Temipale Foʻou ʻe Nima
Naʻe fanongonongo ʻe Palesiteni Tōmasi S. Monisoni ʻa e palani ke langa ha toe temipale ʻe nima, ʻi he ngaahi kolo ko ʻení:
Palasīliá, Palāsila. ʻE hoko ʻa e Temipale Palasīliá Palāsilá ko e temipale ia hono 10 ʻi Palāsila, kau ai ha ngaahi temipale ʻe ono ʻoku lolotonga ngāue mo e tolu kehe naʻe ʻosi fanongonongo pe kei langa. Makehe mei he ʻIunaiteti Siteití mo Mekisikou, ʻoku tokolahi ange e kāingalotu ʻoku nofo ʻi Palāsilá (laka hake ʻi he 1.3 milioná) ʻi ha toe fonua. Ko e tokolahi ʻo e kakai ʻo Palāsilá ʻoku fakafuofua ki he toko 211 miliona.
Greater Manila, Filipaini. Ko e temipale ʻaki ʻeni hono ua ʻi Manila pea ko e fika fā ia ʻi Filipaini. ʻOku ʻi ai ha kāingalotu ʻe meimei toko 750,000 ʻi he ʻOtu Filipainí, ʻa ia ʻoku toko 104 miliona honau kakaí.
Nailopi, Keniā. ʻE tokoniʻi ʻe he temipalé ha kāingalotu ʻe toko 30,000 tupu ʻi ʻAfilika hahake, kau ai ha kāingalotu ʻe toko 13,000 ʻi Keniā, ʻa ia ʻoku feʻunga hono tokolahí mo e toko 48 miliona. ʻE aʻu heni ʻo valu ʻa e ngaahi temipale ʻoku lolotonga ngāue, kei langa, pe ʻosi fanongonongo ʻi ʻAfiliká.
Pokatelo, ʻAitahō, USA. Ko e Temiaple Pokatelo ʻAitahoó, ko e temipale ʻaki ia hono ono ʻi ʻAitahō, ko ha siteiti ʻoku fakafuofua ki ha kāingalotu ʻe toko 450,000 pea ko e tokolahi ʻo e kakaí ko e 1.7 miliona.
Salatoka Sipilingi, ʻIutā, USA. ʻE tuʻu ʻa e temipalé ni ʻi he taha ʻo e ngaahi feituʻu tupu tokolahi vave taha ʻi ʻIutaá pea ʻe hoko ia ko e temipale hono 18 ʻi he siteití. Ko ʻIutaá,ʻa ia ʻoku tuʻu ai e hetikuota ʻo e Siasí, ʻoku toko 2.1 miliona ai ʻe kāingalotú, pea ko hono tokolahi e siteití ʻoku fakafuofua ki he 3.1 miliona.
ʻI he ngaahi temipale ʻe nima naʻe fanongonongó, ʻoku ʻalu hake ai e ngaahi temipale kotoa ʻi he funga ʻo e māmaní ki he 182, ngaahi temipale ʻoku ngāueʻakí ki he (155) pea ko e ngaahi temipale kuo ʻosi fanongonongo pe kei langa pe fakaleleiʻí ki he (27).
Talu mei he konifelenisi lahi ʻo ʻOkatopa 2016, kuo ʻosi fakatapui ʻa e Temipale Footi Kōlini Kololató, Temipale Sitā Valei Uaiōmingí, pea mo e Temipale Haatifooti Konetikatí ʻi he USA, pea toe fakatapui foʻou mo e Temipale Suva Fisí.
Ko e ngaahi fakatapui ʻi he kahaʻú ʻoku palani ʻo hangē ko ʻene hā atu ʻi laló:
|
Temipalé |
ʻAho Fakatapuí |
|---|---|
|
Pālesi Falanisē |
‘Aho 21 ʻo Mē 2017 |
|
Temipale ʻAitahō Folo ʻAitahoó (USA) |
ʻAho 4 ʻo Sune 2017 (toe fakatapui foʻou) |
|
Temipale Takisoni ʻAlesoná (USA) |
ʻAho 13 ʻo ʻAokosi 2017 |
|
Melitiane ʻAitahoó (USA) |
‘Aho 19 ʻo Nōvema 2017 |
|
Temipale Seta Siti ʻIutaá (USA) |
‘Aho 10 ʻo Tīsema 2017 |
Kuo ʻosi tanupou e kelekele ki he Temipale Uinipeki Manitopá (Kānata), Temipale Kinisasa Lepāpulika Fakatemokalati ʻo Kongokoó, Temipale Palanikuila Kolomupiá, Temipale ʻAlekuipa Peluú, mo e Temipale Lio ti Heneló Palāsilá.
Fakatokangaʻi foki, ʻi he hoko atu ko ia e langa ʻo e Temipale Loma ʻĪtalí, naʻe fokotuʻu ʻa e maka fakamanatu ʻo Sīsū Kalaisi mo e kau fuofua ʻAposetolo ʻe Toko Hongofulu Mā Uá ʻi he senitā takimamatá, pea fokotuʻu mo e maka fakamanatu ʻo e ʻāngelo ko Molonaí ʻi he tumuʻakí.