Toʻo Kongokonga Lalahi mei he Konifelenisi Lahi Hono 185 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Naʻe fakamatala ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Ko e ngaahi taumuʻa ki he lea ʻi he konifelenisí ʻoku vahe—kae ʻikai ʻi ha mafai fakamatelie, ka ʻi he ngaahi ueʻi ʻa e Laumālié,” (peesi 32). ʻI ha konifelenisi lahi fakalaumālie ʻoku kamata ʻaki ʻa e fakataha lahi ʻa e kakai fefiné pea fakaʻosi ʻi he Sāpate Toetuʻú, ne akonaki e kau leá fekauʻaki mo e fāmilí, ʻaukai, ngāue fakatemipalé, tuʻunga fakaākongá, ʻaho Sāpaté pea mo e Fakalelei ʻa e Fakamoʻuí, mo ha ngaahi tefitoʻi moʻoni lahi (vakai, peesi 3).
Ko e niʻihi ʻeni ʻo ha ngaahi meʻa mahuʻinga:
-
Fanongonongo ʻe Palesiteni Tōmasi S. Monisoni ha ngaahi temipale foʻou ʻe langa ʻi he ʻApitasaní, ʻAivolī Kousi; Poata Pilinisi, Haiti; mo Pengikokí, Taileni. ʻI he ngaahi meʻá ni, naʻá ne pehē, “ko ha tāpuaki fakaofo moʻoni ʻoku tokonaki maʻa hotau kāingalotu faivelengá ʻi he ngaahi feituʻu ko ʻení, pea mo ha feituʻu pē ʻoku tuʻu ai e ngaahi temipalé he funga ʻo e māmaní” (peesi 91).
-
Naʻe hikinimaʻi ʻe he kāingalotu ʻo e Siasí ha kau mēmipa foʻou ʻe toko nima ʻo e Kōlomu ʻUluaki ʻo e Kau Fitungofulú, ha kau palesitenisī lahi foʻou ʻo e Kau Talavoú, pea mo ha tokoni foʻou ʻi he kau palesitenisī lahi ʻo e Palaimelí.
-
Naʻe fakatokangaʻi ʻe he lipooti fakasitetisitika fakataʻú ha kāingalotu ʻo e Siasí ʻe toko 15.3 miliona ʻi ha ngaahi siteiki ʻe 3,114 mo e vahefonuá 561. Naʻe fakatapui ha temipale foʻou ʻe tolu he taʻu kuo ʻosí, ʻo hiki hake leva ʻa e lahi ʻo e ngaahi temipale ʻoku ngāué ki he 144.
-
Naʻe liliu ʻa e konifelenisi lahí ki he ngaahi lea fakafonua ʻe 95. Hili ha meʻa ne kamata ʻi ʻOkatopa ne toki ʻosí, ne vahevahe ʻe ha kau malanga ʻe toko tolu ʻenau leá ʻi heʻenau ngaahi lea fakafonuá ʻo kehe mei he lea faka-Pilitāniá.
Ne fakamoʻoni ha kau lea ʻe niʻihi ʻi he fakaʻosinga ʻo e uike Toetuʻú, ʻo kau ki he Toetuʻu ʻa e Fakamoʻuí. Naʻe fakamoʻoni ʻa Palesiteni Tōmasi S. Monisoni, “Ko e ʻAlo ia ʻo e ʻOtuá. Ko Ia naʻe toe tuʻu mai mei he faʻitoká ʻi he ʻuluaki pongipongi Toetuʻú, ʻo Ne ʻomi ai ʻa e meʻaʻofa ʻo e moʻui taʻengatá maʻá e fānau kotoa ʻa e ʻOtuá” (peesi 93).