ʻEletā Allen D. Haynie
Kōlomu ʻUluaki ʻo e Kau Fitungofulú
Naʻe hikinimaʻi ʻa ʻEletā ʻĀlani Teka Haini ko ha mēmipa ʻo e Kōlomu ʻUluaki ʻo e Kau Fitungofulú ʻi he ʻaho 4 ʻo ʻEpeleli 2015.
Naʻe fāʻeleʻi ʻa ʻEletā Haini ʻi he ʻaho 29 ʻo ʻAokosi 1958, kia Veni Loiti pea mo Sela Lulu Luisi Haini.
Naʻe fāʻeleʻi ia ʻi Lōkani, ʻIutā, ka naʻe lahi ange taimi naʻe tupu hake ai ʻi he ngaahi kolo kehe he fakatokelau ʻo ʻIutaá, mo e Teleʻa Silikoni ʻo Kalefōniá. Naʻá ne ako ʻi ha ʻapiako lautohi siʻi kehekehe ʻe nima, ako lotoloto ʻe ua pea mo ha ako māʻolunga ʻi Paunitifulu, ʻIutā.
Naʻá ne pehē, naʻe hanga ʻe he“ngaahi aʻusia kehekehe ko ʻení ʻo akoʻi kiate au ha lēsoni maʻongoʻonga ke u fakahoungaʻi e tokotaha kotoa pē, ka naʻe hangē ne u fetongitongi feituʻu pē au mo toe fetaulaki mo ha ngaahi kaungāmeʻa foʻou he taʻu kotoa pē.” Ko e taha ʻo e ngaahi meʻa ʻoku ou ʻofa ai ki he Siasí ko ʻene ʻomai ha faingamālie ke feohi mo e kakaí pea fakamahuʻingaʻi honau puipuituʻá, taukeí, talēnití mo e meʻa kehekehe ʻoku nau malavá.”
Naʻá ne ngāue ʻi he Misiona Kolotopa ʻĀsenitiná mei he 1977 ki he 1979.
Naʻe maʻu e mataʻitohi bachelor ʻo ʻEletā Hainí ʻi he saienisi fakapolitikalé mei he ʻUnivēsiti Pilikihami ʻIongí, peá ne hoko atu ai ʻo maʻu hono mataʻitohi toketā mei he Akoʻanga Lao J. Lūpeni Kalaké ʻi he 1985.
Naʻá ne ngāue fakakalake ʻi he fakamaauʻangá ʻi he Fakamaauʻanga Tangi U.S. Ninth Circuit Court ʻi Seni Tieko, Kalefōniá kimuʻa peá ne toki ngāue he kautaha lao ko e Lathan and Watkins, ʻo ngāue pē mei he ʻōfisi Seni Tiekó. ʻI he taʻu ʻe nima nai kuohilí, naʻá ne fokotuʻu ai mo hono tokouá haʻana kautaha ngāue fakalao.
Naʻe hoko foki ʻa ʻEletā Haini ko ha palesiteni kōlomu kaumātuʻa, palesiteni ʻo e Kau Talavoú he uōtí, faiako semineli, aleaʻanga māʻolunga, pīsope, palesiteni fakasiteiki mo e Fitungofulu Fakaʻēlia.
Naʻá ne fetaulaki mo e Tēpola Lute lolotonga ʻene ako ʻi BYU, pea naʻá na mali ʻi he ʻaho 19 ʻo Tīsema 1983, ʻi he Temipale Sōlekí. ʻOku ʻi ai ʻena fānau ʻe toko ono.
Naʻe loʻimataʻia ʻa ʻEletā Haini heʻene fakamatala fekauʻaki mo ʻene fakamoʻoní heʻene ʻuluaki lau mo fakaʻilongaʻi e Tohi ʻa Molomoná heʻene kei taʻu 12. “ʻOku ʻikai ke u manatuʻi ha taimi ne teʻeki ke u tui ai; ʻoku ʻikai ke u manatuʻi ha taimi naʻe teʻeki ai ke u lotu ai.”