Stephen W. Owen
Palesiteni Lahi ʻo e Kau Talavoú
ʻI he kei taʻu 14 ʻa Sitīveni W. ʻOuení, naʻe totongi ia ʻe hono kaungāʻapí ke kosi honau fuʻu loto ʻataʻataá mo huo ʻenau ngoué he uike kotoa pē. “Naʻe feʻunga mo ha ʻaho ʻe tolu hono kosi e loto-ʻataʻataá,” ko e lau ia ʻa Misa ʻOueni kuo hikinimaʻi he ʻaho 4 ʻo ʻEpeleli 2015 ke hoko ko e palesiteni lahi ʻo e Kau Talavoú.
ʻI he faifai pea ʻosi e kosi ʻa e talavou ko Sitīvení, naʻe kole ange ʻene pule ngāué ke na kiʻi luelue ʻo ʻeveʻeva he ngoue matalaʻiʻakaú ke ne tuhuʻi ange ha fanga kiʻi vao naʻe ngalo ke ne taʻaki.
Naʻá ne pehē, “Naʻá ne talamai naʻe fie maʻu ke u taʻaki e kiʻi vao kotoa pē.” “Ko ʻeku fuofua ngāué ia pea naʻe tokoni ia ke mahino kiate au ʻa e meʻa ko e haʻisia ki he fatongiá.”
Naʻe ako ʻe Misa ʻOueni ha lēsoni lahi he taʻu ko iá ʻo mahulu hake ia hono tauhi pē ha loto ʻataʻatā mo ha ngoue matalaʻiʻakaú. Ko e taha, naʻá ne ʻiloʻi e fiemālie ʻoku maʻu ʻi he ngāue mālohi he founga totonú. Naʻá ne ako foki ai ki hono mahuʻinga ʻo e maʻu ha taha fai faleʻí (mentors).
Naʻe fie maʻu pē ʻe he kaungāuʻapí ia ke fai ʻe Sitīveni hono lelei tahá.“Hangē ia haʻane pehē mai kiate au, “ʻoku ou ʻiloʻi e tuʻunga te ke lava ʻo aʻu ki aí pea ʻoku ou fie tokoniʻi koe.”
Naʻá ne toe pehē mai, ʻoku fie maʻu ʻe he talavou kotoa pē he Siasí ha kau faifaleʻi pehē, ke tokoniʻi ia ke ne hoko ko e tokotaha maʻu lakanga fakataulaʻeiki lelei tahá. Naʻá ne pehē, “ʻOku ou ʻofa lahi ki he toʻu tupú.” “ʻOku ou ʻiloʻi ko ha taimi faingataʻa ʻeni te ne fokotuʻu e sīpinga ki he toenga ʻo ʻenau moʻuí.”
Naʻe ngāue ʻa Misa ʻOueni ʻi he Misiona Tekisisi Seni ʻEnitōnioó pea hoko kimui ko ha pule Sikauti, palesiteni ʻo e Kau Talavoú ʻi he uōtí, pīsope, aleaʻanga māʻolunga mo ha palesiteni fakasiteiki.
Naʻe tupu hake ʻi Holatei, ʻIutā, pea naʻá ne tokangaʻi foki mo e Misiona Kalefōnia ʻĀkatiá mei he 2005 ki he 2008, ʻo ne ngāue ai mo hono uaifi ko Sēini Situlingihami ʻOuení. Naʻá na mali ʻi he ʻaho 28 ʻo Tīsema 1979, ʻi he Temipale Polovo ʻIutaá. ʻOku ʻi ai ʻena fānau ʻe toko nima.
Naʻe fāʻeleʻi ia ʻi he ʻaho 22 ʻo Māʻasi 1958, ʻi Sōleki Siti, ʻIutā, kia Kōtoni mo Kalolaine ʻOueni. Naʻá ne ʻosi mei he ʻUnivēsiti ʻo ʻIutaá mo hono mataʻitohi ʻi he meʻa fakapaʻangá pea ko e palesiteni ia ʻo e Kautaha Great Harven Bread Company ʻi Polovo, ʻIutaá.