Pōpoaki ʻa e Faiako ʻAʻahí
Ko e Mālohi ʻo e Lakanga Fakataulaʻeikí ʻo Fakafou ʻi he Tauhi ʻo e Ngaahi Fuakavá
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke ke vahevahé. ʻE teuteuʻi fēfē ʻe he mahino ʻo e taumuʻa e Fineʻofá ʻa e ngaahi ʻofefine e ʻOtuá ki he ngaahi tāpuaki ʻo e moʻui taʻengatá?
Naʻe pehē ʻe ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko ʻeku pōpoaki ki he … taha kotoa pē, te tau lava ʻo moʻui he houa kotoa ʻo “tāpuekina ʻaki e mālohi ʻo e lakanga fakataulaʻeikí, ʻo tatau ai pē pe ko e hā hotau tūkungá.”
“ …ʻI hoʻo kau atu he moʻui taau ki he ngaahi ouau ʻo e lakanga fakataulaʻeikí, ʻe foaki atu ʻe he ʻEikí kiate koe ha mālohi lahi ange, nonga, mo e fakakaukau ʻoku taʻengatá. Ko e hā pē ho tūkungá, ʻe ‘tāpuekina ʻaki ha ivi ʻo e mālohi e lakanga fakataulaʻeikí’ ho ʻapí.ʻ”1
Ko e hā e founga ʻoku tau fakaafeʻi ai e mālohi ʻo e lakanga fakataulaʻeikí ki heʻetau moʻuí? ʻOku fakamanatu mai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá “ko kinautolu kuo nau fou ʻi he vai ʻo e papitaisó pea toki maʻu ʻa honau ʻenitaumení ʻi he fale ʻo e ʻEikí, ʻoku nau feʻunga ke maʻu ha ngaahi tāpuaki lelei mo fakaʻofoʻofá. Ko e ʻuhinga moʻoni ʻo e ʻenitaumení ko ha meʻafoaki ʻo e mālohí … [pea] ʻoku mohu ʻaloʻofa ʻetau Tamai Hēvaní ʻaki Hono mālohí.” ʻOkú ne fakamanatu mai ʻoku fakatou fakakoloaʻi e houʻeiki tangatá mo fafiné “ʻaki e mālohi tatau” ʻi he temipalé, “ʻa ia ko e mālohi ʻo e lakanga fakataulaʻeikí.”2
Naʻe pehē ʻe Linitā K. Pētoni, ko e Palesiteni Lahi ʻo e Fineʻofá: “Koeʻuhí ʻoku tau holi kotoa ke maʻu e mālohi ʻo e lakanga fakataulaʻeikí ʻi hotau fāmilí mo e ʻapí, ko e hā ʻoku fie maʻu ke tau fai ke fakaafeʻi e mālohi ko iá ki heʻetau moʻuí? ʻOku mahuʻinga e anga māʻoniʻoni fakatāutahá ki hono maʻu e mālohi ʻo e lakanga fakataulaʻeikí.”3
Naʻe pehē ʻe Palesiteni Lāsolo M. Nalesoni, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kapau te tau hū ki he ʻao ʻo e ʻEikí ʻi he loto fakatōkilalo mo kole kiate Ia ke Ne akoʻi kitautolu, te Ne fakahaaʻi mai e founga ke fakalahi ai ʻetau maʻu Hono mālohí.”4
Ngaahi Potu Folofola mo e Fakamatala Makehe
1 Nīfai 14:14; Tokāteline mo e Ngaahi Fuakava 121:36; 132:20; reliefsociety.lds.org
Tuí Fāmilí Fakafiemālié