Tokoni ʻa e Ngaahi Uepisaiti

Ko e hā ʻoku fai ʻe he Kāingalotu ʻi he Ngaahi ʻAho Kimui Ní ke toe lelei ange ʻa e tukui kolo ʻoku nau nofo aí? ʻIlo ki ai, ʻaki hoʻo hū ki he MormonNewsroom.org. Ko ha ngaahi sīpinga ʻeni mei he ngaahi talanoa ne toki tuku mai he ngaahi uepisaiti ongoongo fakavahaʻapuleʻangá.

Nuʻu sila mo Vanuatu

ʻI hono tō mai ʻa e Afā ko Pam ki he kiʻi motu ko Vanuatú ʻi he Pasifikí, naʻe ngāue fakataha e Kāingalotu ʻi ʻOkalani, Nuʻu Silá—mo e tokoni mei he Ngaahi Tokoni ʻOfa Fakaetangata ʻa e Siasí—ke faitokonia ʻa kinautolu ne maʻutangī ʻe he matangí. Ne nau faʻo ha fanga kiʻi puha meʻakai ʻe 2,000 ke tokoni ki he tokolahi taha ʻe ala lavá. Naʻe fakafonu e hina takitaha ʻaki ha mahoaʻa, laise, ʻū kapa fuaʻiʻakau, piini, kapa pulu, kapa ika, mā pakupaku, fuamelie, nūtolo, efuefu sokoleti huʻakau mo ha meʻa hae kapa. ʻE lava ke fakaʻaongaʻi e ʻū hiná ki ha ngaahi taumuʻa kehe, hangē ko e ʻutu vaí.

Lepupelika Tominikení mo Kānata

ʻI he Lepupelika Tominikení mo Kānatá, ne kau fakataha ʻa e kakai fefine ʻo e Siasí ʻi hono fakamanatu e ʻAho Fakavahaʻapuleʻanga ʻo e Kakai Fefiné, ko ha polokalama naʻe fakapaʻanga ʻe he Ngaahi Puleʻanga Fakatahatahá. Ne fakataha hake ha kakai fefine ʻe toko 1,200 tupu ki he ngaahi ʻapisiasí ʻi ha ngaahi feituʻu kehekehe ʻi he Lepupelika Tominikení ke fakalāngilangiʻi e kakai fefiné ko ʻenau ngaahi tokoni lahi ki he māmaní. Ne kau atu e kau taki fakalotú, fakapuleʻangá mo fakakautaú ki he polokalamá, ʻa ia naʻe kau ai ha polokalama hiva mo ha ʻū lea. ʻI Kānatá, naʻe fakaʻilongaʻi foki ʻe he kau fafine Siasí e ʻahó ʻaki haʻanau vahevahe atu ha ngaahi fakamatala fekauʻaki mo e Fineʻofá, ʻo pehē ko ha “founga fisifisimuʻa ia ʻo e tokoní ʻi he foʻi kolopé.”

Pilitānia

Ko ʻenau tefitoʻi taumuʻá ke teuteu ha ʻū kofu ʻe 100 maʻá e fānau faingataʻaʻia ʻi ʻAfiliká, ka ʻi heʻene ʻosí, ne laka hake he ʻū kofu ʻe 230 ia ne lavaʻi ʻe he kau fafine ʻo e Uooti Kovenitolí ʻi ʻIngilani. Ko e fanga kiʻi kofu sīpinga faingofuá ni ne faʻu ia mei he ʻū tangai piló pea faingofua hono tuituí. Naʻe lava ʻe ha fefine ia ne teʻeki ai poto he tuituí ʻo ngaohi ha kiʻi kofu ʻe 3.

ʻĀkenisoa, USA

Ne feʻunga mo ha kakai ʻe toko 600 tupu ne nau kau atu ki ha fakataha lotu ʻa e ngaahi tui fakalotu kehekehé ʻi he kaveinga ko e tauʻatāina fakalotú ʻi he Siteiki Lito Loka ʻĀkenisoá, kau ai ha kau fakafofonga mei he Katoliká, Metotisí mo e tui faka-ʻIsilamí kae pehē ki ha taha mei he letiō faka-ʻEvangelioó. Naʻe kau foki he polokalama tuifio ʻo e ngaahi tui fakalotú, ha pōpoaki vitiō mei he lafitani kōvana ʻo e siteití pea mo ha lotu tuku ne fai ʻe ha senato ʻo e siteití, ʻokú na fakatou kau he siasi Papitaisó. Naʻe pehē ʻe he kau fokotuʻutuʻu polokalamá naʻe hanga ʻe he polokalamá ni ʻo langa ha “halafakakavakava ʻo e mahinó.”