Mitarika ahy ve Andriamanitra?

Feno safidy lehibe ny fiainantsika: ny lalana arak’asa, ny olona hovadina, ny sekoly hianarana, sns. Feno ahiahy andavanandro ihany koa ny fiainantsika: fisafidianana ny fomba tsara hampiasana ny fotoantsika, fiezahana mahatakatra fotopampianarana, ary fitadiavana fiadanana eo anivon’ny fitsapana. Ao anatin’izany rehetra izany isika dia mila fanambarana ho an’ny tena manokana. Saingy indraindray dia mety ho sarotra ny mahafantatra ny fomba handraisana izany sy ny fomba hamantarana izany rehefa azontsika. Rehefa tsy maharay valiny isika na rehefa tsy azontsika izany dia mety hanontany tena isika hoe: “Ny Fanahy ve ilay teo sa ny eritreritro?” “Nahoana aho no nentanim-panahy hanao izany nefa tsy nahomby?” “Nahoana aho no toa mahatsapa fa tsy mamaly ny vavaka ataoko Andriamanitra?”

Soa ihany fa ao amin’ny “Fandraisana fanapahan-kevitra: Fahafahana misafidy sa fanambarana” (pejy 44) i Erin dia mizara ny tantarany momba ny fanambarana ho an’ny tena manokana rehefa tsy maintsy nandray fanapahan-kevitra mampiova fiainana izy. Matoa Andriamanitra te hitarika antsika, dia te hanampy antsika ihany koa Izy hianatra hiantehitra amin’ny fahafahantsika misafidy mba hanao safidy tsara.

Ny fianarana ny fomba firesahan’ny Fanahy Masina aminao manokana dia ampahany iray hafa manan-danja amin’ny fandraisana sy famantarana ny fanambarana. Mety ho samy hafa izany ho antsika tsirairay. Ao amin’ny pejy 48 dia maro ireo tanora mizara ny fomba nahazoany fanambarana.

Ao anatina lahatsoratra nomerika i Aspen dia manazava fa ny fanambarana ho an’ny tena manokana dia mitaky ny “Fanatanjahana ireo hozatrao ara-panahy.”

Mety havesatra be ny mieritreritra ny hoavy, ary mety hampatahotra mihitsy. Indrindra fa rehefa tanora ianao. Saingy rehefa tsaroako nitarika ny fiainako Andriamanitra taloha dia manome herim-po ahy izany mba handroso sy hanao zavatra sy hatoky fa mbola hanome ahy ny fitarihana izay ilaiko hatrany Izy eo amin’ilay lalana.

Amim-panajana,

Katie Sue Embley

Torohevitra tsara indrindra…

Mizara ny torohevitra tsara indrindra azony momba ny fandraisana fanambarana ho an’ny tena manokana ireo tanora:

“Nilaza tamiko ny mpitarika ahy tao amin’ny RTM indray andro hoe: –Ampiroboroboy ny fifandraisanao amin’ Andriamanitra amin’ny maha-Rainao ara-panahy Azy. Arakaraka ny mampatanjaka ny fifandraisanao Aminy no hahatakaranao bebe kokoa sy mahavoatarika anao.– Nitondra fiovana lehibe tamin’ny fomba fivavako izany.”

—Grant Goolsby, California, Etazonia

“Asain’ny patriarika an’ny tsatòkanay manao tsianjery izao andian-teny izao ny olona rehetra: –mba handraisana fanambarana dia mamakia fanambarana.– Nanampy ahy be dia be izany rehefa namaky ny soratra masina aho.”

—Shellby Tippetts, Missouri, Etazonia

“Manokàna fotoana hisaintsainana. I Joseph Smith dia nisaintsaina ny Jakoba 1:5 mialoha ny nanapahany hevitra hanao zavatra. Indraindray Andriamanitra dia maniry antsika hirotsaka ao amin’ny vavaka sy ny fandalinana mialoha ny hanomezany valiny. Amin’izany fomba izany no tena ianarantsika zavatra.”

—Natasha Herbst, Utah, Etazonia

“Ny fonao no henoy fa tsy ny sofinao.”

—Sai Tua, Samoa Amerikana

Inona no torohevitra tsara indrindravoarainao mikasika ny fibebahana? Alefaso aminay ny valin-teninao amin’ny liahona.lds.org mialoha ny 30 aprily 2019.