Ira na Marama Taumada ni Veivakalesuimai
Reki tu o Jane ena iLakolako
Eda sa vakataki Jane Manning James beka, ni navuca tu me vakacavara na noda ilakolako ena vakabauta?
Droini mai vei Toni Oka
Sa oca sara o Jane Manning James na taubale, ia a sega ni via cegu o koya.
Na luvena tagane qase duadua, o Sylvester, sa tamata levu me lako tikiva na qiqi. Ia na gone dramidrami o Silas, ka a sucu ena ilakolako, sa gadrevi tikoga me roqoti. Oya ena 1847, ka sa vakarau tu ni dua vei ira na imatai ni ivuvu na matavuvale na James me yaco ki na buca na Great Salt Lake.
O Jane a sega ni vulagi ena ilakolako balabalavu.
Ena va na yabaki ki liu, a biuta na nodratou itikotiko na nona matavuvale ena dua na siti ena tokalau me tomani ira na Yalododonu e Nauvoo, ena tiki ni iyalayala ena ra. Na ilakolako ena uciwai a dodonu me taura ga e vica na siga. Ia baleta ga ni ra a vakabobulataki tu e vuqa na tamata loaloa e Amerika ena gauna oya, sa dau vakaraitaka wasoma na matavuvale i Jane na pepa eso me ivakadinadina ni nodratou bula galala. Ka so na vanua e vereverea kina na lawa ena nodra tarovi na tamata roka tani ni lako curuma na vanua—oka kina na saumi ni $500 dua na tamata.
De rairai baleta tu na isau vakatuburarawa oqo se rairai baleta tu na veivakaduiduitaki tale eso, era a sega ni via kauti Jane kei na lewe ni nona matavuvale na kaiwaqa. Ni tawayalolailai tu, ratou a biuta tu mai e vuqa na nodratou iyau ka tekivuna na taubale kei na ka ga e rawa ni ratou kauta.
A taubaletaka na matavuvale i Jane e sivia e 800 na maile (1,287 km). Era a taubale curuma na veisiga turumaka kei na veibogi buto-loaloa. Era a lako curuma e dua na veikau ena dua na gauna, ka moce tu ena ruku ni maliwa lala tadola. Ni ratou yadra cake, sa vulavula tu na nodratou isulu ena uca cevata.
“Keitou taubale me yacova ni sa yavu na neitou ivava, ka yaco me sa mosi sara na yavai keitou ka kakaca ka dradra,” a vakananuma lesu o Jane. “… Keitou a kerea vua na Kalou na Tamada Tawamudu me vakabula na yavai keitou ka sa saumi na neitou masu.”1
Ni vosoti tu na ilakolako dredre oqo, a laga serenilotu o Jane kei rau na nona itubutubu kei ira na tacina, ena vakacaucautaki ni Kalou. Kena itinitini, ni oti volekata e tolu na vula ni taubale, ratou sa yaco tu ki Nauvoo. Ni oti e vica na yabaki, ni sa biubiu na Yalododonu yalodina me ra kosova na buca eso, a dua vei ira na matai ni ivuvu o Jane me tekivu taubaletaka na tuatua.