Leʻo ʻo e Kau Māʻoniʻoni ʻi he Ngaahi ʻAho Kimui Ní
Faʻē Anga Faka-Kalaisí
Tā fakatātaaʻi ʻe Carolyn Vibbert
Naʻá ku tafi fokotuʻunga ʻa e pisiketé, silioó, popikoní mo e tisitisí.
“ʻIkai. Naʻe ʻikai ke u kai ha taha ʻo e ngaahi meʻa ko ʻení,” naʻá ku lea pē mo hiko ia ki ha kapa veve.
Naʻe lea leʻosiʻi mai hoku husepānití ʻi heʻene tangutu he tēpilé, “Ko e feilaulau ia ʻa e faʻeé.”
Naʻá ku tuʻu hangatonu hake. “Ko e hā?” Naʻá ku fehuʻi ange.
Naʻá ne maʻu pē ʻene meʻatokoni pongipongí mo lea leʻolahi mo mahino mai: “Ko e ngāue ia e ngaahi faʻeé. Ko e kotoa ʻenau moʻuí ʻoku femouʻekina pē ʻi he fakamaau e ngaahi moveuveu naʻe ʻikai hanau kākunga ki aí—ʻo hangē pē ko ia naʻe fai ʻe he Fakamoʻuí.”
Naʻe ʻuhingamālie ʻa e fakakaukau ko ʻení kiate au. Naʻe totonu ke u fiefia ke fakatokangaʻi ʻoku anga faka-Kalaisi ange ʻeku tafi e momoʻi meʻakaí ʻi he meʻa naʻá ku fakakaukau ki aí. Ka naʻá ku ongoʻi loto-tautea moʻoni. Naʻá ku ongoʻi taʻefiemālie ʻi he fakafehoanaki ko iá. Kuo tā tuʻo fiha nai ʻeku fakalau ki hoku hoá pe kiate au pē ʻa e ngaahi meʻa kotoa pē kuó u fai maʻá e fānaú, ʻi he ʻamanaki te nau fakatokangaʻi mo houngaʻia? Naʻe ʻikai fehālaaki ke te fakaʻamu ke toe loto-houngaʻia ange ʻa e fānaú, ka ʻi he taimi naʻe mahino ai kiate aú, naʻá ku ʻiloʻi naʻe lahi ange ʻeku fakaʻamu ke u maʻu pē ʻe au ʻa e lāngilangí pe totongí ʻi heʻeku fakaʻamu ke nau ako e loto-houngaʻiá. Ka naʻe ʻikai teitei fie maʻu ʻe he Fakamoʻuí ia ʻa e fakamāloó. Naʻe ʻikai ʻaupito ke Ne kole pe fie maʻu ia.
ʻOku ou manatuʻi ʻeku fepōtalanoaʻaki mo ʻeku fānau taʻu hongofulu tupú ʻi heʻenau fakalau ʻa e ngaahi meʻa kotoa pē kuo nau fai maʻakú koeʻuhí ke ʻoua naʻa nau fai ha puʻí.
Ne u faʻa tali ange, “Sai, kapau ʻokú ke fie fakatauhoa ngāue, ʻe lava pē ia, ka te ke foʻi koe, ko ia ai fai leva e fekaú!”
Naʻá ku toki fakatokangaʻi leva naʻe ʻikai teitei ofi ʻeku taumuʻá ki he fakatauhoa kuo fakahoko ʻe hoku husepānití. ʻOku ʻikai ʻaupito ke tauhi ʻe he Fakamoʻuí ha lisi ke fakatauhoa ʻa e meʻa kuó Ne faí ki he meʻa kuó u faí. Te u foʻi maʻu pē au.
ʻI heʻeku kei pukepuke ʻa e taufalé ʻi hoku nimá, naʻe fakaʻā hoku matá ki ha fakakaukau foʻou ki he ʻulungaanga fakafaʻeé—anga fakafaʻē ʻo hangē pē ko Iá. ʻIkai maʻá e lāngilāngí, fakaʻilongá, fāʻofuá, pe naʻa mo e fakamāloó. Te u tafi e momó ʻi he loto-ʻofa koeʻuhí ko e meʻa ia naʻá Ne faí.
Naʻá Ne fai ʻa e meʻa kotoa pē ʻi Heʻene talangofua ki he Tamaí. Naʻe ʻikai ʻaupito koeʻuhí ko Ia. ʻOku fakaleleiʻi maʻu pē ʻe he ʻEikí ʻa e meʻa ʻoku maumaú pea fakamaʻa ʻetau ngaahi fehālākí ʻaki ʻa e ʻofa haohaoa taʻefakangatangatá, maʻa ʻEne Tamaí mo kitautolu. Te u feinga leva he taimí ni ke akoʻi mo tokoniʻi ʻeku fānaú ʻaki ʻa e ʻofa haohaoa taha te u ala lavá. Te u toki ongoʻi leva ai ʻoku ou kau moʻoni ʻi he faʻē anga faka-Kalaisí.