Ko e Ngāue ʻi he Siasí
Fua Fatongia Toko Taha Pē ʻi Salaievó
ʻOku nofo ʻa e tokotaha naʻá ne faʻú ʻi Lainileni-Palatineti, Siamane.
ʻI he ngaahi ʻaho Sāpaté, naʻá ku hiva, lotu, mo malanga toko taha pē. ʻE kamata maʻulotu nai mo e kāingalotu kehé?
Tā Fakatātaaʻi ʻe Mia Price/Shannon Associates
ʻI heʻeku kau ki he ngāue fakakautau ʻa Siamané, ne u nofo ʻi ha konga lahi ʻo e taʻu 1999 ʻi Salaievo, ko e kolomuʻa ia ʻo Posinia mo Hesikoviná. Naʻe haʻu fakataha ʻeku ngāue fakakautaú mo ha ngaahi faingataʻa lahi pea lōloa mo e taimi ngāué, ka naʻá ku faʻa mālōlō maʻu pē ke u maʻulotu ʻi ha kiʻi falelotu naʻe fakaʻaongaʻi ʻe he ngaahi siasi kehé ʻi homau ʻapitanga tau ʻe toko 750.
ʻI heʻeku aʻu atu ki he falelotú ʻi ha hoʻatā Sāpate ʻe taha, naʻe loka e matapaá. Naʻá ku toki ʻilo kuo hiki e kāingalotu kehe ia ʻo e Siasí ne mau ʻapitanga fakatahá. Naʻá ku loto-mamahi he ne u hanganaki atu ke mōihū mo maʻu e sākalamēnití. Ki muʻa pea u haʻu ki Salaievó, ne u femouʻekina ai ʻi hoku fatongia ko e palesiteni fakakoló ʻi Siamane pea lava maʻu pē ke u maʻu e sākalamēnití.
Hili ha ngaahi uike mei ai naʻe vahe au ke u fakafeʻao ki he senialé ʻi ha ʻaʻahi ki ha kongakau ʻi ha vāhenga ʻAmelika. Lolotonga e maʻu meʻatokoni hoʻataá, naʻe fakatokangaʻi ʻe ha kapiteni mei ʻAmelika ʻeku talanoa mo e kau sōtia kehé peá ne ʻeke mai pe ko ha mēmipa au ʻo e Siasí. Hili pē ʻeku tali ange ko ha mēmipa aú, naʻá ne ʻave leva hoku hingoá mo e fika fetuʻutakí ki he taki fakakulupu ʻo e Siasí ʻi he feituʻu ko iá.
Naʻe ʻikai fuoloa mei ai naʻe fetuʻutaki mai ha tokotaha ko Brother Fisher kiate au. ʻI he hili haʻama ʻinitaviu, naʻá ne vaheʻi au ke u hoko ko ha taki fakakulupu ki he kāingalotu ngāue fakakautau ʻo e Siasí ʻi Salaievó, fakataha mo ha taumuʻa ngāue ke u faʻu ha kulupu. (Ko e kulupú ko ha ʻiuniti ia ʻo e Siasí ʻi he ngaahi ʻapitanga ngāue fakakautaú, ʻoku faitatau ia mo ha kolo (branch).)
ʻI heʻeku feinga ke maʻu ha kāingalotu ʻi he ʻapitanga fakakautau ʻi Salaievó, naʻá ku kamata fakapipiki leva ʻa e taimi lotú ʻi he ʻū papa fanongonongó pea tufaki mo ha ngaahi fakaafe lotu. Naʻe ʻikai ha kāingalotu ʻe maʻulotu ʻi he ngaahi uike ne kamata aí. ʻI he ʻaho Sāpaté leva, naʻá ku fakahoko toko taha pē ʻa e hivá, lotú, mo e malangá. ʻI heʻeku muimui ki he ngaahi tuʻutuʻuni ʻo e Siasí maʻá e kau taki mo e kau mēmipa ʻo e kau ngāue fakakautaú, naʻá ku lava pē ke tāpuakiʻi mo maʻu e sākalamēnití toko taha pē taʻe kau ai ha maʻu lakanga fakataulaʻeiki kehé. Naʻe fakafiefia ʻeni kiate au.
Naʻá ku fakahoko ʻa e ngaahi fakatahá ʻi he lea faka-Pilitāniá koeʻuhí ke fakalakalaka ʻeku pōtoʻi lea faka-Pilitāniá. Naʻe fekauʻaki ʻeku fuofua malangá mo Siosefa Sāmita. Naʻe ʻikai ha taha ʻi he lokí, ka naʻá ku ongoʻi pē naʻe maʻulotu mo ha niʻihi kehe ai. Naʻe fakaivia au ʻe he Laumālie Māʻoniʻoní mo fakahā kiate au ʻa e mahuʻinga ke kamata foʻou e ngāue ʻa e ʻEikí ʻi he feituʻú ni.
Hili ha ngaahi uike mei he fuofua Sāpate ʻo ʻeku lotu tokotahá, naʻe hū mai ha finemui sōtia ʻAmelika ki he falelotú. Naʻá ne toki papitaiso pē ʻi ha ngaahi māhina kimuʻa. Naʻá ku fiefia ʻaupito! Naʻe toe aʻu mai mo ha fefine ʻe taha hili ha uike ʻe ua mei ai. Hili iá naʻe haʻu leva mo ha ongo tangata ʻe toko ua. Ne kamata ke tupulaki ʻa e Siasí ʻi Salaievo ʻi he tokoni ʻa e ʻEikí.
ʻI he taimi ní kuo ʻi ai ha kolo ʻo e Siasí ʻi Salaievo. Ko e taimi ʻoku ou manatu ai ki heʻeku taimi ʻi aí, ʻoku ou fakalaulauloto ki he tāpuaki ne fakalāngilangiʻi ʻaki au ʻe he ʻEikí ke u tokoni ʻi ha founga makehé—ke u hoko ko ha konga ʻo ʻEne ngāué pea ʻiloʻi “ʻoku tupu mei he ngaahi meʻa īkí ʻa e ngaahi fuʻu meʻa lalahí” (T&F 64:33).