Pōpoaki ʻa e Kau Palesitenisī ʻUluakí
Ui ki he Ngāué
Fai ʻe Palesiteni Thomas S. Monson
Sweat of the Brow, tā valivali ʻe Gary Smith
‘I he taimi naʻe ui ai ‘e he Palōfita ko Siosefa Sāmitá ʻa ‘Eletā Hiipa C. Kimipolo (1801–68) ke “fakaava ʻa e matapā ‘o e fakamoʻuí” ko ha faifekau ki ‘Ingilaní, naʻe lōmekina ‘a ʻEletā Kimipolo ‘e ha ngaahi ongoʻi taʻefeʻunga.
Naʻá ne tohi ʻo pehē, “‘Oiauē, ʻEiki, ko ha tangata leʻovale au, mo matuʻaki ta‘efeʻunga ki ha ngāue pehē.”
Neongo iá, ne tali ʻe ʻEletā Kimipolo ʻa e uiuiʻí, ʻo ne tānaki atu: “Ne ʻikai taʻofi au ʻe he ngaahi meʻá ni mei he hala ʻo e fatongiá; ʻi he momeniti ko ia na‘e mahino ai kiate au e finangalo ʻo ‘eku Tamai Hēvaní, naʻá ku ongo‘i ha loto fakapapau ke u foua e ngaahi faingataʻa kotoa pē, mo u tui te Ne poupou‘i au ʻi hono māfimafí, pea fakakoloa‘i au ʻaki e poto kotoa pē ne u fie ma‘ú.”1
ʻE hoku kāinga kei talavou kuo uiuiʻi ke ngāue fakafaifekau taimi kakató, kuo ui kimoutolu ki he ngāué koeʻuhí ʻoku mou “ma’u ha holi ke ngāue ma‘á e ʻOtuá” hangē ko ‘Eletā Kimipoló, (T&F 4:3) pea koe‘uhí he kuo mou mateuteu mo taau.
Ngaahi hoa mali matu‘otuʻá, kuo ui kimoutolu ki he ngāué ʻi he ngaahi ‘uhinga tatau pē. Ka neongo ia, ʻoku ʻikai ngata pē ʻi hoʻomou holi ke ngāué, ka kuo mou maʻu foki e poto mei ha ngaahi taʻu lahi ʻo e feilaulaú, ʻofá mo e aʻusiá, ʻa ia ʻe lava ke faka‘aongaʻi ʻe hoʻomou Tamai ‘i he langí ki hono ue’i ‘o e loto ʻo Hono ngaahi foha mo e ngaahi ‘ofefine ʻoku fekumi ki he mo‘oní. ‘Oku ʻikai ha toe veiveiua kuo mou ‘ilo he ʻikai ke tau teitei lava ʻo ʻofa moʻoni ʻi he ʻEikí kae ʻoua kuo tau tauhi kiate Ia ʻaki ʻetau tokoni‘i e niʻihi kehé.
Te mou tānaki atu ʻa e tuí mo e mālohí, loto-to‘á mo e loto-falalá, loto-fakapapaú mo e kātakí, loto-vilitakí mo e māteakí, ki ho‘omou holi ke hoko ko ha kau faifekaú. ‘E lava ke fakahoko ʻe he kau faifekau māteakí ha ngaahi mana ki he malaʻe ‘o e ngāue fakafaifekaú.
Naʻe peheni hono fakanounou ʻe Palesiteni Sione Teila (1808–87) ‘a e ngaahi ʻulungaanga mahu‘inga ʻo e kau faifekaú: “Ko e faʻahinga tangata [mo fafine mo e ngaahi hoa-mali] ʻoku tau loto ke nau ʻave ʻa e pōpoaki ʻo e ongoongolelei ko ʻení, ko ha kau tangata ʻoku nau tui ki he ʻOtuá; ko ha kau tangata ʻoku nau tui ki heʻenau tui fakalotú; ko ha kau tangata ʻoku nau fakalāngilangiʻi honau lakanga fakataulaʻeikí; ko ha kau tangata ʻoku … falala ki ai e ʻOtuá. … ‘Oku tau fie maʻu ha kau tangata ʻoku fonu ‘i he Laumālie Māʻoni‘oní pea mo e mālohi ʻo e ‘Otuá[,] … ko ha kau tangata lāngilangiʻia, ngeia, angamaʻa mo haohaoa.”2
Kuo folofola ʻe he ʻEikí:
“He vakai ʻoku hina ʻa e ngoué ki he utu-taʻú; pea vakai, ko ia ʻokú ne ʻai ʻene hele tuʻusí ʻaki hono tūkuingatá, ʻokú ne tokonaki ke ʻoua naʻá ne mate, kae fakahoko ʻa e fakamoʻuí ki hono laumālié;
“Pea ʻoku hanga ʻe he tuí, ʻamanaki leleí, manavaʻofá mo e ʻofá, mo e mata ʻoku hanga taha pē ki hono fakalāngilangiʻi ʻo e ʻOtuá, ʻo fakafeʻungaʻi ia ki he ngāué” (T&F 4:4–5).
Ne maʻu ho uiuiʻí ʻi ha ueʻi fakalaumālie. ‘Oku ou fakamoʻoni, ko ia ‘oku ui ʻe he ‘Otuá ʻoku fakafeʻunga‘i ia ʻe he ‘Otuá. Te ke ma‘u ha tokoni fakalangi ‘i hoʻo ngāue ‘i he faʻa lotu ‘i he ngoue vaine ʻa e ‘Eikí.
Te ke maʻu ʻa e tala‘ofa fakaʻofo‘ofa ko ia naʻe ‘oange ʻe he ‘Eikí ki Heʻene kau faifekaú ʻi he kamata‘anga ʻo e kuonga fakakosipeli ko ʻení, hangē ko ia ‘oku hā ʻi he Tokāteline mo e Ngaahi Fuakavá: “Te u muʻomu‘a ʻi homou ‘aó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” (T&F 84:88).
‘I hoʻo ngāué, te ke fatu ai ha ngaahi manatu melie fakaʻofoʻofa mo ha ngaahi kaungāme‘a taʻengata. ‘Oku ʻikai ke u ʻilo ha toe malaʻe ʻoku toe mahu ange hono ututaʻu ʻo e fiefiá ka ko e mala‘e ʻo e ngāue fakafaifekaú.
Te u kiʻi lea atu he taimí ni ki he kau ʻeletā, sisitā, mo e ngaahi hoa-mali he ‘ikai lava ʻo fakaʻosi lelei honau taimi ne vahe angé, ʻi he malaʻe ʻo e ngāue fakafaifekaú koeʻuhi ko ha faʻahinga ʻuhinga pē: ʻOku ‘ofa ʻa e ‘Eikí ʻiate koe. ʻOkú Ne houngaʻia ʻi hoʻo feilaulaú. ‘Okú Ne ʻafio‘i hoʻo loto-mamahí. ʻIloʻi muʻa ʻoku kei ʻi ai pē ʻEne ngāue maʻau ke ke fakahoko. ‘Oua naʻa tuku ke tala atu ʻe Sētane ha meʻa kehe. ‘Oua naʻá ke foʻi; ‘oua ʻe lotosiʻi; ʻoua naʻa siva hoʻo ‘amanakí.
Hangē ko ia ne u lea ʻaki ʻi he konifelenisi lahí ʻi he hili ha taimi siʻi mei hono ui au ke tataki ʻa e Siasí: “‘Oua ʻe manavahē. Mou fiefia. ʻOku hā ngingila mai e kahaʻú ʻo hangē tofu pē ko hoʻomou tuí.”3 ʻOku kei moʻoni pē ʻa e talaʻofa ko iá, kiate koe. Ko ia, ʻoua naʻa mole hoʻo tuí, he ʻoku teʻeki ke toʻo ʻa e falala ʻa e ʻEikí meiate koe. Tauhi ho‘o ngaahi fuakavá pea laka atu ki muʻa.
ʻOku fie maʻu ʻe he māmaní ʻa e ongoongolelei ʻo Sīsū Kalaisí. ʻOfa ke faitāpuekina ‘e he ʻEikí ʻEne kāingalotú kotoa pē—tatau ai pē pe ko e fē feituʻu ʻoku tau ngāue aí—ʻaki ha loto ngāue fakafaifekau.