ʻOku ʻa e ʻOtuá ʻa e Fāmilí
Fai ʻe Carole M. Stephens
Tokoni ʻUluaki ʻi he Kau Palesitenisī Lahi ʻo e Fineʻofá
ʻOku tau kau ki he fāmili ʻo e ʻOtuá pea ʻoku fie maʻu kitautolu ai.
ʻOku ʻi ai nai ha meʻa ʻe fakaʻofoʻofa mo mahuʻinga ange ʻi he moʻoni faingofua mo haohaoa ʻo e ongoongoleleí, ʻoku akoʻi mai ʻi ha hiva ʻa e Palaimelí? Pea ʻoku meaʻi ʻe he fānau fefine kotoa pē ʻi heni he pooni e foʻi hiva ʻoku ou ʻuhinga ki aí. Ne mou ako ia ki hoʻomou polokalama Palaimeli he taʻu kuo ʻosí.
ʻOku hanga ʻe he fakalea ʻo e “ʻOku ʻa e ʻOtuá ʻa e Fāmilí”1—ʻa ia ne hivaʻi ʻanenai ange he fakatahá ni—ʻo fakamanatu mai ʻa e tokāteline haohaoá. ʻOku ʻikai ngata pē heʻetau ako ai ʻoku ʻa e ʻOtuá ʻa e fāmilí, ka ʻoku tau kau atu foki ki he fāmili ʻo e ʻOtuá.
ʻOku akoʻi mai ʻe he laine ʻuluaki ʻo e foʻi hivá: “[ʻOku ʻi ai ha fāmili ʻetau Tamaí. Ko au ia! Ko koe, mo e niʻihi kehé foki; ko ʻEne fānau kitautolu].” ʻOku tau ako mei he fanongonongo fekauʻaki mo e fāmilí ʻo pehē, “ʻI he maama fakalaumālié, naʻe ʻiloʻi ai mo hū ʻa e ngaahi foha mo e ngaahi ʻofefine fakalaumālié ki he ʻOtua ko ʻenau Tamai Taʻengatá.” ʻI he maama ko iá, ne tau ʻilo ai hotau tuʻunga fakaefefine taʻengatá. Ne tau ʻilo ai ko ha “ʻofefine [kitautolu] ʻo ha mātuʻa fakalangi.”2
Naʻe ʻikai hanga ʻe heʻetau fononga fakamatelie mai ki he māmaní ʻo liliu e ngaahi moʻoni ko iá. ʻOku tau kau ki he fāmili ʻo e ʻOtuá pea ʻoku fie maʻu kitautolu ai. ʻOku fōtunga kehekehe ʻa e ngaahi fāmili ʻi he māmaní. Pea neongo ʻoku tau fai hotau lelei taha te tau lavá ke faʻu ha ngaahi fāmili tukufakaholo ʻoku mālohí, ka ʻoku ʻikai makatuʻunga ʻetau kau ki he fāmili ʻo e ʻOtuá mei he faʻahinga tuʻunga—ʻa e tuʻunga fakaemalí, tuʻunga fakatauhi fānaú, tuʻunga fakapaʻangá, tuʻunga fakasōsialé pe faʻahinga tuʻunga ʻe lava ke tau fakamatalaʻi mai ʻi he mītia fakasōsialé.
ʻOku tau kau ai. “Ko e ngaahi ʻofefine kitautolu ʻo ʻetau Tamai Hēvaní, ʻokú Ne ʻofa ʻiate kitautolu pea ʻoku tau ʻofa ʻiate Ia.”3
ʻOku hanga ʻe he laine hono ua ʻo e foʻi hivá, ʻo fakamaʻalaʻala mai e ʻuluakí. “[Kuó Ne fekauʻi mai kitautolu ki he māmaní, ʻi hotau fanauʻí, ke tau moʻui mo ako heni ʻi ha ngaahi fāmili].”
Naʻa tau ako ʻi he maama fakalaumālié te tau fie maʻu ha kuonga ʻo e moʻui matelié. Ne tau “tali e palani [ʻa e Tamai Hēvaní] ʻe tuʻunga ai ha lava ʻEne fānaú ʻo maʻu ha sino fakamāmani pea mo ha taukei ʻi he māmaní ke fakalakalaka hake ki he haohaoá mo ʻiloʻi fakapapau ʻa [hotau] ikuʻanga fakalangí ʻi [heʻetau] tuʻu ko e ʻea hoko ki he moʻui taʻengatá.”4
Naʻe fakamatalaʻi ʻe ʻEletā Lisiate G. Sikoti naʻe “akonekina kitautolu ʻi he maama fakalaumālié ko e taumuʻa ʻetau omi ki hení ke siviʻi, ʻahiʻahiʻi kitautolu pea ke tau tupulaki.”5 ʻOku lahi ha ngaahi founga ʻoku hoko mai ai ʻa e tupulakí ʻi hono aʻusia ia ʻe he niʻihi fakafoʻituituí. Kuo teʻeki ai ke u foua e vete malí, ʻa e mamahi mo e ongoʻi taʻepauʻia ʻoku hoko mai ʻi hano liʻaki kitá pe aʻusia e fatongia ʻo e hoko ko e faʻē tāutahá. Kuo teʻeki ai ke u aʻusia ha mate haʻaku fānau, manavaʻi paʻá pe manako fefiné. Kuo teʻeki ai ke u kātekina ʻa e ngaohikoviá pe ʻi ai haku mahaki tauhi pe ko e maʻunimaá. Kuo teʻeki ai ke u aʻusia e ngaahi meʻá ni ke ne fakatupulekina au.
Mahalo ʻoku fakakaukau hamou niʻihi he taimí ni, “Sai, ʻe Sisitā Sitīveni, ʻoku ʻikai mahino ia kiate koe!” Pea ʻoku ou tali atu mahalo ʻokú ke moʻoni. ʻOku ʻikai mahino kakato kiate au hoʻomou ngaahi faingataʻá. Ka ʻoku fakafou ʻi hoku ngaahi sivi mo e ʻahiʻahi fakatāutahá—ʻa e ngaahi meʻa kuó ne peluki hoku ongo tuí—ʻeku maheni lelei ai mo e Tokotaha ʻoku mahino kiate Iá—ʻa Ia naʻe “maheni mo e loto mamahí,”6 kuó Ne aʻusia pea mahino kiate Ia e meʻa kotoa. Pea ʻikai ngata aí, kuó u aʻusia e ngaahi ʻahiʻahi fakamatelie kotoa pē kuó u lave atu ki aí ʻi he fofonga ʻo ha tama fefine, faʻē, kui fefine, tokoua, mehikitanga mo ha kaungāmeʻa.
Ko hotau faingamālie ʻi heʻetau hoko ko e ngaahi ʻofefine tauhi fuakava ʻo e ʻOtuá, ʻoku ʻikai ko e ako pē mei hotau ngaahi faingataʻá; ka ke tau kafataha ʻi he angaʻofa mo e manavaʻofa, ʻi heʻetau poupouʻi e kau mēmipa kehe ʻo e fāmili ʻo e ʻOtuá ʻi honau ngaahi faingataʻaʻiá, ʻo hangē ko ia kuo tau fuakava ke faí.
ʻI heʻetau fai iá, ʻoku mahino foki ai kiate kitautolu pea tau falala ʻoku ʻafioʻi ʻe he Fakamoʻuí ʻa e faingataʻa e halá pea te Ne tataki kitautolu ʻi ha faʻahinga faingataʻa pe mamahi pē ʻe hoko mai. Ko ia ʻa e ʻofa faka-Kalaisi moʻoní, pea ʻoku “tolonga ia ʻo taʻengata”7—pea fakafou ʻiate kitautolu hano konga—ʻi heʻetau muimui kiate Iá.
ʻI heʻetau hoko ko e ngaahi ʻofefine ʻo e ʻOtuá mo e kau ākonga ʻa Sīsū Kalaisí, ʻoku tau “ʻi ha tuʻunga ke ngāueʻi e ngaahi ongo kuo tōkaki ʻe he ʻOtuá ʻi [hotau] lotó.”8 ʻOku ʻikai fakangatangata pē hotau ivi tākiekiná ki hotau fāmili tonú.
Ne u toki maʻu ha faingamālie ke ʻaʻahi kia Sisitā Vasi ʻo e Siteiki Sinile ʻAlisoná ʻi hono ʻapí. ʻI heʻene talitali lelei aú, ko e fuofua meʻa ne u fakatokangaʻí, ko e lahi e ʻū tā ʻo hono fāmilí mo e kau faifekaú kuo fakaʻesia ʻi he holisí mo ʻene funga tēpilé. Ne u fehuʻi ange, “ʻE Sisitā Vasi, ʻoku toko fiha ho makapuná?”
Naʻá ne ofo heʻeku fehuʻí pea fakamahiki mai pē hono ongo umá. Ne u puputuʻu heʻene talí peá u sio atu ki heʻene tama fefiné ko Sisitā ʻElahā, ʻo ne tali mai, “ʻOku ʻikai ke ne ʻilo ʻe ia e tokolahi hono makapuná. ʻOku ʻikai ke mau lau ia. ʻOku ui ia ʻe he fānau kotoa pē ko ʻenau ʻKuifefineʻ—ʻoku hoko pē ia ko e Kuifefine ʻa e taha kotoa.”
ʻOku ʻikai fakangatangata pē ʻe Sisitā Vasi ʻene ʻofá mo e takiekiná ki hono fāmili totonú. ʻOku mahino kiate ia ʻa e ʻuhinga ke fakalahi atu ʻene tākiekiná ʻi heʻene feʻaluʻaki ʻo fai leleí, faitāpuekina, tanumaki mo taukaveʻi e fāmili ʻo e ʻOtuá. ʻOku mahino kiate ia “ko e fē pē ha taimi ʻoku fakamālohia ai ʻe ha fefine ʻa e tui ʻa ha kiʻi tamasiʻi, ʻokú ne tokoni ai ki he mālohi ʻo ha fāmili—ʻi he taimí ni pea ʻi he kahaʻú.”9
ʻOku toe fakamatalaʻi ʻe he laine tolu ʻo e hivá, ʻa e taumuʻa ʻo e moʻui fakamatelié: [“Ne ʻomi ʻe he ʻOtuá e ngaahi fāmilí ke tokoni ke tau aʻusia e tuʻunga ʻokú Ne finangalo ki aí.”] Naʻe akonaki e Fakamoʻuí ʻo pehē, “Ke mou taha pē; pea kapau ʻoku ʻikai te mou taha, ʻoku ʻikai ʻaʻaku ʻa kimoutolu.”10 ʻOku akoʻi mai ʻe he fanongonongo ʻo e fāmilí ʻi heʻetau hoko ko e ngaahi ʻofefine fakalaumālie ʻo ha ongomātuʻa fakalangí, ʻoku ʻi ai hatau natula fakaʻotua, puipuituʻa mo e taumuʻa taʻengata. ʻOku finangalo ʻa e ʻOtuá ke tau taha pē. ʻOku fie maʻu ʻe he ʻOtuá ke tau taha—ko ha ngaahi ʻofefine tauhi fuakava, ʻo kafataha ʻi he ngaahi tapa kehekehe ʻo ʻetau moʻui fakafoʻituituí11 pea ʻoku tau fie ako ʻa e meʻa kotoa ʻe lava ke tau toe foki ai ki Hono ʻaó, pea silaʻi kiate Ia ko e konga Hono fāmili taʻengatá.
“ʻOku fakaʻatā foki ʻe he ngaahi ouau mo e ngaahi fuakava toputapu ʻi he ngaahi temipale toputapú [kiate kitautolu] ke [tau] foki ki he ʻao ʻo e ʻOtuá pea mo e ngaahi fāmilí ke fakatahaʻi ʻo taʻengata.”12 ʻOku hanga ʻe he ngaahi ouau ʻoku tau maʻú mo e ngaahi fuakava ʻoku tau fai ʻi he papitaisó mo e ngaahi temipale māʻoniʻoní, ʻo fakafehokotaki e fāmili ʻo e ʻOtuá ʻi he ongo tafaʻaki fakatouʻosi ʻo e veilí—ʻo fakafehokotaki ai kitautolu ki heʻetau Tamaí ʻo fakafou ʻi Hono ʻAló, ʻa ia naʻá Ne lotu, “Koeʻuhí ke taha pē ʻa kinautolu kotoa pē; ʻo hangē ʻokú ke ʻiate aú, ʻe Tamai mo au ʻiate koe, koeʻuhí ke nau taha pē foki ʻiate kitaua.”13
ʻI heʻetau fakaʻaongaʻi hotau taimi ʻi he matelié ke ako mo fakahoko e ngaahi akonaki ʻa e Fakamoʻuí, ʻoku tau hoko lahi ange ai ʻo hangē ko Iá. ʻOku toe mahino ai kiate kitautolu ko Ia ʻa e halá—ʻa e halá pē taha—ʻe lava ke tau ikunaʻi ai e ngaahi faingataʻa ʻo e matelié, fakamoʻui ai kitautolu pea tau foki ai ki hotau ʻapi fakalangí.
ʻOku toe foki e laine fakaʻosi ʻo e hivá ki he kamataʻangá: [“Ko e founga ʻeni ʻokú Ne vahevahe ai ʻEne ʻofá he ʻoku ʻa e ʻOtuá ʻa e fāmilí.”] Ko e palani ʻa e Tamaí maʻa ʻEne fānaú, ko ha palani ia ʻo e ʻofa. Ko ha palani ia ke fakatahaʻi ʻEne fānaú—ʻa Hono fāmilí—mo Ia. Naʻe akonaki ʻa ʻEletā Lāsolo M. Nalesoni, “ʻOku ʻi ai ha fakaʻamu ʻe ua ʻa e Tamai Hēvaní maʻa ʻEne fānaú … : ko e moʻui taʻefaʻamaté mo e moʻui taʻengatá, ‘a ia ko hono ʻuhingá ki he “moʻui fakataha mo Ia ʻi he ʻapi ne tau haʻu mei aí.’”14 ʻE lava ke aʻusia pē e fakaʻamu ko iá ʻi heʻetau vahevahe atu e ʻofa ʻoku maʻu ʻe he Tamai Hēvaní maʻa Hono fāmilí, ʻaki ʻetau tokoni mo vahevahe atu ʻEne palaní ke ʻinasi ai e niʻihi kehé.
ʻI he taʻu ʻe uofulu kuohilí, naʻe tokoni ai e Kau Palesitenisī ʻUluakí mo e Kau ʻAposetolo ʻe Toko Hongofulu Mā Uá ki he māmaní kotoa, ʻi heʻenau tuku mai e fanongonongo kau ki he fāmilí. Talu mei ai mo e fakautuutu hono ʻohofi e fāmilí.
Kapau ʻoku tau fie lavameʻa ʻi hotau ngaahi fatongia toputapu ko e ngaahi ʻofefine ʻo e ʻOtuá, kuo pau ke mahino kiate kitautolu ʻa e mahuʻinga taʻengata ʻo hotau fatongia fakafoʻituitui ke akoʻi ʻa e ngaahi moʻoni fekauʻaki mo e palani ʻa ʻetau Tamai Hēvaní maʻa Hono fāmilí. Naʻe fakamatalaʻi ʻe Palesiteni Hauati W. Hanitā ʻo pehē:
“ʻOku fie maʻu lahi ke fakatahatahaʻi mai e kakai fefine ʻo e Siasí ke nau tuʻu fakataha mo tokoniʻi e Kau Takí ʻi hono tutuʻu hifo ʻo e kovi ʻoku huʻa mai ʻo ʻākilotoa kitautolú pea ʻi hono ʻunuakiʻi kimuʻa e ngāue ʻa e Fakamoʻuí. …
“… Ko ia ʻoku mau kole atu ke mou tokoni ʻaki homou ivi tākiekina mālohi ki he leleí ki hono fakamālohia hotau ngaahi fāmilí, hotau siasí, pea mo hotau tukui koló.”15
Ngaahi tokoua, ʻoku tau kau ʻi ha fāmili. ʻOku ʻofeina kitautolu. ʻOku fie maʻu kitautolu. ʻOku ʻi ai hatau taumuʻa fakalangi, ngāue, feituʻu mo e ngafa ʻi he Siasí mo e puleʻanga ʻo e ʻOtuá pea mo Hono fāmili taʻengatá. ʻOkú ke ʻiloʻi nai ʻi ho lotó ʻoku ʻofeina koe ʻe hoʻo Tamai Hēvaní pea ʻokú Ne finangalo ke mou nofo fakataha mo Ia mo e niʻihi ʻokú ke ʻofa aí? Hangē ko e “haohaoa ʻa e Tamai Hēvaní mo Hono ʻAló, ʻoku haohaoa foki ʻa Sīsū Kalaisi … , pea haohaoa ʻEna ʻamanaki maʻatautolú.”16 ʻOku haohaoa ʻena palani maʻatautolú pea ʻoku pau ʻEna ngaahi talaʻofá. Ko ʻeku fakamoʻoní ia ki he ngaahi moʻoni ko ʻení ʻi he loto fakafetaʻi moʻoni, pea ʻi he huafa ʻo Sīsū Kalaisí, ʻēmeni.