Founga ʻe 5 ke Taukaveʻi ai e Tuí (kae ʻikai Fakatupu ha Fakakikihí)

Mei ha fakamatala ʻa ʻEletā Von G. Keetch ʻo e Kau Fitungofulú

ʻOku ʻikai fie maʻu ke ʻi ai ha fepaki ʻi he ongo tefitoʻi moʻoni māʻongoʻonga ko ia ʻo e ongoongoleleí ko e taukaveʻi ʻo e moʻoní, kae taimi tatau pē ʻoku tau fakaʻapaʻapaʻi mo ʻofeina ai e niʻihi kehé. ʻOku ʻikai totonu ke hoko ʻetau tui mālohi ki he moʻoní ke ne fakatupunga haʻatau taʻefakaʻapaʻapa pe loto-mamahi ki he niʻihi kehé. Ka ʻi he taimi tatau, ʻoku ʻikai totonu ke hoko ʻetau fie fakahā ʻa e angaʻofá mo e ʻofá ki he tokotaha kotoa peé, ke ne fakavaivai ai hotau fatongia ke taukapoʻi e moʻoní.

Te tau maʻu e ola lelei tahá he taimi ʻoku tau fengāueʻaki fakafoʻituitui ai mo e niʻihi kehé. Kapau te tau fakangatangata pē ki he foʻi lea ʻe 140 ʻi he ʻinitanetí, ʻe faʻa maʻuhala ʻetau fakamatalá. Ko e angamahení, ʻoku lahi ange ngaahi meʻa ʻe ala lavaʻi ʻi he talanoa fakafoʻituitui mo femātākí, ʻi he taimi ʻoku femahinoʻaki ai e kakaí.
Manatuʻi ko ʻetau tefitoʻi taumuʻá ke mahino kiate kitautolu e puipuituʻa ʻo e kakaí. Ko e taimi pē te tau toki fakaʻapaʻapaʻi ai kinautolu ko ha kakaí pea mahino ʻenau fakakaukaú, ko e taimi ia ʻe lava ke tau fetuʻutaki lelei ai mo e niʻihi kehé.
Kumi ha founga ʻe lava ke tau fakaʻapaʻapaʻi ai e ngaahi fakakaukau ʻoku kehekehé, mo kei nofo fakataha pē ʻi he sōsaietí. Kapau ʻoku tau fie maʻu e niʻihi kehé ke nau taukaveʻi ʻetau totonu fakalaó, kuo pau ke tau taukaveʻi e totonu fakalao ʻo e niʻihi kehé, pea tokaʻi ʻenau totonu ke fakahā ʻenau fakakaukaú mo lea ʻaki e meʻa ʻoku nau tui ki aí.
Ko e femahinoʻakí ko ha founga ngāue ia—ko ha founga ʻe malava ke fakaʻaongaʻi ki ai ha taimi lahi. Mahalo naʻa ʻikai teitei tali ʻe he niʻihi kehé ʻetau fakakaukaú, ka ʻe lava pē ke tau feinga ke taʻofi e ngaahi lea hangē ko e taha tāufehiʻá mo e fehiʻá.
Ke tau fakakaukau ʻoku lelei mo fakapotopoto e tokotaha kotoa pē, neongo kapau ʻoku tau maʻu ha ngaahi fakakaukau he ʻikai ʻaupito teitei tali ia ʻe he niʻihi kehé.