Reyna I. Aburto
Tokoni Ua ʻi he Kau Palesitenisī Lahi ʻo e Fineʻofá
Naʻe fāʻeleʻi ‘a Sisitā Reyna I. Aburto ʻi Manākuá, ʻi Nikalākuá, kia Noel Blanco mo Delbi Cardoza ʻi he 1963. Naʻe pehē ʻe Sisitā Aburto, “Naʻe ngāue mālohi maʻu pē ʻeku ongomātuʻá ke na lava ʻo tauhi kimautolu.” “Naʻá ku moʻui fiefia ʻi heʻeku kei siʻí.”
ʻI heʻene kei taʻu hivá, naʻe tō ai ha mofuike ʻi Manākuá ʻi he hili siʻi pē tuʻuapoó he ʻaho 23 ʻo Tīsema 1972. “Naʻá ku hao he naʻe ʻi ai ha konga nāunau fale ʻi hoku tuʻá, ka naʻe ʻefihia hoku ongo vaʻé.” Naʻe ō mai e kaungāʻapí ʻi heʻenau fanongo ki heʻene kaikaila mo ʻene fineʻeikí, ke fakahaofi kinaua mei he fale ne holó. Naʻa nau maʻu e sino ʻo siʻono tuongaʻane lahí ʻi he funga moheʻanga ʻi hono tafaʻakí, ʻi he fale kuo holofá. Naʻá ne pehē “ko e ngaahi koloa fakaemāmaní ʻoku fuonounou pē, ka ko e meʻa mahuʻingá ko hotau fāmilí.”
Naʻe hiki fonua ʻa Sisitā Aburto mo hono fāmilí ʻi hono taʻu 21, ki he ʻIunaiteti Siteití . Lolotonga ʻene nofo ʻi Seni Felenisisikou ʻi Kalefōniá, ne fakafeʻiloaki ai ia ki he ongo faifekaú pea fakakaukau ai ke haʻu ki he lotú. Naʻá ne pehē, “Ko e taimi pē ne u hū ai ki he falé, ne u ongoʻi ʻa e Laumālié. Ko ha konifelenisi fakasiteiki, pea naʻá ku ongoʻi naʻe fakataumuʻa ʻa e pōpoaki kotoa pē kiate au.” Naʻe papitaiso ia ʻi he 1989.
Lolotonga e taimi ko ʻení, naʻe feʻiloaki ai mo Carlos Aburto, pea ne hoko ko hono kaungāmeʻa. Ne hoko atu ʻena fetohiʻakí, ʻo aʻu ai pē ki he taimi naʻe hiki ai ʻa Sisitā Aburto ki ʻOlami ʻIutaá. Naʻá na mali ʻi he ʻaho 8 ʻo Mē 1993, ʻi he Temipale Soatani Liva ʻIutaá. Ko ha ongomātuʻa kinaua ki ha fānau ʻe toko tolu.
Naʻe fokotuʻu ʻa Sisitā Aburto ʻi he ʻaho 1 ʻo ʻEpeleli 2017, ki he Kau Palesitenisī Lahi ʻo e Fineʻofá, kuo laka hake ʻi he taʻu ʻe 25 ʻene ngāue ʻi he liliu leá, kau ai e kautaha Novell Inc. mo e Lemoine International. ʻOkú ne maʻu mo hono husepānití he taimí ni ha kiʻi kautaha liliu lea. Naʻe ako ki he ʻenisinia ʻo e langá ʻi he ʻUnivēsiti ʻo ʻAmelika Lotoloto ʻi Manākuá ʻi Nikalākuá, ʻi he taʻu ʻe fā pea maʻu hono mataʻitohi AA ʻi he saienisi ʻo e komipiutá mei he ʻUnivēsiti ʻIutā Valei Siteití ʻi he 1997.
Kuo ngāue ʻa Sisitā Aburto ʻi ha ngaahi fatongia fakasiasi kehekehe, kau ai ʻene hoko ko e mēmipa ʻi he poate lahi ʻa e Palaimelí mei he 2012 ki he 2016.