Maata aika Nooraba
Rinanon mwaakan te Tamnei ae Raoiroi, Kristo e na anganiira te konaa na tabeakiniira ao n tabeakiniia tabeman n aron are E karaoia.
Noori Bain te Atua
I tangira karakin te ataeinimwane n te O TetamentI are mwakuri ibukin te burabeti are Eritai. Ao ngke e uti mwaaka ana tia mwakuri ana aomata te Atua, man otinako ao noria, e otabwaniniaki te kawa n te taanga ni buaka ae korakora are kani buakaniia. E biri nakon Eritai: “Au toka, tera ae ti na karaoia?”
Eritai e kaeka, “Tai maaku: bwa a mwaiti riki aika mena iroura nakoia aika a mena irouia.”
Eritai e ataa ae kainnanoia te ataeinimwane nakon karauakin nanona; e kainnanoa te nooraba. Ao ngkanne “Eritai e tataro, … Te Uea, … kaurei matana, bwa e na nooria. Ao te Uea e kaurei matan te rorobuaka: ao, e noraba, ao noria, e on te maunga arei irouia aoti ao ka-ni buaka aika kanga ai, aika a otabwaniniia Eritai.”1
Boni iai taai ngkana ngkami, n aekan te toro, ni kunea bwa ngkami ni ikakorakora n noora aron ana mwakuri te Atua inanon maium—taai ngkana ko namakina arom iaan te kangaanga—ngkana kangaangan te maiu a uotiko nako aon bubuan waem. Tataninga ao onimakina te Atua n oin Ana tai, bukina bwa ko kona ni kakoaua Nanona ma nanomi ni kabane. Ma iai te kauoua n reirei ikai. Tariu ao mwaneu aika tangiraki, ngkami naba kam kona n tataro nakon te Uea ni kauki matami bwa kam na noori bwaai aika kam aki kona n noori.
Norakira iroura n aron Ae Noriira te Atua
Tao bwaai aika moan kakawaki iroura bwa ti na noria raoi bwa antai te Atua ao antai ngaira—naati mwaane ao aine irouia ara karo ake i karawa, ma “rikira ae mai iroun te Atua ao ae akea tokira.”2 Butia te Atua bwa E na kaoti koaua aikai nakoim, n raonna ma Ana namakin ibukim. Ngkana ko oota riki n aron kinaakim ao am mwakuri, am ataibwai ae korakora, e na kakorakora anaakin nanom ni maium.
Noorakia Tabemwaang
Ataakin aron te Atua n noorira e katauraoa te kawai ni buokira n nooria tabeman n aron are E nooria. Columnist David Brooks e taku: “Mwaitin aia kangaanga ara aomata ae korakora e nako mairouia aomata ake a aki nonoraki man tabeakinaki irouia tabeman. … [Iai] oin … kateira are ti tangira ni karekea, ae ti tamaroa iai, [ao anne] bon kateira n norakira n tatabemaniira ma te nano ni koaua ao ni mwannanoaki.”3
Iesu Kristo e nooria aomata ma nanona ni koaua. E nooria n tatabemaniira, ni kainnanoia, ao aroia are a na kona n riki iai. Tabeman a nooria taan akawa, taan ikoikoti ana mwane te uea, Iesu e nooria reirei; tabeman a nora te aomata ae niniaki irouia taimonio, Iesu e taraa te baere e rawawata iai, e nanoangaa te mwaane anne, ao e kamaiua.4
Inanon maiura ae tabetabe, ti kona ni katootonga ana katooto Iesu ao n noria n tatabemaniia—kainnanoia, aia onimaki, aia kangaanga, ao aroia are a na riki nako iai.5
Ngke I tataro nakon te Uea bwa e na kauki matau n noori bwaai ake I aki kona n noori raoi, I aki toki n titirakinai uoua titiraki ao ni kakauongo nakon te kaeka are roko: “Teraa ae I karaoia ae N a riai ni katoka karaoana?” ao “Teraa ae I aki karaoia ae N a riri ni moana karaoana?”6
Taian namwakaina n nako, inanon tain te toa, I titirakinai titiraki aikai ao ni kubanako man te namakin are roko. “Tooki n taraa am tareboon ngkana ko katerain.” Taraakin au tareboon n te rain e a kuri n otomatiki; I kunea bwa e a reke taina ni karaoi mwakuri aika bati, wareki ao ni kaekai imeeri, n tarai taian rongorongo, ke ni kakae rinanon taian rongorongo.
N te moaningabong are imwiina, I kuneai n tataninga n te rain ae abwabwaki n te titoa. I kaotinakoa au tareboon ao ngkanne I uringa te namakin are I a tia ni karekea. I kararoa au tareboon ao n tarataranako. I noora te mwaane ae a ikawai n te rain i moau. Akea kanoan ana kaa tii tabeua taian kaen aika kanan te katamwa. I namakina te un teutana, ma n taekina te bwai teuana kanga te aro ni wanawana, “I kona n noria iai am katamwa.” E taku e na roko te buaka, ao e aki tangiria bwaa e na kauiaki n akea kanaia katamwa. Ti marooro, ao ngkanne e rairaki nakoiu ao e taku, “Ko ataia, I tuai tuanga temanna te bwai aei, bwa te bong aei au bong ni bung.” E marau nanou. I katekeraoia n ana bong ni bung ao n anganna te tataro ae rau ni kakaitau bwa I aki katabeaki n au tareboon ao ni kabuaa te tai n noori ao n toma ma temanna riki te aomata are e kainnanoia.
Ma nanou ni kabanea I aki tangiria bwa N na riki n aekan te ibonga ke tei Rewi iaon te kawai nako Ieriko—temanna are e taratara ao e kitanna.7 Ma n taainako I iangoia bwa ngai.
Noorakin Ana Mwakuri te Atua i Bukiu
I a tia n reiakina te reirei ae kakawaki aron te nonori ae korakora mairoun te ataeinnaine ae arana Rozyln.
Te karaki ae taekinaki nakoiu iroun raraou are taonaki n te kangaanga ngke e kitanaki iroun kainnabana te mwane ae 20 ana ririki. Ma natina a bwenauaki imarenaia tamaia ma tinaia, te kantaninga ibukin irakin te taromauri n tii ngkoe e kabwaranano. E taekinna neiei:
“Inanon te ekaretia ike e rangi ni kakawaki iai te utu, e kamaraki are ko na tekateka n tii ngkoe. N te Moan Taabati I nakonako n tataro bwa a na akea ae na taetae nakoiu. I aki kakarongoa, ao e a kaan ae N nang tang. I tekateka n au tabo, ma te kantaninga bwa akea ae na ataia ae akea kaain te kaintekateka.
Te ataeinaine n ara uoote e rairaki ao e taraai. I baka ni moangare. E moangare nakoiu. I kona n noora ana tabeaianga ni moana. I bubutia ni karaurau bwa e na aki nakoiu n taetae ma ngai—Akea te bwai irou ae riai n taekinaki ao e ataia bwa N na tang. I rairaki ni baraaki n tarai aon waeu bwa N n aki tataraaki.
Inanon te aoa are imwiina, I ataia bwa e aki toki n rairaki n taraai. Ngke bwara te taromauri, e a karekea ana tai ni kawarai. ‘Mauri, Rozlyn,’ I wirikiriki. E rabwatai ni baina ao e taku, Titita Smith, I kona n taekinna bwa te bong aei e aki raoiroi ibukim. I kabwarabure. I tangiriko.” N aron are e a tia n taekinaki, a bwaro ranimatau ngke e a manga rabwatai. Ma ngke I a nako, I iango irou, ‘Tao I kona ni karaoa aio imwiin bwaai ni kabane.‘
“Te ataeinaine ae 16 ana ririki, ae uarereke riki nakon iteran au ririki, e kawarai ni katoa Taabati inanon nikiran te ririki arei n anganai te irabwati ao n titiraki, ‘Ko uara?’ E karekea nakoiu te bitaki inanon ae I namakina n rorokou nakon te taromauri. Te koaua aio I moanna ni mwioko i aon taian irabwati akanne. Temanna ae kinaai. Temanna ae I ataia bwa I mena ikekei. Temanna ae mwamwannano.”
Ibukin bwaintangira ni kabane are anganiira te Tama ma nanona ni koaua, n tarakina ni koaua ti kainanoaki bwa ti na bubuti Nakoina—ao ni mwakuri. Bubuti bwa ko na nooria tabeman n aron are e nooria iai—ngkai Natina mwaane ao aine ni koaua ma aia konabwai ae akea tiana ao ae mimitong. Ngkanne mwakuri ma te tangira, ao kariaia bonganaia aia konabwai are kainnanoaki. Ngkai e reke te katei aio bwa anuan maiura, ti na kuneira bwa n riki bwa “taan irira … Iesu Kristo.”8 Tabeman a na kariaia nanora ma ngaia. Ao n te baeten aio ti na nora nab oin koauan kinakira ao ara mwakuri.
Raraou e uringa te namakin teuana riki ngke e tekateka n te kaintekateka ae akea kaaina, n tii ngaia, ni iangoia ngkana 20 te ririki ni kekeiaki ni maiuakinan te euangkerio ni mweengana bon akea boongana. E kainnanoa riki karauan nanona, e kainnanoa ae na noria. E namakina te ttiraki are e niniia nanona: Bukin tera ko karaoi bwaai akanne? Ko karaoi ibukin te kanuanga, kamoamoakiia tabeman, ke e na imwiina ae tangiraki?” E ienikuri n te tai ae waetata, ni iango inanona, ao ngkanne e a kona ni kaeka raoi, I karaoi bukina bwa I tangira te Tia Kamaiu. Ao I tangira ana euangkerio.” E kauki matana te Uea ni buokia bwa e na noria. E bebete aio ma te bitaki n nooraba ae mwaakaroiroi e buokia n reiti nako ni waaki iaon te onimaki inanon Kristo, n aki tabe ma ana kangaanga.
I kakoaua bwa Iesu Kristo e tangirira ao e kona n anganira maata n nooraba—e ngae ngkana e matoatoa, e ngae ngkana ti a kua, e ngae ngkana ti a maroa, ao e ngae ngkana te bwai are ti kantaningaia e aki reke. Rinanon Raoiroina, E kakabwaiaira ao ni karikirakea ara konabwai. Rinanon mwaakan te Tamnei are Raoiroi, Kristo e na anganiira bwa ti na tabeakiniira ao n tabeakiniia tabeman n aron are E karaoia. Man Ana buoka ti kona ni mwannanoa are moan te kainnanoaki. Ti kona ni moanna n noora bain te Uea ni mwakuri inanon ao ibuakon taekan nako aron maiura—ti na nooria ni koaua.
Ao ngkanne n te bong ae kakannato “ngkana e nang kaoti ti na riki n aekana, bwa ti na nooria n arona; bwa ti na karekea te kantaninga aei”9 bon au tataro inanon aran Iesu Kristo, amen.