ʻEletā Taniela B. Wakolo

Fitungofulu Taki Māʻolunga

Kuo fakatapui ʻe ʻEletā Taniela Biu Wakolo ʻa e ʻaho kotoa ʻo ʻene moʻuí, talu hono papitaiso ia ʻi Māʻasi 1994, ke ngāue maʻá e ʻEikí.

Naʻe fāʻeleʻi ia ʻi he 1967 ʻi he kiʻi motu siʻisiʻi ko Lomaloma he ʻOtu Laú ʻi Fisi, kia Taniela Vosa mo Temalesi Buadromo Wakolo, ko ʻEletā Wakolo ko e siʻi taha ia ʻi ha fānau ʻe toko ono. Naʻá ne pehē, “Ne u tupu hake ʻi ha kiʻi ʻapi masiva ʻaupito, ka ne mau tuʻumālie ʻi heʻemau feʻofaʻakí.”

Naʻe mavahe ʻa ʻEletā Wakolo mei he ʻapi ʻo ʻene ongomātuʻá ʻi hono taʻu 12, ke ako nofomaʻu fakataha mo ha kau talavou ʻe toko 500 tupu, ʻi he taʻu 12 ki he 19. Naʻá ne pehē, “Ko ha akoʻanga lelei lahi ia kiate au.” “Ko e feituʻu ia naʻá ku ako ai ʻa e mapuleʻi kitá.”

Naʻe ʻeva ai kia Anita Herberta Moimoi, ko ha tokotaha papi ului foʻou, ʻo laka hake ʻi ha taʻu ʻe taha. Naʻá na mali ʻi he ʻaho 22 ʻo ʻAokosi 1987, ʻi Suva, Fisi.

Naʻe ʻikai ke ului vave ʻa ʻEletā Wakolo, pea ʻi he ʻuluaki taʻu ʻe valu ʻo ʻena nofomalí, naʻe talanoa mo ha kau faifekau tokolahi. Naʻá ne pehē, “Naʻe tuʻo fā hono akoʻi kakato au ʻi he ngaahi lēsoni [fakafaifekaú] ʻi he taʻu ʻe valu”. “Ko ha kau faifekau ia ʻe toko 24.”

Ko ha kiʻi foʻi fehuʻi faingofua mei ha taha ʻo e kau faifekau ko iá fekauʻaki mo e hingoa ʻo e Siasí, ʻa ia naʻá ne liliu ʻene fakakaukau kau ki he papitaisó. Naʻá ne pehē “ʻOku fie maʻu ke fakahingoa ʻa e Siasí ki he taha ʻoku ʻoʻoná”. “Ko e meʻa tonu ia naʻá ne liliu ʻeku fakakaukaú.”

Naʻe silaʻi ‘a ʻEletā Wakolo mo hono uaifí ʻi he Temipale Nukuʻalofa Tongá he 1995. Ko ha ongomātuʻa kinaua ki ha fānau ʻe toko ua.

Naʻe muimui mai ha ngaahi faingamālie ngāue ʻi he ʻosi hono papitaisó. Hili ha uike ʻe ua mei hono papitaisó, kuo ui ia ki he kau palesitenisī ʻo e Kau Talavou ʻi he uōtí, peá na kaungā faiako mo hono uaifí ʻi he seminelí. Teʻeki ke ʻosi ha taʻu ʻe taha, kuó ne tali e ui ke ne hoko ko e palesiteni fakakolo. Naʻe hoko kimui ko ha tokoni ʻi he kau palesitenisī fakasiteikí, palesiteni fakasiteiki, mo e Fitungofulu Fakaʻēlia. Naʻá ne lolotonga hoko ko e palesiteni he Misiona Arkansas Little Rock, ʻi he taimi naʻe ui ai ia ko e Fitungofulu Taki Māʻolungá.

Naʻe ako ʻa ʻEletā Wakolo ki he puleʻi ʻo e ngāué mo e kakaí pea maʻu hono mataʻitohi MA ʻi he puleʻi e ngāué. Ko ʻene ngāue fakamuimuitahá ko ʻene hoko ko e pule ʻi he Senitā Tokoni ʻa e Siasí ʻi Fisí.