iTabagone Qase Cake
Yaco Tu me Dauveiqaravi Vinaka Cake ena Vuravura sa Bulia na Kalou ena Vukuda
Mai vei Elder Marcus B. Nash
Ena Vitusagavulu
Mai na dua na vosa ka a soli ena ika 18 ni bose vaka yabaki ni Stegner Center ena Univesiti ni Utah e Salt Lake City ena ika 12 ni Epereli, 2013.
Ni vinaka cake na noda qarava na vuravura oqo kei na veika kece e tu kina, ena vinaka cake na kena na tokoni, veivakauqeti, veivakaqaqacotaki, veivakabulabulataki, ka na vakamarautaka na lomada kei na yaloda.
Na noqu ivakawele sa ikoya meu tu wavolita na veikabula, seu taubale, vakatasisi, vodo bavelo e waitui, vodo basikeli, se lako ena vakasasa. Niu se gone, au a dau taleitaka meu tiko e loma ni veikau ka vakila na ivakadinadina ni vakagagalu, ka ra tauca na kau drokadroka me baleta na Dauniveibuli. Niu sa mai tubu meu uabula, au sa vulica ena vuli kei na vakabauta ni kevaka eda kilai keda vakamatata, na inaki ni bula, kei na inaki a buli kina na vuravura—ka vakasamataka tiko na veika oqo—eda na qarava na vuravura oqo kei na ka kece e tiko kina, ena sala e cecere cake, ka vakaturaga.
Na iNaki ni Kalou ena kena Buli na Vuravura
Na Turaga, mai vei ira na nona parofita ena gauna makawa kei na gauna oqo, sa tovolea me vukei keda meda kila vakamatata ka vakavinavinakataka na isolisoli ni bula ena vuravura totoka oqo. Ena Veiyalayalati Makawa, a vakasamataka o Tevita na ibulibuli cecere ni Kalou ka vakananuma e na domo levu na vuna—ena maliwa ni veika veivakurabuitaki oqo—sa dau nanuma tikoga kina na tamata na Kalou (raica na Same 8:4). A tinia o Tevita ni o ira na kawatamata era ka vakasakiti, “ia e lailai sobu mai vei ira na agilosi” (Same 8:5).
E a raica talega ena raivotu ko Mosese na vuravura sega ni wiliki1 ka kaya, “Oqo na vuna au kila kina ni sa ka wale ga na tamata, na ka ga au a sega ni nanuma” (Mosese 1:10).
Ena yalomalumalumu nei Mosese ena mata vakasakiti ni ibulibuli ni Kalou, e a sega ni yacova rawa na nona vakasama na dina cecere. Ka mani vakaraitaka tale vua na Turaga na Nona ibulibuli tawavakaiyalayala ka dusimaka ni o Koya na—Kalou—e a vakayacora na vei ibulibuli oqo “meu vakavuna na tawa mate rawa kei na bula tawamudu ni tamata” (Mosese 1:39). Na vuravura oqo—e dina na ibulibuli kece sara—e caka me vukea na noda rawata na tawa mate rawa kei na bula tawamudu.
Ni tukuni tale na inaki kei vuravura, e kaya kina na Turaga, “Tou bulia na vuravura me ra [kena ibalebale oi keda] tawana ko ira oqo; io me da vakatovolei ira mada kina, me da raica se ra na muria se sega na veika kece sa vakarota vei ira na Turaga na nodra Kalou”(Eparaama 3:24–25; raica talega na tikina e 26). Na bula ena vuravura oqo, salavata kei na isolisoli ni galala ni digidigi, e solia vei keda na madigi meda digitaka me da vakasaqara ka ciqoma na veika kece sa solia na Kalou ena dua na siga.2
Ni sa vakacavari na buli ni vuravura, sa marau na Kalou baleta ni sa raica ni sa na qaravi na Nona inaki me baleti keda, na Luvena.3 O ira na luvena tagane kei na yalewa na Kalou kei na matavuvale era na bucina cake era sega walega ni curuvakaveitalia mai ki na vuravura oqo; ia, era sa usutu ni kena inaki.4
Eda Tu Meda Dauveiqaravi Vinaka
Na bula ena vuravura oqo sa dua na veivakalougatataki kei na ilesilesi. Sa kaya na Turaga, “Ia, raica, na manumanu ni vanua kei na manumanu vuka e macawa, kei na veika kecega sa tubu mai e vuravura e sa buli me yaga vei ira na tamata, io me ra kania ka vakaisulu kina, ka me rauti ira kece vakatautauvata.” (Vunau kei na Veiyalayalati 49:19). Ia, me baleta na vuravura kei na veika kece oqori sa “cakacaka ni [Ligana]” (Vunau kei na Veiyalayalati 29:25), sa Nona kece sara.5 Ni da lewenivanua vakawawa ga e vuravura oqo, eda sa dauveiqaravi—sega ni itaukei. Ni sa vaka oqori, eda sa na soli itukutuku vua na Kalou—na kena itaukei—me baleta na veika eda cakava ki na Nona ibulibuli: “Ni sa kilikili me ra saumi taro na tamata kecega, me vaka na dauveiqaravi ni veivakalougatataki vakavuravura, kau a bulia ka vakarautaka me baleti ira na noqu ibulibuli” (Vunau kei na Veiyalayalati 104:13).
Na ivakarau ni noda kauwaitaka na vuravura, na noda vakayagataka ka wasea na kena isolisoli, kei na noda qarava na veika kece sa vakarautaki vei keda sa tiki ni noda vakatovolei ena bula oqo. E dodonu me da vakayagataka ena vakavinavinaka na veika sa vakarautaka na Turaga, levea na vakasabusabutaki ni bula kei na ivurevure eso, ka vakayagataka na isolisoli ni vuravura me vukei ira kina na dravudravua.6 Na Turaga e kauwaitaka vakatitobu na bula taucoko ka vakabibi o ira na Luvena, ka na tarogi keda ena veika eda digitaka meda cakava (se sega) ki na isolisoli ni Nona ibulibuli.
Sa yalataka vei keda na Turaga ni kevaka eda muri Koya ka vakayagataka vakadodonu na ivurevure ni vuravura ena vakavinavinaka kei na vakarokoroko, “na veika taucoko ni vuravura e na [nomudou], na manumanu ni vanua kei na manumanu vuka ni macawa. … Ka sa yalo vakacegu na Kalou ni sa solia na ka kecega oqo vua na tamata; ia oqori ga na ka era sa buli kina, ia ena vakatulewa, me vakayagataki vakavuku, ka me kua talega ni taurivaki vakatawadodonu” (Vunau kei na Veiyalayalati 59:16, 20).
Me da vakayagataka na ivurevure oqo ena vakatulewa kei na vakavinavinaka, ena inaki me da vukei ira kina na tani—kei na veitabatamata ena gauna oqo, ena gauna sa oti, kei na gauna mai muri—mera ciqoma na veivakalougatataki e gadreva na Tamada Vakalomalagi me baleti ira na Luvena.
Noda Rai Basikati Keda
E ka ni rarawa, nikua eda bula tiko ena dua na vuravura e rawa ni ra digitaka kina na tamata yadua me ra biliraka tani na Kalou ka qarava na Nona ibulibuli ena veibeci. E mosita na Kalou kei na Nona ibulibuli, ni yaco na ka oqo.
Sa vola ko Inoki ni sa tagi na Kalou ena vuku ni digidigi baleca kei na nodra yalokocokoco veikidomoki na Luvena.7 E a parofisaitaka o Moronai ni ena veisiga mai muri ena tiko na “bukawaqa, kei na cava, kei na o kubou …[ka] dukadukali sara na ka e tu e delai vuravura,” kei na ituvaki vakaoqori ena semati vata kei na “veimataqali itovo vakasisila kecega; a ra na lewe vuqa era na kaya, Kitaka oqo, se kitaka ko ya, ena sega na kena ca” (Momani 8:29, 31). Ni sa benuca vakayalo se vakayago na tamata na vuravura oqo, e rarawa talega na veika bula ka sega walega ni Kalou!8
E bibi sara, ni veivakalougatataki kei na kaukauwa ka rawa tiko mai na Lotu vakalesui mai ni Turaga kei na kosipeli sa tu kina na rawaka me gumatua ka veisautaka na yalo ni tamata me uasivia na lomana, me vakauqeta na lomana na Kalou kei na nona ibulibuli, ka me vukei keda meda vakasamataka na nodra tiko vinaka na tani ka vakasamataka na nodra gagadre na veitabatamata mai muri.
Na Veikabula e Kauti Keda Voleka cake vua na Kalou
Na vuravura kei na bula kece e levu cake sara mai na veika me laukana ka/se maninitaki; eso na tikina kei na iwasewase era tu me ra taqomaki! Na kabula tawavakacacani kei na “na ka kecega sa tubu mai e vuravura … sa buli me vinaka ka yaga … vei ira na tamata … ia me reki kina na mata ka marau kina na yalo … ka vakabulabulataka na yalo” (Vunau kei na Veiyalayalati 59:18–19).
Na kabula ena kena ituvaki taumada e kauti keda voleka cake vua na Kalou, ka vagalalataka na vakasama kei na yalo mai na rorogo kei na veivakawelei ni vakaiyauvakayago, laveti keda cake ki na vanua cecere, vakaturaga cake, ka vukei keda meda kila vinaka cake na noda Kalou: “Sa sowiri ko vuravura ena nona itosotoso, ka sa solia na nona rarama na matanisiga ena siga, ka solia na nona rarama na vula ena bogi, sa solia vaka talega kina na nona rarama na kalokalo. … Ke [dua] sa raica e dua se lailai vei ira oqo sa raica na Kalou ena nona lagilagi kei na kaukauwa” (Vunau kei na Veiyalayalati 88:45, 47).
Au sa dau taleitaka tiko ga meu taubale ena ulunivanua cecere ena maliwa ni vatu dei totoka kei na uluvatu eso. E dina ga ni ra vagagalu era tukuna tiko na kaukauwa kei na vakaturaga ni Kalou—kei na Nona yalomaqosa duatani ni veika matavinaka. Me vaka e vakadinadinataka o Alama, “Ia na ka kecega sa tukuna ni dua tiko na Kalou; io, na vuravura talega, kei na veika kecega sa tu kina, … era vakadinadinataka ni dua na Dauniveibuli Cecere” (Alama 30:44).
Au dau taleitaka na sara kalokalo ena bogi, kau dau saga meu sereka ena noqu vakasama na tawamudu ni gauna kei na maliwalala kau raica rawa. Au dau qoroya na vakasama vakayalo ka dau yaco mai ena veigauna vagagalu oya ni, e dina ga ni sa vakaitamera na maliwalala, na Turaga ni vei vuravura kece ga e sa kila e dua na tamata somidi lailai vakataki au. Ka kilai keda yadua o Koya. Na veibuli e vakadinadinataka na Dauveibuli, ia kevaka eda maroroya na vanua digitaki, tawavakacacani, era na vakadinadinataka vakamatata ka vakatitobu me baleta na noda Kalou ka vakauqeti keda me da toso ki liu.
Na kena vinaka cake na noda qarava na vuravura oqo kei na veika kece e tu kina, na kena na vinaka cake na nodra na tokona, vakauqeta, vakaqaqacotaka, vakabulabulataka ka vakamarautaka na lomada kei na yaloda—ka vakarautaki keda meda lako ka bula vata kei na Tamada Vakalomalagi kei na noda matavuvale ena dua na vuravura vakasilesitieli, sa ikoya na vuravura sara ga eda tu kina nikua, ia ena kena ituvaki lagilagi.9
Me da qai qarauna ena vakavinavinaka na vuravura oqo—na noda itikotiko nikua ka nuitaki ni na noda itikotiko ena gauna ka sa bera mai.