Jean B. Bingham

Kinatibuk-ang Presidente sa Relief Society

Jean B. Bingham

Nakapuyo sa daghang mga dapit sa Estados Unidos, si Sister Jean B. Bingham nakadayeg kon sa unsang paagi ang ebanghelyo naghatag og lig-ong impluwensya atol sa mga kausaban sa palibut.

Natawo niadtong 1952 sa Provo, Utah, USA, kang Robert ug Edith Joy Barrus, nagtubo siya kauban sa unom ka igsoong babaye ug duha ka lalaki. Nakaeskwela siya og elementarya sa Texas ug Minnesota, USA, ug nakahuman og high school sa New Jersey. Siya ug ang iyang mga igsoon lang ang mga LDS sa ilang eskwelahan hangtud nga namalhin sila sa New Jersey, diin nalipay siyang nakakita og usa ka babaye sa iyang klase nga gikan sa bag-o niyang ward.

Human siya naminyo ni Bruce Bingham sa Templo sa Provo Utah niadtong Disyembre 22, 1972, namalhin sila sa Illinois sa pagpadayon sa iyang pag-eskwela.

Duha ka anak ang natawo nilang Brother ug Sister Bingham, ug giisip nilang ilang kaugalingong mga anak ang ilang gipangsagop. Nakaangkon siya og associate degree sa family living, ug sa dihang nag-high school ang kinamanghuran nilang anak, mibalik siya og eskwela ug nakakuha og master’s degree sa pagkamagtutudlo.

Ang unang calling ni sister Bingham sa Relief Society miabut wala madugay human natawo ang una niyang anak. “Gitawag kong motudlo sa mga klase sa mother education. Talagsaon kadtong oportunidad nga makakat-on sa mga ehemplo gikan sa ubang mga sister ug gikan sa manwal usab.”

Daghan kaayo og mga biyahe si sister Bingham atol sa iyang panerbisyo isip Primary general board member ug isip magtatambag sa Kinatibuk-ang Kapangulohan sa Primary. Nakita niya ang mga hagit ug panalangin sa pagkamiyembro sa Simbahan sa mga dapit sa tibuok kalibutan.

Naglaum siya nga ang mga sister sa Relief Society makamatikud sa pagkamaayo sa usag usa. “Usa ka tintasyon ang pagkumpara sa atong kaugalingon ngadto sa uban, makadaot kini ug sukwahi sa unsay gusto sa Langitnong Amahan kanato.” Miingon siya nga ang Relief Society makatabang sa matag sister nga makapalambo og panabut kon si kinsa siya sa mahangturong plano sa gingharian. “Kon atong isentro ang atong kinabuhi kang Jesukristo, makaila gayud kita og si kinsa kita,” miingon siya.