu ke fakaava e matapaá, hokohoko atu ʻa e anga fakakaungāmeʻá, pea ʻoua ʻe loto foʻi. ʻOku ʻafioʻi ʻe he ʻEikí hoʻo ngaahi ngāué pea te Ne tāpuekina koe. (Vakai, T&F 98:2.)