Ngaahi Kongokonga Lalahi mei he Konifelenisi Lahi Fakataʻu hono 187

ʻOku tau fakataha mai ʻi he māhina ʻe ono kotoa pē ke fanongo ki he folofola ʻa e ʻOtuá, ʻo fakafou mai ʻi he kau palōfita moʻui mo e kau taki ʻo e Siasí kuo ueʻi fakalaumālié. ʻOku fakatahataha ha laumiliona ʻi he funga ʻo e māmaní ʻi he ngaahi ʻapi pe falelotu, ʻi he ngaahi taimi mo e lea fakafonua kehekehe, ʻo nau fakaʻaongaʻi ha kalasi kehekehe ʻo e ngaahi screen.

Ka ʻoku mahulu hake ʻa e konifelenisi lahí ʻi ha meʻa pē ʻoku hoko. Ko ha aʻusia ia ʻe lava ke tolonga ʻo fakatatau mo ʻetau fie maʻú. Ko e konifelenisí ko ha meʻa ʻoku tau ako ki ai, ako mei ai, pea moʻui ʻaki.

Ke tokoni kiate koe ʻi hoʻo aʻusia ki he konifelenisi, ʻoku mau feinga ke pukepuke ʻa e laumālie ʻo e konifelenisí ʻi he makasini ko ʻení ʻi he māhina ʻe ono kotoa pē. Neongo pe ʻokú ke saiʻia ange hono ako e konifelenisí ʻi he pākí, ʻinitanetí, pe ʻi he telefoni toʻotoʻó, ʻoku mau ʻamanaki ko ha matavai ia te ke toutou foki ʻo ako ai.

ʻOku Mau Fakamālō ki he ʻOtuá ko ha Palōfita

Peesi 86: Ke fakamālohia ho fakamoʻoni ki he Fakamoʻuí pea mo ʻEne ongoongoleleí, ʻoku kole mai ai ʻe Palesiteni Thomas S. Monson ke tau “ako mo fakalaulauloto fakaʻaho ki he Tohi ʻa Molomoná ʻi he faʻa lotu.”

Peesi 66: ʻOkú ne ui foki mo e kakai tangatá ke nau vakavakaiʻi ʻenau moʻuí pea “muimui he sīpinga angaʻofa, ʻofa mo manavaʻofa ʻa e Fakamoʻuí.”

Fanongonongo ha Temipale Foʻou

Peesi 86: Naʻe fanongonongo ʻe Palesiteni Monson ha ngaahi temipale foʻou ʻe nima ke langa ʻi Palasīlia, Palāsila; ʻēlia greater Manila, Filipaini; Nailopi, Kēnia; Pokatelo, ʻAitahō, USA; pea mo Salatoka Springs, ʻIutā, USA. (Vakai ki he peesi 141 ki ha toe fakamatala lahi ange.)

Hikinimaʻi ha Kau Takimuʻa Foʻou

Peesi 43: ʻI he ʻaho Tokonaki, ko hono 1 ʻo ʻEpelelí, naʻe fanongonongo ai ʻe he Kau Palesitenisī ʻUluakí ʻa hono tukuange ʻo e Kau Palesitenisī Lahi ʻo e Fineʻofá: Linda K. Burton, Carole M. Stephens, and Linda S. Reeves.

Peesi 135: Toe ako lahi ange ki hono ui ʻo ha kau taki lahi faka-Siasi, kau ai e Kau Palesitenisī Lahi ʻo e Fineʻofa foʻoú.

Toe Vakaiʻi e Fanongonongó

Takafi ʻi lotó: Naʻe tokolahi ha kau lea ne nau lea kau ki he “Ko e Kalaisi Moʻuí” mo e “Ko e Fāmilí: Ko Ha Fanongonongo ki Māmani” (vakai ki he peesi 26, 36, 39, 62, mo e 100). Te ke lava ʻo ʻiloʻi ʻa e ngaahi tohi mahuʻingá ni ʻi he takafi ʻi loto ʻo e makasini ko ʻení.