ʻEletā Taylor G. Godoy
Fitungofulu Taki Māʻolunga
ʻI ha ngaahi taʻu kimuʻa pea ne aʻu ki he lelei taha ʻo ʻene ngāué, ne pau ai ke fai ʻe ʻEletā Taylor G. Godoy ha fili mahuʻinga ʻi heʻene moʻuí.
Naʻá ne lolotonga hoko ko ha toketā nifo, fokotuʻu ʻene pisinisi, mo hanganaki ki hano kahaʻu ʻi he tafaʻaki fakaako hono akoʻi ʻa e tafa nifó. Ka naʻe fakaafeʻi ia ʻe ha taki lakanga fakataulaʻeiki ʻofeina mo falalaʻanga ke ngāue ʻi he Seminelí mo e ʻInisititiutí.
Ko ha fili mālie ki ha toketā nifo kei talavou ne fokotuʻu ʻi he ʻaho 1 ʻo ʻEpeleli 2017 ko ha Fitungofulu Taki Māʻolunga, ke mavahe mei ha ngāue maʻuʻanga moʻui tupulaki. Naʻe fifili ha tokolahi hono kaungā ngāué, pe ko e hā kuo ne liʻaki ai ʻene maʻuʻanga moʻuí ʻi heʻene hoko ko e toketā nifó.
Naʻá ne pehē, “Ka naʻá ku ʻiloʻi ko e fili totonú ia”. ʻOku fakamahino ʻe he faʻahinga tui faivelenga peheé ʻa e ului ki he Siasí. Kuo ʻosi fakamoʻoniʻi ʻa e hoko hono tokoniʻi ʻo e niʻihi kehé mo hono ʻiloʻi mo ʻofa ʻi he ongoongoleleí, ko ha faingamālie mo ha tāpuaki ki he moʻuí.
Lolotonga e ngāue ʻa ʻEletā Godoy ʻi he ako ʻa e Siasí, naʻá ne hoko ai ko ha faiako, kouʻōtineita, talēkita, mo ha talēkita fakafonua ʻi he ʻinisititiutí. Ko ʻene ngāue fakamuimui tahá, ne hoko ai ko e talēkita fakaʻēlia ʻo e Seminelí mo e ʻInisititiutí ʻi he Tokelau Hihifo ʻo ʻAmelika Tongá.
Naʻe fāʻeleʻi ʻa Taylor Guillermo Godoy Atanacio ʻi Lima ʻi Pelū ʻi he 1968, kia Taylor Godoy mo Adalzahinda Atanacio. Naʻe mālōlō ʻene tangataʻeikí ʻoku kei tamasiʻi siʻi, pea ohi hake leva ia ʻe Elias Rebaza ko e mali ua ʻo ʻene fineʻeikí. Naʻe kau ʻa ʻEletā Godoy ki he Siasí ʻi hono taʻu 17.
Naʻe foki ki hono kolo tupuʻanga ko ʻAlekuipá ʻi he hili ʻene ngāue fakafaifekau he Misiona Peru Lima North. Naʻe kaumeʻa ai mo ha finemui ko Carol Pacheco. Naʻe mali e ongo kaungā uluí ni ʻi he Temipale Lima Peluú he ʻaho 31 ʻo Mē 1994. Ko ha ongomātuʻa kinaua ki ha fānau ʻe toko ua.
Naʻe maʻu ha mataʻitohi BA ʻo ʻEletā Godoy ʻi he ngāue ki he nifó mei he ʻUnivēsiti Katolika ʻo Sanita Maliá ʻi he 1993, mo ha mataʻitohi MA ʻi he Tuʻunga Fakapulé mei he ʻUnivēsiti Fakatekinikale ʻo Metulití ʻi he 2006.
Kuó ne hoko ko ha pīsope, alēleaʻanga māʻolunga, palesiteni fakasiteiki, talēkita fakaʻēlia ʻo e fetuʻutaki mo e kakaí, mo ha Fitungofulu Fakaʻēlia.