Elder Brian K. Taylor
General Authority Seventy
Si Brian King Taylor gipaluyohan isip General Authority Seventy niadtong Abril 1, 2017.
Si Elder Taylor natawo niadtong 1964 sa Ogden, Utah, USA, nilang Lowell Moon ug Marie King Taylor. Nagdako siya sa kasilinganan sa Kaysville, ikaupat siya sa lima ka anak nga ganahang mangisda ug mga sport.
Ang magulang niyang si Craig eskolar sa basketball sa Utah State University sa Logan, Utah, ug anaa pa sa pagdesisyon kon magmisyon ba o ipadayon ang iyang pag-eskwela sa kolehiyo.
“Usa ka gabii sa panihapon miingon ko [niya], ‘Manoy, kon magmisyon ka, magmisyon pud ko,’” nahinumdom si Elder Taylor. Ang duka ka managsoon nagserbisyo og misyon, nga si Elder Taylor miadto sa Spain Seville Mission.
Sa wala pa siya magmisyon, si Elder Taylor midula sa Brigham Young University basketball team sugod 1982 hangtud 1984 uban ni Devin G. Durrant, kinsa nagserbisyo karon isip sakop sa Sunday School General Presidency.
Nahimamat usab niya ang iyang pangasaw-unon nga si Jill Featherstone, sa BYU. Nagtudlo si Jill og klase sa Gospel Doctrine sa iyang student ward. Gidapit sa iyang igsoon, si Elder Taylor mibisita sa iyang klase ug nagkita sila. Milambo ang paghigugmaay, ug nagminyo sila niadtong Abril 30, 1987, sa Salt Lake Temple. Mga ginikanan sila sa pito ka anak.
Si Sister Taylor bugtong nga anak nga babaye sa pito ka anak ni Elder Vaughn J. Featherstone, emeritus nga General Authority, ug Sister Merlene Featherstone. “Sila tinuod gayud nga maabi-abihon ug mabination,” si Elder Taylor miingon bahin sa iyang mga ugangan. “Mibati dayon ko nga gihigugma diha-diha.”
Nakakuha og bachelor’s degree sa BYU, si Elder Taylor nakatukod og daghang negosyo, lakip sa kompanya nga modesinyo og mga software nga makig-coordinate og mga emergency calls tali sa mga ahensya sa public safety.
Nakaserbisyo siya nga institute teacher, high councilor, ward Young Men president, stake president, ug, atol sa iyang pagkatawag sa Seventy, presidente siya sa Texas Dallas Mission.