Ainen Tion
Kam na riki bwa te korakora ae kakaawaki n ikotakiia Iteraera ao ni karikan ana botannaomata Tion.
Mwaneu aika tangiraki, I kakabwaiaki ngkai I taetae nakoimi n te tai ae tamaroa aei n rongorongon nako te aonaaba. Ni katoa bong, ti a kan roroko n te tai ae mimitong are te Tia Kamaiu Iesu Kristo, e nang manga roko riki nakon te aonaaba. Ti atai bwaai aika kakamaku are a na riki imwain Rokona, ma nanora a kaonaki n te kimwareirei ao te mweengaraoi naba n ataakin berita aika mimitong are e na kakoroaki bukina imwain Okina.
Ngkai natin Tamara are i Karawa aika aine, ao ngkai nati aine iroun te Uea, Iesu Kristo n Abanueana,1 iai katabeami ae kakaawaki n te tai ae korakora ae imwaira. Ti ataia bwa te Tia Kamaiu e na roko nakoia aomata ake a tia n ikotaki ao n tauraoi ni maeka n ai aroia aomata ake n ana kaawa Enoka. Aomata ikekei a bane ni katiteuanaaki n onimakina Iesu Kristo ao man itiaki ao a bane n uotakirake nako karawa.
Aio ana kabwarabwara te Uea are e kaotia n te bwai are e na riki nakoia ana botannaomata Enoka ao te bwai are e na riki n te kabanea ni bong ni bwaninin te tai aei:
“Ao e na roko te bong are te aonaaba e na motirawa, ma i mwaain te bong anne karawa a na karooaki, ao te rabuna ae te roo e na rabuna te aonaaba; ao karawa a na ruru, ao te aonaaba naba; ao karawawata aika korakora a na roko i buakoia natiia aomata, ma au aomata N na bon kawakiniia;
“Ao te raoiroi N na karuoa mai karawa; ao te koaua N na kaotinakoa man te aonaaba, bwa e na kaota koauan au Rikitemanna; mangautina man te mate; eng, ao mangautiia aomata ni kabaneia naba; ao N na karaoa te raoiroi ao te koaua bwa a na maunanako te aonaaba n aron te ieka, ni botiia ake I rineia man mwakoron te aonaaba ake aua, nakon te tabo are N na katauraoia, te Kaawa ae Tabu, bwa aonga au aomata ni kabaei nukaia, ao ni kakaantaninga au tai n oki; bwa ikekei e na mena iai umwau, ao e na aranaki bwa Tion, Ierutarem ae Boou.
“Ao te Uea e taku nakon Enoka: Ngkanne ngkoe ao ni kabane am kaawa a na kaitibo ma ngaiia ikekei, ao ti na butimwaeia nako nanon bwanibwanra, ao a na noorira; ao ti na bwaka i aon roroaia, ao a na bwaka i aon roroara, ao ti na kaboria i marenara;
“Ao ikekei e na riki bwa au maeka, ao boni ngaia Tion, are e na otirake man taian karikibwai ni kabane ake I a tia ni karaoi; ao i nanon te maan ae teuana te tenga te ririki te aonaaba e na motirawa.”2
Ngkami aine, natimi aine, tibumi aine, ao aine ake a kam a tia ni kaikawaia a na riki bwa boton katean te botannaomata ake a na karekea te reitaki ae mimitong ma te Tia Kamaiu. Kam na riki bwa te korakora ae kakaawaki n ikotakiia Iteraera ao ni karikan ana botannaomata Tion ake a na maeka inanon te rau i Ierutarem ae boou.
Te Uea e a tia, rinanoia Ana burabeti, ni karaoa te berita nakoimi. N taai akekei n te Bootaki n Aine, te Burabeti Iotebwa Timiti e taku nakoia aine, “Ngkana kam karaoa ami kabanea n tamaroa, anera a na bon aki kona n tukaki n riki bwa taan buoki ngkami.”3
Te konabwai ae kamiimi anne e mena iroumi, ao kam katauraoaki nako iai.
E taku Beretitenti Gordon B. Hinckley:
“Ngkami aine … kam naaki taua te kauoua n tabo n ana baire te Tama ibukin kukureia ae akea tokina ao maiuraoia natina. Ngkami bon mwakoron te baire anne ae rang kakaawaki.
“Ngkana akea ngkami te baire e aki kona ni mwakuri. Ngkana akea ngkami te burokuraem e na aki koro nanona. …
“Ngkami n tatabemani ngkami bon nati aine iroun te Atua, ae iai rikimii ni bwaibwai ae mairoun te Atua.”4
Ara burabeti ae ngkai, Beretitenti Russell M. Nelson, e a tia n anganiira te kabwarabwara iaon mwakoron tabemi ni katauraoi imwain rokon te Tia Kamaiu:
“E na kangaanga norana bwa mwaitira te korakora … are irouia aine, tiaki ti n aia utu ma n ana Ekaretia naba te Uea, ngkai buuaine, tiina, ao tiibu aine, bwa mwaanera ao ai tinara, ngkai taan reirei ao taan kairiiri; ao riki ngkai taan kaota te banna ni katooto ae tamaroa ao taan kamanoa te onimaki.
“E a tia ni kakoauaki aei rinanon nako mwioko n tararua n te euangkerio man aia tai Atam ao Ewa. E ngae n anne ainen inanon te mwioko n tararua ae ngkai a kaokoro mairouia aine riki tabeman ibukina bwa te mwioko n tararua aei e kaokoro ma boong ake mai imwaina. Te kaokoro aei e uota te tibwanga ao te mwiokoaki.”5
Te mwioko n tararua aei e onoti ibukina bwa te Uea e na kairiira bwa ti na tauraoi n riki kanga ai aron te Kaawa are Enoka. E a tia ni kabwarabwara rinanoia Ana abotoro ao burabeti bwa tera kanoa aika riai ibukin te bitaki nakon te botannaomata n Tion.
Unimwaane Bruce R. McConkie e reirei:
“Ana bong [Enoka] bon te bong ni bure ao ni buakaka, te bong n roo ao ni kakaitara, te bong ni buaka ao n urubwai, te bong are e uota kaitiakan te aonaaba n te ran.
“E ngae n anne, Enoka, e kakaonimaki. E ‘noora te Uea,’ ao e taetae ma ngaia ‘n itaramata’ n aron are temanna e taetae nakon temanna(Mote 7:4.) Te Uea e kanakoa bwa e na tataekina te rairannano nakon te aonaaba, ao e mwiokoia bwa E na riai ni bwabetito n aran te Tama, ao te Nati, are e onrake n te akoi ao te koaua, ao n te Tamnei ae Raoiroi, are kaota koauan te Tama ao te Nati.(Mote 1:39.) Enoka e karaoi berita aika tabu ao e bootia kain te taromauri irouia taan kakoaua aika koaua, are ni kabane a riki n rang kakaonimaki n te aro are ‘te Uea e roko ni maeka ma ana aomata, ao a maeka inanon te raoiroi,’ ao a kakabwaiaki mai eta. ‘Ao te Uea e arania ana botannaomata bwa Tion, ibukina bwa ti teuana nanoia ao teuana aia iango, ao a maeka i nanon te raoiroi; ao bon akea ae e kainnano i buakoia.(Mote 7:18.) …
“Imwiin are te Uea e araniia ana aomata bwa Tion, e taekinaki n koroboki aika a tabu bwa Enoka e ‘katea te kaawa are e aranaki bwa Kawan te Mimitong, are Tion; ’ao e koro bukina bwa akea Tion, bwa te Atua e anaia nakon oin bwanibanna; ao man te tai anne e reke taekana aei, Tion e birinako.’ (Mote 7:19 AM, 21, 69.) …
“Tion naba aei are e anaaki nako karawa e na manga kaokaki…ngkana te uea e kaoka riki Tion, ao kaaina a na raona Ierutarem ae boou, are e na manga kateaki.”6
Ngkana taai aika nako ai tibwa moana, n te tai are e roko iai te Tia Kamaiu, nati aine ake a teimatoa nakon aia berita aika tabu ma te Atua e na raka mwaitiia iaon iteran mwaitiia ake a tauraoi ni butimwaia ngkana E roko. Ma mwaitira mwaitiia, ami mwakuri ni karekean te katiteuanaaki ibuakoia aomata ni katauraoia ibukin Tion e na korakora riki nakon te itera.
N na tuangngkami bwa bukin tera I kakoaua bwa e na riki anne. Ana Boki Moomon e karakina rongorongoia kaain Tion. Ko uringnga bwa e riki imwiin are a tia n reireinaki, tangiraki, ao ni kakabwaiaki iroun te Tia Kamaiu are mangauti ae: “bwa bon akea te itabaraaraa n te aba, ibukin tangiran te Atua are e bon maeka inanoia aomata.”7
I a tia n reiakinna inanon maiu bwa natin Tamara are i Karawa aine iai aia tarena ni kauarerekea te un ao ni karikirakea te raoiroi man tangiran te Ata ao n ana tangira te Atua a karekea te ibuobuoki nakoia ake a buokiia.
I nooria ngke I kairake ngke ara mwaanga ae uarereke a boo ni mweengau. Ngai ma tariu ti ngaira ae iai iroura te Nakoanibonga ae te Aaron, tamau ti ngaia ae taua te Nakoanibonga ae te Merekitereka. Te beretitenti n te Bootaki n Aine e boou ao buuna e aki kukurei n ana taromauri n ana Ekaretia. Membwa ni kabane bon tii aine ake a ikawai n akea temanna te nakoanibonga ni mweengaia. I mataku iroun tinau ma aine akekei n tangira, kaunga, ao n tararua imarenaia n aki bwaka. I a ataia ngkai bwa I anganaki ni moantaai aron tein Tion.
Reiakinau aron korakoraia aine aika kakaonimaki e reitinako n te mwaanga ae uarereke n te Ekaretia i Albuquerque, New Mexico. I matakuakina kainnaban te beretitenti n te mwaanga, kainnaban te beretitenti n te mwakoro, ao te beretitenti n te Bootaki n Aine ni mwananoia naake a boou ao taan rairaki n tatabemaniia. N te Taabati are I kiitana iai Albuquerque, imwiin uoua te ririki n nora korakoraia aine ikekei, e a kateaki te moan titeiki. Ngkai te Uea e a katea te tembora ikekei.
I mwaing imwiina nako Boston, are I a beku iai n te beretitentii n te mwakoro are e tararuai mwaanga aika uarereke ake a uamaenako n aba aika uoua. Iai itabaraaraa ae e raka iaon teuana ao a katokaki irouia aine aika tatangira man kakabwarabure are e buoka kamarauan nano. Te Tabati are I kiitana iai Boston, te membwa n te Moan Beretitentii e katea te moan titeiki i Massachusetts. Iai ngkai te tembora ikekei, n uakaan nakon ana tabo are e maeka ngkoa iai te beretitenti n te mwakoro. E a tia n uotaki nakon waaki ni kakukurei n te Ekaretia ao imwiina e a weteaki bwa e na beku bwa te beretitenti n te titeiki ao imwiina bwa te beretitenti n te mition, ao a riki aikai nakoina iroun buuna ae kakaonimaki ao n tatangira.
Mwaaneu, kam a tia n anganaki te kakabwaia n riki bwa nati aine iroun te Atua ma bwaintangira aika onoti. Kam uota nakon te maiu ae mamate te konabwai n te maiu n tamnei n tobwaia tabeman ao n tabekiarake ni karietataia nakon te tangira ao te itiaki are a na tau iai ni ikotaki ni maeka bwa te botannaomata i Tion. E aki maninnati bwa te Bootaki n Aine, te moan bootaki n te Ekaretia are e tei ibukiia natin Tamara are i Karawa aika aine, iai ana botoniango ae kangai “Akea Kabwakan te Tangira.”
Te tangira ae kororaoi bon ana tangira Kristo ae itiaki. Ao bon onimakinana ao korakoran Ana Mwakuri ni Kamaiu are akea tokina are ko na tau iai, n reitaki ma naake ko tangiriia ao ni beku ibukiia, nakon te bwaintangira ae moanibaan te tamaroa ni maeka n te tabo are a kaman tataningaaki ao ni beritanaki bwa Tion. Ikekei kam na riki bwa ainen Tion, aika tangiraki iroun te Uea ao naake kam a tia ni kakabwaiaia.
I kakoaua bwa ngkami taan ababa n abanuean te Uea iaon te aba. Ngkami nati aine iroun Tamara are i Karawa, are E kanakoi ngkami nakon te aonaaba ma ami tarena aika onoti are kam berita bwa kam na kabonganai ni kakabwaiaia tabeman. I berita nakoimi bwa te Uea e na kairi ngkami n taui baimi, rinanon te Tamnei ae Raoiroi. E na nako n rimoami ngkai kam buokia ni katauraoia Ana aomata bwa aonga n riki bwa Ana aomata ni berita Tion. I kakoaua n aran Iesu Kristo ae tabu, amen.