Ang Gahum sa Basahon ni Mormon

Ni Presidente Thomas S. Monson

Mohangyo ko natong tanan nga mainampoong magtuon ug mamalandong sa Basahon ni Mormon kada adlaw.

Minahal nga kaigsoonan, mainiton akong motimbaya kaninyo sa atong panagkita pag-usab niining kinatibuk-ang komperensya sa Ang Simbahan ni Jesukristo sa mga Santos sa Ulahing mga Adlaw. Sa dili pa nako sugdan ang akong pormal nga mensahe karon, gusto nakong ipahibalo ang lima ka bag-ong mga templo nga tukuron sa mosunod nga mga dapit: Brasília, Brazil; greater Manila, Philippines, area; Nairobi, Kenya; Pocatello, Idaho, USA; ug Saratoga Springs, Utah, USA.

Karong buntaga maghisgot ko bahin sa gahum sa Basahon ni Mormon ug sa kritikal nga panginahanglan natong mga miyembro niini nga Simbahan sa pagtuon, pagpamalandong, ug paggamit sa mga pagtulun-an niini sa atong kinabuhi. Ang kaimportante sa pagbaton og lig-on ug sigurado nga pagpamatuod sa Basahon ni Mormon kinahanglang mapasabut og maayo.

Nagpuyo kita sa usa ka panahon sa daghang kagubot ug kadautan. Unsay makapanalipod nato gikan sa sala ug dautan nga ania sa kalibutan karon? Moingon ko nga ang lig-ong pagpamatuod sa atong Manluluwas, nga si Jesukristo, ug sa Iyang ebanghelyo makatabang sa paggiya kanato padulong sa kaluwasan. Kon kamo wala magbasa sa Basahon ni Mormon kada adlaw, palihug himoa na. Kon mobasa kamo niini nga mainampoon ug uban sa sinsero nga tinguha nga makahibalo sa kamatuoran, ang Espiritu Santo mopadayag sa kamatuoran niini nganha kaninyo. Kon kini tinuod—ug ligdong ako mopamatuod nga kini tinuod—nan si Joseph Smith usa ka propeta nga nakakita sa Dios nga Amahan ug sa Iyang Anak, nga si Jesukristo.

Tungod kay ang Basahon ni Mormon tinuod, Ang Simbahan ni Jesukristo sa mga Santos sa Ulahing mga Adlaw mao ang Simbahan sa Ginoo dinhi sa yuta, ug ang balaan nga priesthood sa Dios gipahiuli alang sa kaayohan ug panalangin sa Iyang mga anak.

Kon kamo wala pay pagpamatuod niining mga butanga, buhata kanang gikinahanglan aron makabaton niini. Mahinungdanon alang kaninyo nga adunay inyong kaugalingon nga pagpamatuod niining malisud nga mga panahon, kay ang mga pagpamatuod sa uban igo lang nga moabag kaninyo. Hinoon, sa higayon nga kini maangkon, ang pagpamatuod kinahanglan nga lig-unon ug bag-uhon pinaagi sa padayon nga pagsunod sa mga sugo sa Dios ug pinaagi sa kanunay nga pag-ampo ug pagtuon sa kasulatan kada adlaw.

Minahal ko nga mga kauban sa buhat sa Ginoo, mohangyo ko natong tanan nga mainampoong magtuon ug mamalandong sa Basahon ni Mormon kada adlaw. Kon buhaton nato, anaa kita sa posisyon nga makadungog sa tingog sa Espiritu, sa pagbatok sa tintasyon, sa pagbuntog sa pagduhaduha ug kahadlok, ug sa pagdawat sa tabang sa Langit sa atong mga kinabuhi. Niini ako mopamatuod sa tibuok nakong kasingkasing sa pangalan ni Jesukristo, amen.