Kataaki, Kakoauaaki, ao Kanakoraoaki
Te kakabwaia ae korakora are e na roko ngkana ti kaota kakoauaakin ara kakaonimaki nakon ara berita inanon tain kataakira bon te bitaki inanon aroarora.
Tariu ao mwaaneu aika kam tangiraki, I rang kakaitau ngkai n na taetae ma ngkami n te bong aei. Au kantaninga bwa N na angani ngkami te ungannano ngkana e a taraa ni kangaanga ao n aki nakoraoi aron te maiu. Tabeman mai iroumi, aio te bong anne. Ngkana tiaki, ae e na bon roko te tai anne.
Aio tiaki te bong ae nakobuaka. E bon rikiāma e kona n nakoraoiāibukina bwa bon ana kantaninga te Atua inanon Karikan te Aonaaba. Te kaantaninga anne bon anganakiia Natina te tai ni kaotia ibon irouia bwa a konaa ao n tangiria n rinea te eti ngkana e a matoatoa. Ni karaoan aei, e na bitaki aroaroia ao a kona n riki n ai Arona. E ataia bwa anne e kainnanoa te onimaki ae e aki kona ni kamwaingaki mai irouna.
Mwaitin baika I atai a roko mai irouia au utu. Ngke waniua au ririki, tinau e tuatua bwa ngai ma tariu ti na kouteute ma ngaia n ara onaroka ibukin ara auti. Ngkai, anne e taraa n ae te tabe e bebete, ma ti maeka i New Jersey. E aki toki ni kakarau. Te tano e riki bwa te riburibu. A waekoa rikiraken uteute nakon riki buki ni kai n amwarake.
I uringa marakin nanou ngke e kounako te uteute inanon baiu, e tiku wakaana n nim ni matoa n te riburibu ae tinebu. Tinau ao tariu a moanna n raroa n aia rinan. I rangi ni iburoki, ma I bon tio naba ibuki.
āE a rangi ni kangaanga!ā I takarua.
Onean mwiin ae e na anga taeka n nanoanga, e wingare tinau ao n taku, āO, Hal, e koaua, e bon kangaanga. E bon riai ni kangaanga. Te Maiu aei bon te kakataiā
N te tai anne, I namakinna bwa a bon koaua ana taeka ao a reitinako ni koaua inanon maiu rimwii.
E mataata bukin moangaren tinau irou n ririki ake imwiina ngke I wareka aia kantaninga Tamara are i Karawa ao Natina ae Tangiraki ngke a karika te aonaaba ao n anganiia aia tai natina ake tamnei ni karekea te maiu ae mamate:
āAo ti na kataiia ma ngkai, n nooria ngkana a na karaoi bwaai ni kabane are e na tuangiia te Uea ae Atuaia;
āAo naake a kawakini moan maekaia a na karakaaki aroia; ao naake aki kawakini moan maekaia a na aki karekea te mimitong n te abanuea naba anne ma naake a kawakina moan maekaia; ao naake a kawakina kauouan maekaia a na mwaiti riki mimitong i aon atuuia n aki totoki.ā1
Ngkoe ao ngai ti butimwaea te kakao anne bwa ti na kataaki ao ni kakoauaaki bwa ti na rineia ni kaawakin ana tua te Atua ngkana ti aaki mena i rarikin Tamara are i Karawa.
Ma irarikin are a na kakao Tamara are i Karawa, Rutibero e kairiia nako te katenimwakoro natina ake tamnei bwa a na iria ao n rawa nakon ana babaire Tamara ibukin rikirakera ao te maiu ni kukurei ae akea tokina. Ibukin ana kakaitara Tatan, e a tewenakoaki ma naake a iriiria. Ngkai, e a kataia ni karekeia aika a mwaiti bwa a na tannako mai iroun te Atua n tain te maiu ae mamate aei.
Ngaira ake ti butimwaea te babaire ti karaoia ibukin ara onimaki iroun Iesu Kristo, are e anga bwa e na riki bwa ara Tia Kamaiu ao te Tia Kabooi Maiura. Tia kaman tia ni kakoauaa bwa mamaarara ake tao ti na rinanoi n te maiu ae mamate, ao kariiri aika bubuaka ake a na kaitaraira, te korakora n te raoiroi e na rang n riao korakorana.
Tamara are i Karawa ao Iesu Kristo a kinako ao a tangiriko. A tangiria bwa ko na okiriia ao n riki n Aiaroia. Am tokanikai bon Aia tokanikai. Ko a tia n namakina te tangira anne are e kamatoaa te Tamnei ae Raoiroi ngke ko wareki ke n ongo taeka aikai: āBwa nooria, bon aio au mwakuri ao mimitongiuāni karekea te aki mamate ao te maiu ae akea tokina ibukin te aomata.ā2
Iai mwaakan te Atua ni kabebetea kawaira. E kamwarakeia tibun Iteraera n te bwerena inanon aia tai ni mwananga nakon te aba ni berita. N ana tai ni mwakuri te Uea ngke e maiu e kamaiuia aoraki, e kautiia mate, ao e katoka buakan taari. Imwiin Mangautina, E kauka āte nne ni kaikain nakoia ake a kabaeaki.ā3
Ma e ngae n anne te Burabeti Iotebwa Timiti, temanna ae moan te korakora ibuakoia ana burabeti, e korakai inanon te karabuti ao e reiakinaki te reirei ae a reke buokara iai ao ti kainanoia inanon kakataan ara onimaki: āAo ngkana ko na teweaki nako nakon te rua, ke nako nanon baia taan tiritiri, ao te motikitaeka nakon te mate e roko nako aom; ngkana ko teweaki nako nanon marawa; ngkana nao aika rang korakora a kaitarako; ngkana ang aika kakamaku a riki bwa am kairiribai; ngkana karawa e ikota te roo, ao ni kabane bwain karawa a ikotaki n tuuka te kawai; ao e moamoa riki, ngkana mwangain moone e na kaurea wiina n rimwim, ko na ataia, natiu, bwa ni kabane bwaai aikai a na anganiko te kataneiai, ao bon ibukin kabwaiam.ā4
Ko na bae ni iangoia ao ni miimi bwa e aera te Atua ae tatangira ao n rangi ni mwaaka ni kariaia bwa kataakira n te maiu ae mamate e na rangi ni matoatoa. Bon ibukina bwa E ataia ae ti riai n rikirake ni itiaki ni maiun tamneira ao n aroarora bwa ti aonga ni kona ni maeka i Rarikina inanon te utu n aki toki. Ni karaoan anne, Tamara are i Karawa e anganiira te Tia Kamaiu ao te mwaaka n rinerine i bon ibukira man te onimaki ni kawakin Ana tua ao n rairii nanora ao ngkanne n Nakoina.
Ana babaire ae kakukurei te Tama iai ae bon oina raoi bwa te riki n ai aron Natina ae Tatangiraki Iesu Kristo. Iaon bwaai ni kabane, ana banna ni katooto te Tia Kamaiu bon te banna ni kairiiri ae tamaroa. E aki kaokoroaki ma e na bon kaota naba Arona ni kakoauaaki. E tokanikai ibukiia natin ni kabane Tamara arei Karawa, ni kabwarai boon aia bure ni kabane. E namakina kainanoia ni kabane ake a tia ao naake a na roko nakon te maiu ae mamate aei.
Ngkana ko iangoia bwa mwaitira te maraki ae ko kona n teimatoa n rinanona, tii Uringnga. E rinanon te korakai are ko rinanona bwa E aonga ni kona n tabekikorake. Tao e na aki kanakoa te rawawata, ma e na anganiko te korakora, te raunnano, ao te kaantaninga. E ataa te kawai. E nima te mwangko are e mao. E tokanikai iaon karawawata ni kabane.
Ko a kamwarakeaki ao n anganaki te raunnano iroun te Tia Kamaiu, are e ataa aron buokam inanon taian kakatai ake ko kaitarai. Aramwa e reirei:
āAo e na waaki, n rinanon te kainnano ni maraki ma te karawawataki ao te kaririaki n aekaia nako; ao aio bwa e na kakoroaki te taeka are e taku bwa e na uota iaona marakiia ao aorakiia ana aomata.
āAo e na uota i aona te mate, bwa e aonga ni kabwara ana kabaebae te mate are e kabaeiia ana aomata; ao e na uota i aona mamaaraia, bwa e na on nanoia n te nanoanga ni kaineti ma te maiu n rabwata, bwa e na ataia ni kaineti ma te maiu n rabwata bwa e na kanga ni buokiia ana aomata ni kaineti ma mamaaraia.ā5
Teuana te kawai ae e na buokiko iai bon kaoam bwa ko na Ururinga n tainako ao n roko Nakoina. E a tia ni kaungaira:
āBane mai nako Iu, ngkami akana kam kua ao kam rawawata, ao N na motiki rawami.
āAmoa amou i aomi, ao reirei i Rou, bwa I nimamanei ao i nanorinano: ao e na reke i roumi iai motikan rawan tamneimi.ā6
Te kawai Nakoina bon man kanuaakim n Ana taeka, ni kammwakura te onimaki nakon te rairannano, n rineia bwa ko na bwabetitoaki ao ni kamatoaaki irouia ana toro ake a kariaiakaki, ao ni kawakin am berita ma te Atua. E kanakoa te Tamnei ae Raoiroi bwa raraom, te tia karaunano, ao ni kairiiri.
Ngkai e tau maium ibukin ana bwai n tituaraoi te Tamnei ae Raoiroi, e konaa te Uea ni kairiko nakon ae mano e ngae ngke ko aki nora te kawai. Ibukiu, E a tia n angiin te tai ni kaota te kawai are imwiina ke are imwiina riki ae na toua. Ti n tabetai ae e kaota nakoiu bangin bwai aika a na roko, ma kaotakin baikanne e kairai bwa tera ae N na rineia ni karaoia inanon maiu ni katoa bong.
E kabwarabwaraa te Uea:
āKam aki kona n nooria ni matami, n te tai aio, ana baire Atuami ni kaineti ma bwaai akekei ake a na riki n taai aika a na roko, ao te mimitong are e na rimwiin ā¦karawawata aika a mwaiti.
āBwa i mwin karawawata aika a mwaiti e na roko taian kakabwaia.ā7
Te kakabwaia ae korakora are e na roko ngkana ti kaota kakoauaakin ara kakaonimaki nakon ara berita inanon tain kataakira bon te bitaki inanon aroarora. Man rinean ae ti na kawakin ara berita, mwaakan Iesu Kristo ao te kakabwaia n Ana Mwakuri ni Kamaiu e na kona ni mwakuri iaora. Nanora ana kamarauaki bwa ti na tangira, ni kakabwara bure, ao ni kaoiia tabeman bwa a na nakon te Tia Kamaiu. Ara onimaki iroun te Uea e rikirake. E kerikaaki makura.
Ngkai, e ngae ngke a beritanaki kakabwaia rinanon te karawawataaki, n oin wanawanara ti aki ukoukori karawawata aikai. N te maiu ae mamate are ti rinanona, ti na karekea te tibwanga ni kakoaua ibon iroura, bwa tina tokanikai iaon te kataaki bwa tina kona n riki n ai aron riki te Tia Kamaiu ao Tamara are i Karawa.
Irarikina, ti a tia n norii karawaawatakiia tabeman ao ni kataia ni buokiia. Anne e na bon bae n rangi ni kangaanga ngkana ti bon rinanon te karawawataaki naba. Ma ti na kunea bwa ngkana ti buoka kainnanon temanna, e ngae ngke e uarereke, e na kakorakoraaki nukara ao tina namakina te ota inanon te roo.
N aio, te Uea bon ara Banna ni Katooto. Iaon te kai i Korokota, ngke e a tia n rinanon te maraki ae korakora E na bon tia ni mate ngke ti aki Ngaia ana Riki Temanna te Atua, E taraia naake a tiringa ao e taku nakon Tamana, āKabwarai aia bure; bwa a aki ata ae a karaoia.ā8 Ngkai e korakai ibukiia ni kabane naake a maiu, E taratara mai iaon te kai n taraa Ioane ao Tinana are e nanokawaki ao e buokia inanon rawawatana:
āNgke e nora tinana Iesu, ma te reirei are E tatangiria, bwa a tei irarikina, ao E taku nakon tinana, Neiko, noria, natim anne!
āAo e taku nakon te reirei, Noria, tinam! Ao man te aua arei ao e kamaeka neierei te reirei arei n ana auti,ā9
Man ana mwakuri n te bong are e tabu anne, E kukurei n anga Maiuna ibukira n tatabemaniira, n anga tiaki ti ibukin buokara n te maiu aei ma ibukin te maiu ae akea tokina n te tai ae e na roko.
I a tia n noria aomata aika a rikirake nakon riki ae rietaata rinanon kaotan kakoauakiia n onimaki inanon taai ni kakatai. Inanon te Ekaretia n taai aikai bon banna ni katooto. Aomata a kairaki nako aon bubuani waeia mai imwiin taian kakaitara. Man aia onimaki n nanomwaaka ao aia kekeiaki, a riki n aiaron te Tia Kamaiu ao Tamara are i Karawa.
I reiakina te reirei riki teuana mai iroun tinau. Ngke e uarereke neiei, e aorakina te bononike ao te aki kona n onga kanana are e kuri ni mate iai. Imwiina a rotaki matireti ake a katobibia te ia are e bubura. E mate tamana ngke te kairake, ngaia are tinau ao mwanena a bubuoka tinaia.
Inanon maiuna, e namakina rotakina n taian kangaanga n te aoraki. Inanon 10 te ririki ni kabanean maiuna, e kainnanoi korokoro aika a mwaiti. Ma inanon aikai ni kabane, e kaota ana kakaonimaki nakon te Uea, e ngae ngke e a aki kona n nakonako. Te tamnei are ti teuana iaon ana oo bon tamnein te Tia Kamaiu. Ana kabanea n taeka nakoiu iaon ana kainiwene bon aikai: āHal, koa bwanaa n ae kaanga koa mariri. Ko riai n tararua marurungim.ā
N ana taunimate, te kabanea n tia taetae bon Unimwaane Spencer W. Kimball. Imwiin taekinan tabeua katakina ao ana kakaonimaki, e taekinna ma nanona n taku: āTabeman mai ibuakomi a bae ni iango bwa e aera ngkai Mildred e rinanon te korakai ae moan te mwaiti ao n rangi ni maan. N na tuangi ngkami bwa bukin tera. Ibukina bwa te Uea e tangiria ni kanakoraoia riki teutana.ā
I kaota au kakaitau ibukiia membwa aika kakaonimaki n ana Ekaretia Iesu Kristo ake a uotii rawaawataia n teimatoa n onimaki ao ake a buokiia tabeman n uotii rawawataia ngkai te Uea e ukoria ni kanakoraoiia riki teutana. I kaota naba au tangira ao au karinerine ibukiia taan tararua ao taan kairiiri ni katobibia te aonaaba ake a beku ibukiia tabeman ngkai a bon rinanon naba kanakoraoakiia ma aia utu.
I kaotia bwa ngaira natin te Atua, ae tangirira. I namakina ana tangira Beretitenti Russell M. Nelson ibukira ni kabane. Bon Ngaia ana burabeti te Uea n te aonaaba n te bong aei. I kakoaua n arana ae tabu te Uea Iesu Kristo, amen.