M. Joseph Brough

Tokoni Ua ʻi he Kau Palesitenisī Lahi ʻo e Kau Talavoú

ʻI he taʻu ʻe tolu naʻe hoko ai ʻa M. Siosefa Palafu ko e palesiteni ʻo e Misiona Kuatemala Kuatemala Siti Lotolotó (mei he 2011 ki 2014), naʻe fakatou mālōlō ai ʻa ʻene tamaí mo ʻene tamai ʻi he fonó.

Neongo naʻe malava ke foki mai hono uaifí ki he ʻIunaiteti Siteití ki he ongo meʻafakaʻeikí ni, ka naʻe fili e ongomātuʻá ni te na nofo ʻi Kuatemala ʻo hoko atu ʻena ngāue fakafaifekaú. “Naʻá ma ʻiloʻi ʻe lelei ange ke ma nofo ʻo ngāue ki he lelei taha te ma lavá,” ko e lea ia ʻa Misa Palafu, naʻe uiuiʻi he ʻaho 4 ʻo ʻEpeleli 2015, ko e tokoni ua ʻi he kau palesitenisī lahi ʻo e Kau Talavoú. “Ko e meʻa tofu pē ia naʻe mei fie maʻu heʻema ongo tamaí.”

Naʻe fāʻeleʻi ʻa Misa Palafu ʻi Sōleki Siti, ʻIutā, ʻi he ʻaho 11 ʻo Tīsema 1963, kia Monitī J. mo ʻAita B. Palafu. Naʻá ne tupu hake heʻene kei talavoú ʻi Fāmingitoni, ʻIutā pea mo Lōpetisoni, Uaiōmingi. Naʻe hiki e fāmilí ki Minesota ʻi he taimi naʻe ui e tamai ʻa Siosefá ke palesiteni fakamisioná, pea naʻe toki ui ia kimui ke hoko ko ha mēmipa ʻo e Kau Fitungofulú. Ko e taʻu fakaʻosi ia ʻo Siosefa he ako māʻolungá, he taimi naʻe kakato ai e hoko ʻene tamaí ko ha palesiteni fakamisioná. Naʻe ʻikai toe foki ki he ako māʻolungá, ka naʻá ne sivi he sivi tatau pē mo ia ne fai he ako māʻolungá peá ne hū hangatonu pē mei ai ki he ʻUnivēsiti Weber State, ʻi ʻOkiteni, ʻIutā.

Ka naʻe loto ʻene ongomātuʻá ke ne fakakakato ʻene seminelí ke maʻu ʻene tohi fakamoʻoni taʻu ʻe faá. Lolotonga ʻene ako semineli ʻi he ʻApiako Davis High, naʻá ne fetaulaki ai mo e taʻahine te na malí, ko ʻEmelī Sēini Tomisoni. Ne na mali ʻi he ʻaho 25 ʻo ʻEpeleli 1985, ʻi he Temipale Sōlekí; pea ʻoku ʻi ai ʻena fānau ʻe toko fā.

Kimuʻa pea mali e ongo meʻá ni, naʻe ngāue fakafaifekau ʻa Misa Palafu ʻi he Misiona Kuatemala Kuetisatenangó. Naʻá ne pehē, naʻe hoko ʻene palesiteni fakamisiona ko Hōsea H. Pelesí, ko e “ivi takiekina lahi taha ʻi heʻeku moʻuí.”

Naʻá ne fokotuʻu pea ʻaʻana ʻa e kautaha Rotational Molding ʻo ʻIutaá, pea naʻe maʻu hano mataʻitohi bachelor ʻi he meʻa fakapaʻangá mo e fakalele pisinisí mei he ʻUnivēsiti ʻo ʻIutaá. Kuó ne hoko he Siasí ko ha pīsope, palesiteni ʻo e Kau Talavoú ʻi he uōtí pea mo ha aleaʻanga māʻolunga.