Ngaahi Nāunau mo e Ngaahi Maʻuʻanga Tokoni Foʻou

Ko ha fakamatala nounou ʻeni ki ha ngaahi koloa mo ha ngaahi maʻuʻanga tokoni foʻou ne toki tuku mai ʻe he Siasí.

Ngaahi tohi talanoa folofola mo e tohi valivali. ʻOku tuku atu ʻe he Siasí ha ngaahi maʻuʻanga talanoa folofola foʻou, ʻo kamata ʻaki ha ngaahi tohi valivali naʻe faʻu maʻá e fānau taʻu 2–8, ke poupouʻi e ako folofola fakatāutahá mo e fakafāmilí. ʻOku maʻu ha ngaahi tatau PDF taʻetotongi ʻi scripturestories.lds.org, pea ʻe lava ke ʻota ha ngaahi tatau kuo paaki ʻi he store.lds.org pea mo e ngaahi senitā Tufakiʻanga Nāunaú.

ʻE liliu ʻa e ngaahi tohi valivalí ki he ngaahi lea fakafonua ʻoku ʻi ai haʻanau tatau ʻo e folofola ʻa e Siasí. ʻE maʻu ʻa e ngaahi tatau kuo liliú ʻi he 2017, ʻo kamata ʻi he lea faka-Sipeiní, Potukalí, Falaniseé, Siapaní, Kōleá, Siainá (motuʻá), Siamané, Lūsiá, mo e ʻĪtalí.

Ngaahi Folofolá Kuo ʻosi fanongonongo ʻe he Kau Palesitenisī ʻUluakí ha liliu foʻou ʻo e folofola ʻe tolu ʻa e Siasí he lea faka-Falaniseé, ʻe maʻu ʻi he écritures.lds.org mo e Gospel Library mobile app. ʻOku kau ʻi he liliú ha fanga kiʻi fetongi ʻo e fakaleá ʻi he taha ʻo e ngaahi lotu tāpuaki ʻo e sākalamēnití. Ne nau toe fanongonongo foki ʻoku maʻu ʻi he ʻinitanetí ha liliu ʻo e folofola ʻe tolú ʻi he lea faka-Koloesiá. Kuo ʻosi tukuatu foki mo e tatau kuo pulusi ʻo e folofola ʻe tolú ʻi he lea faka-Koloēsiá, Lūsiá, mo e ʻAisilenitikí.

Tokoni ki he ngaahi fāmili ʻoku fekuki mo e femanakoʻaki fakaetangata pe fakaefefiné. ʻOku maʻu atu e ngaahi maʻuʻanga tokoni ʻi he uepisaiti foʻou ko e mormonandgay.lds.org ke tokoniʻi e kāingalotú ke nau fakaalaala mo faʻa fakakaukauʻí ʻenau talí ʻi he taimi ʻoku nau fehangahangai ai mo e femanakoʻaki fakaetangata pe fakaefefine ʻi honau fāmilí, ʻi he kau mēmipa kehe ʻo e Siasí, pe ha toe feituʻu, pea mo ha fakamatala fakamuimui taha ʻi he Tefito ʻo e Ongoongoleleí ʻi he femanakoʻaki fakaetangata mo fakaefefiné (ʻi he lea faka-Pilitāiniá), kau ai mo ha ngaahi fehuʻi ʻoku faʻa fai pea mo e ngaahi akonaki ʻo e Siasí.

Gospel Library App Fakamuimui Tahá. Naʻe toki tukuange mai ha app fakamuimui taha ki he iOS mo e Android fakatouʻosi, ʻa ia ʻoku fakaʻaongaʻi ʻe he kāingalotu he funga ʻo e māmaní ki he ako e folofolá, ngaahi lea ʻo e konifelenisi lahí, mo e ngaahi nāunau kehe. ʻI he faʻahinga hono 4, ʻoku faingofua ange e ngaahi meʻangāue akó, fenāpasi ange e ʻatá mo e ngāué, pea ʻoku maʻu foki mo ha fakahinohino fakavitiō foʻou. Koeʻuhi ʻoku malava he taimí ni ʻa e fakaʻilonga ʻi he kanotohí, te ke lava ke fakaʻilongaʻi, tānaki atu ha fakamatala, link, tag, mo fokotuʻutuʻu ʻa e kano tohí ke hoko ko ha tohi fakamatala. Te ke lava ʻo fakaʻilongaʻi ʻa e vitioó, ʻuluʻi tohi ʻo e vahé mo e tokoni ki he akó, ngaahi lisi ʻi ha ngaahi tohi lēsoni ʻe niʻihi, ngaahi himí mo e ʻū hiva ʻa e Palaimelí, pea toe lahi ange.

LDS Tools App Fakamuimui Tahá ʻOku fakafaingofuaʻi ʻe he polokalama 3.2.0 ʻo e LDS Tools mobile app ʻa e ʻalu ki he temipalé. ʻOku fakangofua ʻe he ngaahi meʻa ne toki tānaki maí ke lava ʻa e kāingalotú ʻo sio ki he temipale ʻoku nau filí, fekumi ki he ngaahi temipale ʻe nima ofi tahá, fetuʻutaki ki ha temipale pe ʻilo e taimi ʻe tāpuni aí, mo fakamanatu ange kimuʻa ʻoku teʻeki ʻosi e taimi ʻo ʻenau lekomení.