ʻEletā Von G. Keetch

Kōlomu ʻUluaki ʻo e Kau Fitungofulú

Naʻe hoko ko ha momeniti mahuʻinga fau ʻi he moʻui ʻa ʻEletā Voni G. Kītisí, ʻa e taimi naʻe kei ngāue fakakalake ai he fakamaauʻangá, fakataha mo e Fakamaau Lahi ko Warren E. Burger pea mo e Fakamaau ko Antonin Scalia ʻo e Fakamaauʻanga Lahi ʻa e ʻIunaiteti Siteití, ʻi he teuteu ke ne hū ʻo ngāue taimi kakato ki he meʻa fakalaó.

Naʻe lava ke ne ngāue ʻi ha faʻahinga kolo pē ʻi he ʻIunaiteti Siteití ʻi ha ngaahi kautaha ngāue fakalao lalahi. Ka naʻá ne lotua mo hono uaifi ko Pēnisi Pima Kītisí, ke ʻiloʻi e meʻa ke na faí. Hili haʻana fekumi, naʻe toe foki e ongomātuʻa ni ki Sōleki Siti, ʻIutā, ʻo ne ngāue ai ki he kautaha ngāue fakalao ko e Kirton McConkie.

Naʻe fakakaukau ʻa ʻEletā Kītisi he taimi ko iá ʻokú ne feilaulauʻi ʻene malava ke ngāue ʻi ha ʻeke fakalao lalahi kae kehe pē ke ne ofi ki hono fāmilí. Ka ʻi heʻene hoko ko ha fakahinohino lao pule ki he Siasí, naʻe taukaveʻi ai ʻe ʻEletā Kītisi, e ngaahi meʻa fakakonisitūtoné mo ha ngaahi hopo fekauʻaki mo e tauʻatāina fakalotú. Kuó ne fakafofongaʻi e meimei siasi fakalotu lalahi kotoa pē ʻi he fonuá. Naʻá ne pehē, “ʻOku ou manako he ngāue mo ha kautaha lalahi pea lava ke mau ngāue ki ha ngaahi meʻa mahuʻinga pehē.”

Naʻe fāʻeleʻi ʻa ʻEletā Kītisi ʻi he ʻaho 17 ʻo Māʻasi 1960, ʻi Polovo, ʻIutā kia Keuli mo Taiana Kītisi, pea ko e lahi taha ia ʻi he fānau ʻe toko fā. Naʻe nofo hono fāmilí ʻi ʻŌlemi, ʻIutā kimuʻa pea nau hiki ki Pelēseni Kolove, ʻIutā—ʻo ne ngāue fakataha ai mo e taʻahine te na malí ʻi he fakataha alēlea ki he semineli ʻo hona akoʻanga māʻolungá.

Naʻe ngāue ʻa ʻEletā Kītisi ʻi he Misiona Siamane Tāsolotofí pea naʻá ne ʻofa ʻi he kakai Siamané. Hili ʻene foki mei he malaʻe ngāue fakafaifekaú, naʻá ne mali mo Pēnisi Pimi ʻi he Temipale Sōlekí ʻi he ʻaho 21 ʻo Nōvema 1981; ʻoku ʻi ai ʻena fānau ʻe toko ono. Naʻe ʻosi e ako ʻa ʻEletā Kītsí mei he ʻUnivēsiti Pilikihami ʻIongí ʻi he 1984, mo hono mataʻitohi ʻi he saienisi fakapolitikalé pea maʻu mo hono mataʻitohi lao mei he ʻunivēsití ʻi he 1987.

ʻI hono hikinimaʻi ʻo ʻEletā Kītisi he ʻaho 4 ʻo ʻEpeleli 2014 ki he Kōlomu ʻUluaki ʻo e Kau Fitungofulú, kuó ne ngāue he kuohilí ʻi he kau pīsopelikí, aleaʻanga māʻolungá peá ne hoko ko ha palesiteni fakasiteiki mo ha Fitungofulu Fakaʻēlia.