Sharon Eubank
Tokoni ʻUluaki ʻi he Kau Palesitenisī Lahi ʻo e Fineʻofá
Naʻe sio tonu ʻa Sharon Eubank ʻi he fakamamahí, lotomamahí, mo e mamahí, ʻi heʻene hoko ko e tokotaha ngāue ʻi he Potungāue Tokoni ʻofa Fakaetangata ʻa e Siasí, pea ne faingataʻa ai ke ngāue. ʻI heʻene lotú naʻe mahino kiate ia, neongo ʻe lava ʻo tokoni ki he ʻEikí ʻi hono tokangaʻi ʻo ʻEne fānaú, ka ʻoku ʻikai ke ne pule ki he mamahi ko iá. “Ko Sīsū Kalaisi ʻoku pulé. Te Ne fuesia ʻa e kavenga ko ʻení. Ko Hono kakai ʻa kinautolu, pea ʻokú Ne ongoʻi mo tali ʻenau lotú.” Naʻe liliu ʻe he tali ko iá ʻa ʻene malava ke ala atu ʻo tokoní.
Hili ha ngaahi taʻu mei ai, kuo ʻoatu ai ʻe Sisitā Eubank ko e talēkita ʻo e ngaahi kautaha tokoni ʻofa ʻa e Siasí—ʻa ia ko e kupu tokoni ʻofa fakaetangata ʻo e Siasí—ha ngaahi tokoni mo fakaʻaiʻai e moʻui fakafalala pē kiate kitá kiate kinautolu ʻoku masiva ʻi he funga ʻo e māmaní.
Naʻe fokotuʻu ʻi he ʻaho 1 ʻo ʻEpeleli 2017, ki he Kau Palesitenisī Lahi ʻo e Fineʻofá, pea ʻe kei hoko atu pē ʻi hono fatongia ko e talēkita ʻo e Ngaahi Kautaha Tokoni ʻOfa ʻa e Siasí. Naʻá ne pehē, ʻoku ʻi ai ha “fehokotaki lahi” ʻi he vahaʻa ʻo e Ngaahi Kautaha Tokoni ʻOfa ʻa e Siasí mo e Fineʻofá, ʻa ia ʻoku kau e Kau Palesitenisī Lahi ʻo e Fineʻofá ʻi he poate ʻo e kau talēkita ki he Ngaahi Kautaha Tokoni ʻOfa ʻa e Siasí. ʻE fakamālohia e fehokotaki ko iá, ʻe hono fatongia ʻi he ongo kautahá.
Naʻe fāʻeleʻi ʻa Sharon ʻi he 1963 ʻi Letingi ʻi Kalefōnia, USA, ko e lahi taha ia ʻi he fānau ʻe toko fitu ʻa Maʻake mo Jean Eubank. Naʻe tupu hake ʻa Sisitā Eubank ʻi Paunitifulu, ʻIutā, ʻi ha faama ʻeka ʻe 10 (hekitā ʻe 4) ʻa ia naʻe toli ʻepilikoti ai e fānau Eubank, fakaleleiʻi e meʻa fuʻifuʻi ngoué, mo ofi ki he ʻotu moʻunga ʻo ʻIutaá.
Naʻe maʻu ʻe Sisitā Eubank hono mataʻi tohi BA ʻi he lea faka-Pilitāniá mo e Hisitōliá mei he ʻUnivēsiti Pilikihami ʻIongi ʻi Polovó, ʻi ʻIutā, pea ngāue fakafaifekau ʻi he Misiona Finland Helsinki.
Makehe mei heʻene ngāue mo e Potungāue Uelofea ʻa e Siasí, naʻe ngāue ʻa Sisitā Eubank ʻi Captol Hill ʻi Uāsingatoni D.C., USA, naʻá ne kaungā fokotuʻu mo ha taha kehe ha kautaha pisinisi iiki, pea naʻe nofo ʻi Siapani mo Falanisē.
Ko e faingamālie kotoa pē naʻe hoko ko ha “tui taʻeʻiloa” ʻa ia naʻe tokoniʻi ai ia ke ne ako ha ngaahi pōtoʻi ngāue foʻou ʻokú ne fakaʻaongaʻi ʻi he ʻahó ni, lava ai ke feʻiloaki mo ha kakai lelei ʻi loto pea ʻi tuʻa mei he Siasí, peá ne maʻu ai ha manako mo e houngaʻia ki he ngaahi anga fakafonua, ngaahi lea fakafonua, mo ha ngaahi meʻakai lahi ʻi he māmaní.