ʻEletā Vern P. Stanfill

Kōlomu ʻUluaki ʻo e Kau Fitungofulú

Naʻe tui ʻa ʻEletā Veni Paulo Sitenifila ʻoku ʻikai ha meʻa ia ko e hoko-noa-pē. ʻOkú ne tui ʻoku ʻi ai ha ngaahi fetaulakiʻanga ʻi he moʻuí ni, ʻi he vahaʻa ʻo e kakaí ʻi ha taumuʻa pea ʻe lava ke ueʻi fakalaumālie ʻe he ʻEikí ʻa ʻEne fānaú ke nau faitāpuekina ha niʻihi kehe.

ʻOku fiefia ʻa ʻEletā Sitenifila he tokoni ki he niʻihi kehé ʻi he ongoongoleleí, tautautefito ki he ngāue fakatāutaha mo e kakaí.

Naʻe fāʻeleʻi ia ʻi he ʻaho 8 ʻo ʻAokosi 1957, kia Seti mo Peki Sitenifila, pea naʻá ne tupuhake ʻi ha faama pulu ofi ki Tauniseni, Monitana. Naʻá ne ako e mahuʻinga ʻo e ngāue mālohí mo hono fakatupulaki ʻo ha fakamoʻoni ki he Fakamoʻui ko Sīsū Kalaisí. Ko ʻEletā Sitenifilá, ko e fika tolu ia ʻi ha fānau ʻe toko fā, pea ʻoku ngāue faivelenga hono ongo taʻoketé mo hono tuofefiné ʻi he Siasí.

Naʻá ne pehē “ʻOku kau mai e toʻukupu ʻo e ʻEikí ki heʻetau moʻuí neongo hotau ngaahi vaivaí.” “ ʻOku ʻikai ke u haohaoa mo hoku uaifí. ʻOku ʻikai haohaoa homa fāmilí. Ko ha kakai angamaheni pē kimaua ʻoku feinga ke moʻui fakaʻaho pea tuku ki he ʻEikí ke kau mai ki ai.”

Hili ʻene ngāue fakafaifekau taimi kakato ʻi Tūlusi, Falaniseé, pea maʻu hono mataʻitohi fakaʻekonōmika ʻi he ngoué mei he ʻUnivēsiti Pilikihami ʻIongí, naʻá ne fetaulaki peá na mali mo ʻAlisi Koka. Naʻá na mali ʻi he ʻaho 17 ʻo Tīsema 1980, ʻi he Temipale Sōlekí.

Hili ʻene ʻosi mei he akó, naʻe toe foki ʻa e fāmili Sitenifilá ki Monitana ke ne lava ʻo fakalele e faama ʻa e fāmilí, ʻo fakalele e ngāue he tafaʻaki ki he fanga pulú, mohuku mōmoá mo e kēlení. Naʻá ne fakatau atu e pisinisí ʻi he 1998 peá ne kamata ngāue leva ki he fakatau kelekelé mo e meʻa fakapaʻangá, kae pehē ki hano fokotuʻutuʻu ha ngaahi kautaha tokoni ʻofa mo e meʻa fakakelekelé.

Naʻe kau e fefolauʻaki vakapuná he pisinisi mo e meʻa fakafiefia ne kau ai ʻa ʻEletā Sitenifila pea ʻokú ne maʻu fakaʻilonga he puna fakakomēsialé mo e helikopetá.

Makehe mei hono ohi hake ʻe ʻEletā ha fānau fefine ʻe toko faá, naʻá ne maʻu faingamālie foki ke ngāue ʻi he Siasí ko ha palesiteni kōlomu kaumātuʻa, pīsope, aleaʻanga māʻolunga, palesiteni fakasiteiki mo ha Fitungofulu Fakaʻēlia. Naʻá ne ngāue ʻi he Kōlomu hono Ono ʻo e Kau Fitungofulú ʻi he taimi naʻe uiuiʻi ai ia ki he Kōlomu ʻUluakí.