Reyna I. Aburto

Ikaduhang Magtatambag, Kinatibuk-ang Kapangulohan sa Relief Society

Si sister Reyna I. Aburto natawo sa Managua, Nicaragua, kang Noel Blanco ug Delbi Cardoza niadtong 1963. “Ang akong mga ginikanan kanunayng naningkamot aron ila kaming masangkapan,” miingon si Sister Aburto. “Duna koy malipayon kaayong panahon sa pagkabata.”

Mga tungang gabii niadtong Disyembre 23, 1972, sa nuybe anyos pa ko, usa ka linog miigo sa Managua. “Naluwas ko kay dunay usa ka piraso nga furniture sa akong luyo, apan napiit ang akong mga bitiis.” Nakadungog sa iyang singgit ug sa iyang mama, nangabut ang mga silingan aron sa pagbira nila gikan sa nahagsa nga balayng adobe. Sa mga guba, ilang nakit-an ang lawas sa iyang magulang nga lalaki sa katre nga tupad sa iyaha. “Ang mga kabtangan temporaryo ra gyud kaayo, apan ang importanting butang mao ang atong pamilya,” miingon siya.

Sa nag-21 na siya, milangyaw si Sister Aburto ngadto sa Estados Unidos kuyog sa iyang pamilya. Samtang nagpuyo sa San Francisco, California, gipaila siya sa mga misyonaryo ug mihukom nga moadto sa simbahan. “Dihang mitikang ko pasulod niana nga building, akong gibati ang Espiritu. Stake conference kadto, ug akong gibati nga ang matag mensahe para gyud kanako,” miingon siya. Nabunyagan siya niadtong 1989.

Niining higayona iyang nakatagbo si Carlos Aburto, ug nagkahigalaay sila. Padayon silang nagsinulatay, bisan og mibalhin na si Sister Aburto sa Orem, Utah. Nagminyo sila niadtong Mayo 8, 1993, sa Jordan River Utah Temple. Mga ginikanan sila sa tulo ka anak.

Si Sister Aburto, gipaluyohan niadtong Abril 1, 2017, sa Kinatibuk-ang Kapangulohan sa Relief Society, nagtrabaho sa industriya sa translation sulod sa kapin nga 25 ka tuig, lakip sa Novell Inc. ug Lemoine International. Siya ug ang iyang bana karon nanag-iya og gamay nga translation agency. Nagtuon siya og industrial engineering sa Central American University sa Managua, Nicaragua sulod sa upat ka tuig ug nakaangkon og associate degree sa computer science gikan sa Utah Valley State College niadtong 1997.

Si Sister Aburto nakaserbisyo og daghang lain-lain nga calling sa Simbahan, lakip sa pagkasakop sa Primary general board gikan sa 2012 hangtud 2016.